ВЫЛЬ НОГӦН ПЫРТЧӦМЪЯС

(Койгорт вӧл. Сыктыв у.)

Гӧль крестьянка-делегатка Ӧксиння Клинцова Койгортын первой петкӧдліс выль ногӧн пыртчӧм. Юнь 14-ӧд лунӧ клубын вӧчис сійӧ медводдза октябрина. Кагаыслы пуктісны ним «Ладимер» (Владимир).

Йӧзыс чукӧрмыліс зэв уна. Вӧчисны докладъяс. Кооператив да вӧлӧсьтын служитысьяс сетісны том гражданинлы козинъяс (пӧдарки).

Крестьяна гӧгӧрвоисны, кутшӧм лёк вермӧ вайны вичкоын кагаӧс пыртӧм. Ӧти вежон на сӧмын коли — и бара лоины октябринаяс. Юнь 23-ӧд лунӧ сійӧ жӧ клубын пыртісны 2 кагаӧс. Ӧтиыс Василей Кокшаровлӧн, мӧдыс Кесарий Турубановлӧн. Кыкнаныс найӧ беспартийнӧй крестьяна. Кагаясыслы пуктісны нимъяс: «Ленир» да «Ладимер» (Владимир).

Тадзи бур йӧз надзӧникӧн эновтӧны шогмытӧм важ вера.

Селькор.