ОЛӦМ ВЕК ПОМ НИ ДОР

1

Кык джуджыд керка костӧд
Ылын лӧзалысь вӧр
Сӧмын тыдыштӧ.
Шонді мыччысьлӧ регыдик кежлӧ,
Кыдзи чери тай
Ю вылын гыбыштлӧ.

А машинаяс ӧтарӧ-мӧдарӧ
Жургӧны, тюрӧны.
Мунӧны.
Кӧть и нёль часыд лун,
Ӧні шондіыс
Вӧр саяс сунӧ нин.

Тайӧ арся луныс кодь
Миян олӧм-вылӧм.
Нинӧмӧ на эскыны,
Медводдза лым сылӧ.

Вӧсни йиті вуджигӧн
Вӧйӧмысь на полан.
Тайӧ гудыр олӧмас
Кодлы и тэ колан?

Вӧв ветлысьлӧн вӧжжиыс
Кисьыс важӧн мынӧм.
Сувтлыштӧм ни шойччыштӧм.
Лэбзьӧ вӧлыс вынӧн.

Тадзтӧ вермас пыртны ӧд
Зыбуч нюра вожас.
Сыланьӧ Россияным
Лэбзьӧ ӧд зэв чожа.

Сӧмын чужӧ майшасьӧм,
Мый и лоас водзӧ?..
Миян чужан му весьтӧ
Ӧзъяс кутшӧм кодзув?

Чужис кӧ морт,
Сійӧ овны ӧд чужис,
И мыйла мам морӧссьыс
Нетшыштны бӧр.
Олӧмсӧ босьтны
И кад сылысь кужӧ,
А олігад кодікӧ
Орччӧн оз тӧр.

И пукалам ми
Порок бӧчкаяс вылын,
Со, вынйӧра бомбаяс
Чӧжӧма дась.
А вермас ӧд воны
И кад, абу ылын,
Кор Му шарыс
Торпыриг лэбзяс пусь-пась...

Он вермы сэк курыштны,
Йитлыны сійӧс.
Оз отсав сэк йӧзыслы
Некутшӧм Ен.
Став ловъясӧ Морт сӧмын
Му вывсьыс виас.
И сійӧ жӧ кадыслысь
Кузьмӧдас нэм.

2

«Чукыль-мукыль,
Кытчӧ ветлін?»
«Шырӧм-бритӧм,
Мый тэн могыс?» —
Татшӧм нӧдкыв
Мамӧ сетліс
Меным, тӧдмала-ӧ,
Ог-ӧ?

Ытшкӧм видз
Да кывтысь ю пӧ
Сёрнитӧны
Аръядорсӧ.
Чукыль-мукыль
Уна тӧдӧ:
Сиктъяс, каръяс,
Саридз дорсӧ.

Висер ю моз
Увлань кывті.
Уна аддзылі
И тӧдлі.
Уна мунліс
Сьӧлӧм вывті.
Чужанінӧс,
Кытысь мӧдлі,

Вежны кар вылӧ
Эг вермы.
Сійӧ меным
Медся муса.
Сытӧг нёрпала
И нэрма.
Сытӧг чусала
И куса.

Асылыс пемыд,
Асылыс кӧдзыд.
Школаӧ мунны
Чеччӧдӧ пӧчыд.

Школаыс ылын,
Мӧдар сикт помас.
Абу на регыд
Сэтчӧдзтӧ воны.

Медводз, дерт, тэнӧ
Жалитӧ мамыд.
«Велӧдчы, — тшӧктӧ, —
Лоан бур сяма».

Ачыс котӧртӧ
Доддявны вӧвсӧ.
Аньяслӧн сёрни
Торкӧ нин чӧвсӧ.

Йизьӧм гынкӧма,
Гыӧра шалля.
Рытнас ме вылӧ
Видзӧдӧ жаля.

Идрасяс, сэсся
Самӧвар пузяс.
Пӧлатьын войсӧ
Чӧскыда узям.

Пӧлатя, паччӧра
Керкаяс бырӧны.
Гӧбӧчын пусянін —
Сэтшӧмыс тыр ӧні.

Лӧсалӧм стенъясыс
Шпалерӧн эжсьӧны.
Небыдик диванӧн
Лабичьяс вежсьӧны.

Кӧзӧд и залавка
Лавкаысь босьтӧма.
И телевизор со
Ӧшиньсӧ восьтӧма.

Синсьыд би петмӧныд
Том дырйи-д уджавлін.
Весиг мусюрсӧ тэ
Эн вермы вуджавны.

Эн аддзыв некор тэ
Эжвалысь отсӧ ни.
Со тэныд ӧні тай
Ставсьыс и отсӧгыс.

Тыдалӧ мувывса
Олӧмыс-вылӧмыс.
Асьтӧ жӧ ӧдвакӧ
Войтырыс кылӧны.

Тэныд и бур, кор на
Вермыштан, олан на.
Ялаа ягыс моз
Ас мулы колана.

3

Сьӧлӧмӧн кылі кор
Муслунлысь дойсӧ.
Олӧмыс сэтшӧма
Некор эз ков!
Кыдзи нӧ коллявлі
Сытӧг лун-войсӧ?
Шуны кӧ веськыда,
Эг и ме ов.

Яла яг шӧрӧ
Эг кыпӧдӧй керка.
Неылын визувтӧ кӧн
Ичӧт ёль.
Рӧмпӧштан пыддиыс
Эз ло ва веркӧс.
Вольпасьным пыддиыс —
Туруна оль.

Юр весьтын дзирдаліс
Век жӧ яр кодзув.
Пармаыс меліа
Вашкӧдіс мойд.
Чеччыны шондікӧд
Велалі водз зэв.
Сьыланӧн сьӧлӧмысь
Петліс пыр дой...

Том кадӧй,
Верстьӧлунӧй коли.
Со, кӧні збыльысьсӧ
Коммуна.
Дас куим семья
Вылӧ дзоля
И пусянін,
И няйт ва мунан.

Кор гажтӧмыс
Сы выйӧдз босьтліс,
Горш кӧинъяскӧд
Тышысь мудзлі.
Ме мустӧмыслы
Ӧдзӧс восьтлі.
И кодзулӧдзыс
Сэк эг судзлы.

Зык-шумас
Кызь во пӧшти олі.»
И уна вежсис
Йӧзыс сэні
И со нин,
Ветымынӧ воиг,
Ас оланінӧй
Вичмис меным.

И ме друг кыдзкӧ
Шӧйӧвоши.
Кыдз батьтӧм-мамтӧм
Челядь петӧ
Детдомысь.
Челядьдырыс вошӧ.
А томлун
Пель дін бокас сетӧ.

Сэн комендантъяс
Киын ставыс.
А тані ачыд
Кыдзи кужан.
Кыдз быттьӧ
Вӧльнӧй светас таво
Ме сӧмын на и
Вӧлись чужи.

А чужи кӧ,
Мен овны колӧ.
И радлун юкны
Чужан мукӧд.
И век жӧ
Медся мича олӧм.
И сылысь шаньмӧмсӧ
Он дугӧд.

Войнас усьӧма лым.
Ывла югдӧма едждӧдӧм мусьыс.
Няйтыс вӧлі нин кын.
Оз нин сыв лымйыс, мыйта кӧть усяс.

Ёнмас ю вылын йи.
Мӧдлапӧлас ме шутёвтла бара.
Пожӧм лапсӧ, кыдз ки,
Кутла топыда, гажтӧмтчи карас.

Чужанінад век бур.
Сэн и сынӧдыс чӧскыдджык кӧра.
Шудыс бокысь эз сюр.
Коркӧ сэтчӧ ме, гашкӧ на, тӧра...

Кымын кассяна во
Нӧшта верма на олӧмті кевны?..
Тайӧ помасьӧ со.
И ме Енмыслысь выль во на кевма.

Олӧм век пом ни дор.
Кодкӧ кулӧ, а кодкӧ и чужӧ.
Сійӧ некор оз ор,
Енмӧ пуктыны вӧр-ва кӧ кужам.