ВОТӦЙ СӦМЫН ТӦДСА ТШАК

Ме ёна радейта вотчынытӧ. Аскӧд пыр фотоаппарат босьтла, медым вӧрса мичлунсӧ снимайтны. Со бӧръя ветлігӧн снимайті мича шляпаа тшакъяс. Воті найӧс ньӧрйысь вӧчӧм чуманӧ. Тшак тыра чумансӧ мичмӧдышті кисьмӧм уроз вотӧсӧн.

Уна сикас тшак сюри Визябӧж сиктса вӧрсялӧм видзьяс вылысь. Менам чуманӧ меститчисны гӧрд да еджыд гобъяс, руд тшак да уртшак, лисички. Шоныд гожӧмнад вель уна петӧма гуткулантшакыс — югыдгӧрд рӧма шапка вылас сярвидзӧны еджыд чутъяс, кокыс еджыд — му бердланьыс кы. Челядьдырсянь тӧдам — сійӧс босьтны оз позь.

Азыма тшак босьталігӧн меным унакодь сюрласис видзвывса еджыд гоб (мӧс гоб), кодъяслӧн шляпаыс абу сэтшӧм сьӧд, кыдзи пожӧма ягын быдмысь еджыд гоблӧн.

Ставӧн, дерт, тӧдӧны гӧрд да еджыд гобтӧ. Но вотчысь аддзылӧ и мукӧд пӧлӧсӧс, коми йӧз найӧс шулӧмаӧсь понтшакӧн. Со ми челядьдырйи эг босьтавлӧй кольквиж рӧмаястӧ — лисичкиястӧ — найӧс верстьӧ шулісны понтшакӧн. Ӧні унаӧн чукӧртӧны найӧс да ошкӧны, зэв чӧскыдӧсь. Сідз и эм! Сійӧ абу номырӧсь, быдмӧ ыджыд чукӧрӧн, ылысянь тыдалӧ — вотчынытӧ весиг любӧ. Быдмӧ сісьмысь кыдз да пипу коръяс костын. Кольквиж шляпа улас уртшаклӧн моз пластинкаяс. Радейтӧ кыдз да пипу расъясысь васӧдінъяс.

Ветлӧй, челядь, вӧрӧ да вотӧй сӧмын тӧдса тшак.