ОВМӦССӦ КЫПӦДӦНЫ

Сернӧсын (Сыктыв уезд) крестьяна ёна пондісны старайтчыны бура овмӧдчӧм кузя.

Неважӧн на кооператив вӧчис мельнича. Изӧ кык изкиӧн. Сӧмын тай Яткаса мастерыс муніс да, мельничаыд мыйкӧ мӧдіс зэв лёк ногӧн дзуртны. Мельникыс ӧні прӧстӧй асланым морт, оз тӧд мельничасьыд нинӧм. Изӧ ӧні мельничаыс зэв этша, дай пызьыс лои зэв гырысь. Кооперативыд эськӧ вӧлі кӧсйӧ судзӧдны Яткаысь мастерсӧ да, мыйкӧ тай век на абу-а. Кооперативлы колӧ тайӧ ӧдйӧнджык кыдзкӧ вӧчны, а то мельничаыд дзик сувтас, бара ковмас мунны частнӧй мельничаӧ.

Васильевскӧй деревняын колян во воссис машинаӧн уджалан тӧварищество. Сэні шленыс 25 морт, на пиын кык комсомолеч.

Мӧйму босьтісны вартан машина, мынтісны 470 шайт. Эм торъя вевттьӧм гумла, вартісны нин таво 1500 пуд кымын. Вартӧны шленъяс кындзи и мукӧд крестьяна, сӧмын донӧн босьтӧны — 5 ур пудысь, — колӧ эськӧ донсӧ чинтыны.

Таво воссис мӧд ӧтув видз-му уджалан тӧварищество (с.-к. кооперат. тӧварищество). Шленъясыс кык деревняысь 27 морт. Босьтісны вартан машина, вӧчисны ыджыд гумла. Правленньӧас бӧрйӧма том йӧзӧс, удж дінас кутчысьӧны зэв зіля.

Ми чайтам, сернӧсса войтыр регыд кутасны овны дзик мӧд ногӧн, уджавны машинаясӧн.

Ми чайтам, сернӧссалы уездса да обласьтса гырысь организацияяс пондасны отсавны выль олӧм лӧсьӧдны.

Сердитов.