КРЕСТЬЯНА ДОР

3-ӧд союзса съезд вылын кутасны нуӧдны крестьяна йылысь со кутшӧм сёрнияс: 1) крестьяналысь овмӧс кыпӧдӧм, ёнмӧдӧм йылысь, 2) сиктъясын сӧвет удж нуӧдӧм йылысь. Сэсся сэн жӧ, тӧдӧмысь, правительство вӧчас доклад.

Медся ёна кутасны сёрнитны крестьяналы овмӧс кыпӧдӧм вылӧ уджӧн сетӧм йылысь. Сы вылӧ правительство вӧчис зэв нин ыджыд удж: восьталіс учрежденньӧяс да чукӧртіс сьӧм. Таво став сьӧмыс кайӧ сё миллионӧдз. Тайӧ сьӧмыс дерт на эськӧ этша (войнаӧдз вӧлі дас пӧв унджык), да колӧ тӧдны со мый: уджӧн сетан банк восьтӧма вӧлі сӧмын на воӧн-джынйӧн сайын.

Кустаръяс йылысь. Шӧрджык Россия кустаръясӧн тыр. Войнаӧдз нин крестьяна вӧлі миллионӧн кустаритӧны, да-й ӧні сэтчӧ ёна кутчысьӧны. Найӧс колӧ, ӧти-кӧ, вотъясысь кокньӧдны; мӧд-кӧ — колӧ уджйӧзӧн отсавны да лэптыны, бурмӧдны налысь уджсӧ.

Ёна зэв колӧ крестьяналы видз-му лӧсьӧдлӧм. Тӧдӧмысь, правительстволӧн колӧ сэтчӧ отсавны, мед регыдджык мунас сійӧ уджыс. Кӧні видз-му лӧсьӧдлӧм лои нюжӧдӧма, сувтіс видз-му бурмӧдӧм. Сы понда правительстволӧн колӧ тайӧ уджсӧ йӧткыны водзӧ.

Татшӧм уджъяс кындзи, правительстволӧн колӧ видзӧдлыны тшӧтш сиктъясын уджалӧм вылӧ. Колӧ кыскыны крестьянаӧс сӧветъясӧ. Крестьянин кӧ кутас уджавны сӧветын, кутас тӧждысьны крестьяна олӧм йылысь.

Ме чайта, 3-ӧд ставсоюзса съезд важ моз жӧ, кутшӧма позяс, нуӧдас удж крестьяна йылысь.

М. Калинин.