МОРТТӦ ДУМЫД СЁЙӦ

Морттӧ думыд сёйӧ —
Жебмӧ, висьмӧ сьӧлӧм.
Торйӧн арся войӧ
Сійӧ сьӧкыд вӧлӧм.

Асъя югдандорӧдз
Син оз куньсьы менам.
Ӧти дум со орӧ,
Мӧд нин бара венӧ.

Бӧрын вояс, вояс,
Кызыс сьӧд да гажтӧм.
Унджыкыс тай доя,
Гашкӧ, сійӧн ашті.

Ӧддзӧдчӧмӧн, скачӧн
Вояс кузя рӧдті.
Ставсӧ ачым, ачым
Соті, вии, пӧдті.

И со арся войӧ
Вежласьӧны думъяс.
Тырӧмаӧсь дойӧн
Вошӧм, кольӧм лунъяс...