МЫЙӦН ОЛА МЕ...

1

Мыйӧн ола ме,
Кӧть мый ме вӧча,
Тӧда ӧд, мый
Тэныд пӧсь ни кӧдзыд.

Сьӧлӧмыд оз вӧрзьыв,
Кӧть ме кула.
И он тӧд, мый
Бара ӧшинь улад

Гегдӧм киясӧс
Пӧсь лолӧн шонта.
Ӧшиньясад биыд
Быттьӧ шонді.

2

Кӧдзыд менам сьӧлӧмлы,
Кӧдзыд менам ловлы.
Кутшӧм гажтӧм вӧлӧма
Бур йӧзыстӧг овны.

Повтӧмъяс да мустӧмъяс
Волывлӧны гортӧ.
Тӧда, оз ӧд пуктыны
Найӧ менӧ мортӧ.

Весиг гажтӧм думъясӧй,
Сьыланкывйӧй менам.
Муса йӧзкӧд, лунъясӧй,
Менсьым шогсӧ венад.

3

Кыдзи быдмӧ дзоридз,
Синъяслы оз тӧдчы.
Сідзжӧ муслун воӧ
Олӧмад тэн ӧтчыд.

Сэсся сійӧ быдмӧ,
Бордъясьӧ да качӧ.
Дзоридз кодьыс лоан,
Он и тӧдлы ачыд.

4

Вот босьта да шевкнита киясӧс,
Лӧз енэжлань кыпӧдча лэбачыс моз.
Мед вичкоыс сисьясӧн биасис,
Но ас муӧй, бур йӧзӧй оз лэдзны, оз.
Ог вермы на кувнысӧ, донаяс,
Ӧд сьӧлӧмӧй кыскӧ на ті дорӧ пыр.
А ті дорын небзя и шонала,
И олӧмсӧ радейтӧм оз дзикӧдз быр.

5

Мый нӧ эськӧ меным колӧ?
Унджык йӧзыс тадзи олӧ:
Шудыд гежӧда жӧ волӧ,
Олӧмыс оз ёна долӧд.