ЛЁК ВО

«Битӧг сотін, корысьӧ воштін"
(Йӧз кост сёрниысь)

1

Кассяна выль воыс
Висьлӧс морт кодь воис.
Небыд нямӧд кодьӧн
Таво тӧлыс лоис.

Март на сӧмын воӧ,
Йинёньяс нин кузьӧсь.
Кӧтӧм шома нянь моз
Лымйыс быттьӧ шузьӧ.

Тулысӧдзыс сэсся
Прамӧй тӧв эз волы.
Сэтшӧм гажа тӧлыс,
Кыптывлӧ кор лолыд.

2

Нюжаліс зэв кузя,
Кӧдзыдаліс тулыс.
Чужтыны бур пуктас
Сьӧкыд вӧлі мулы.

Тувсов зэрыс киссис
Кӧдзыд шляча сорӧн.
Войвыв муяс гӧрны,
Кӧдзны сетіс сёрӧн.

Гожӧм этша лун жӧ
Вӧлі гажа, шоныд.
Кысь нӧ сэсся верман
Кисьмыны да воны?!

3

Сӧмын баба гожӧм
Воліс жар да мича.
Но и сійӧ менсьым
Сьӧлӧмӧс эз личӧд.

Быттьӧ вӧрӧ воши
Вотчигӧн ме ӧтнам.
Ӧтгудыра лои
Вемӧсын и вӧтын.

4

Енэжыс молясис,
Кымӧрӧн эжсис.
Нывбаба гожӧмыс
Сьӧд арӧн вежсис.

Ӧтава вижӧдіс,
Ойдісны юяс.
Нильзисны-вазисны
Боръяс и муяс.

Мыйсяма поводдя
Кассяна волӧн!
Восӧдмӧн шогӧдӧ
Ывла и олӧм.

5

Быттьӧ вирӧй сувтӧм,
Сьӧлӧмӧй оз уджав...
Еджыд яла ягӧ
Некод нин оз вуджав.

Ойдӧм берег дорын
Дом йылынӧсь пыжъяс.
Мыйла таво олӧм
Торйӧн пиня-гыжъя?..

Водзсасьнысӧ сыкӧд
Некыдзи ог вермы.
Пужйӧдз, лымйӧдзыс мӧй
Оз и дугды зэрны?..

6

Сэсся кынтас
Еджыд пужйӧн.
Локтысь лымйыс
Арӧс чужъяс.

Кыккокйылӧн
Воас тӧлыс.
Сылӧн, майбыр,
Тэрыб вӧлыс.

Кутны сійӧс
Мортыд вынтӧм.
Кӧсъяс, водз воас
Да кынтас.

Лёк во
Помасьлас-ӧ коркӧ?
Гашкӧ, сійӧ
Ставсӧ торкӧ?..