«ЭН КОЛЬ»

Горув сиктсаяслӧн мӧс йирсьӧданіныс кладбище сайын. Креста йӧрті мунігӧн кыдзкӧ овлӧ шуштӧм да и ставыс. Талун асыв Трипиль Марья йӧзысь водзджык лысьтіс мӧссӧ да лэдзис саяс, мед пӧ виччысьыштас мукӧдъяссӧ.

Но Сюрук дыр эз думайт, бӧжсӧ вылӧ лэптыліс да и шутёвтіс креста йӧрланьыд. Быть вӧтчы Марьялы сы бӧрся. Тайӧ чики-микисьыс быдтор позьӧ виччысьны. Мунас да корсь сэсся, кыдзи кольӧм гожӧм — нюрӧ муртса абу вӧйӧма.

Колльӧдіс тьӧтӧ тайтӧсӧ йирсьӧдчан йӧрӧ да бӧр локтӧ гортас. Ывлаыс шондіа. Креста йӧрыс весиг ӧні кыпыдӧн кажитчӧ. Но, кор кладбище коли мышкас, Марья бӧрсьыс кыліс тэрыба шуалӧм: «Эн коль, эн коль, эн ко-о-ль!» Юрсиыс зэвтчис тюкъюр улас. Пӧсьӧ и кӧдзыдӧ шыбитліс сійӧс. Марья нетшыштчис му бердсьыс да заводитіс тӧвзьыны сиктланьӧ.

Кутшӧм нин сэні «эн коль!», кор тэ бӧрся крестайӧрсаыс вӧтчӧ. Лысьтан ӧмӧй видзӧдлыны бӧрвылад.

А кладбище потшӧм йылын пукаліс Ӧльӧксан Ёгорлӧн петукыс (коді тӧдӧ, мыйла сійӧ татчӧ кайӧма гортсьыс) да сьыліс «Кикируллю» песнялысь помсӧ: «Ко-ко-ко! Ко-ко-ко!»