СЫВЙЫШТАМ ШКОЛАНЫМӦС
Ӧшым тӧлысся 10-ӧд лунӧ Одыб сиктса школалы тырис 155 во. Велӧдчанінлӧн историяыс пансьылӧма 1861 воӧ церковно-приходскӧй школасянь. 1972-ӧдсянь — 774 велӧдчыся шӧр школа, сэтчӧдз одыбсалы ковмылӧма ветлӧдлыны гырысь классъясӧ Висерӧ да Шойнатыӧ. Ӧні Одыбын велӧдчӧ 120 челядь. Накӧд мырсьӧ-уджалӧ 20 велӧдысь.
Директоралӧ Любовь Александровна Королёва.
Тшупӧда паса лунӧ школаӧ волісны сэні вӧвлӧм велӧдчысьяс, на лыдын и ме. Ӧттшӧтшъяяскӧд школасӧ помавлі 1975-ӧд воын. Миян классным вӧлі мӧдӧд, коді велӧдчис сиктшӧрса керӧсын кыпӧдӧм выль школаын. Неминуча вӧсна пу стрӧйбаыс джынвыйӧ сотчылӧма, да кирпичысь кыпӧдлӧмаӧсь выльӧс, кык судтааӧс. Сэні велӧдчӧны и ӧні.
Валентина Владимировна Рогова (Михайлова) воӧма Одыбӧ 1970-ӧд воын педучилищеын пионервожатӧйясӧс дасьтан курсъяс помалӧм бӧрын.
Гӧрд галстука том велӧдысьӧс ёна и радейтӧмаӧсь сиктса пионеръясыд.
Бӧрынджык петӧма верӧс сайӧ, КГПИ-ын помалӧма физика да математика юкӧн. Но пионерлӧн водзмӧстчӧмыс ӧнӧдз на ӧзйӧ, сы вӧсна босьтчӧма коравны юбилей вылӧ гӧсьтъясӧс да «лелькуйтны» найӧс.
Школа порог воськовтӧм мысьт пырысьтӧм-пыр и шымыртіс менӧ да Нина Гавриловнаӧс.
Роч кыв да литература велӧдысь Нина Гавриловна Пундикова 1973 воын томӧн на волӧма Одыбӧ. Роч кывйысь ӧтдор уна бурторйӧ на велӧдӧма сиктса челядьӧс. Сідз, сылысь ме велалі дӧрӧм утюжитны, сійӧ жӧ ышӧдіс менӧ радейтны йӧктыны. Ачыс мичаа сьылӧ. Сыктывкарсянь Одыбӧдз кузь туй ӧтлаын вуджигӧн Нина Гавриловна висьтасис, сиктысь мунӧм бӧрын пӧ уджалі юркарса школаясын, бӧръя кызь восӧ — гуманитарно-педагогическӧй колледжын: медводз директорӧс вежысьӧн, сэсся велӧдысьӧн.
Бур уджысь сылы сетӧмаӧсь «Коми Республикаса заслуженнӧй уджалысь» ним...
Ӧта-мӧдыскӧд сьӧлӧмсянь варовитігтыр школа помалысьяс азыма казьтылісны ассьыныс велӧдысьясӧс.
Медводз, дерт, директоръясӧс: Анна Степановна Ларуковаӧс, Мария Селивкиевна Макароваӧс, Николай Вячеславович Ложкинӧс, Лидия Яковлевна Ларуковаӧс, Валентин Фёдорович Михайловӧс.
Вера Ивановна Ларукова школаӧн юрнуӧдӧма 24 во. Менам жӧ медводдза велӧдысьӧн вӧлі Эмилия Васильевна Жижева, коми да роч кывйысь урокъяс нуӧдісны Антонина Петровна да Валентин Владимирович Михайловъяс. Сэсся и налӧн нылыс, Галина Валентиновна Ногтева, водзӧ нуӧдіс налысь уджаланногсӧ. Валентина Вячеславовна Жижева (Сурнина) велӧдіс физика, Александра Ивановна Кузнецова — химия, Антонина Георгиевна Михайлова — роч кыв, Мария Елизаровна Михайлова (Попова) да Зоя Григорьевна Жижева — история, Людмила Андреевна Ложкина — математика, Татьяна Николаевна Ларукова — литература, Лидия Ивановна Васягина (Гущина) — география-биология. Ангелина Михайловна да Александр Васильевич Ладановъяс ылӧдз нимӧдісны Одыбнымӧс лызьӧн котралысьясӧс дасьтӧмӧн.
Нина Гавриловна Пундикова да Нина Михайловна Саморукова (география да биология велӧдысь) важӧн нин эськӧ мунлісны Одыбысь, но сиктын найӧс бура на помнитӧны-казьтылӧны.
Выль технологияяс ӧнія олӧмӧ пырисны да ӧтуввез отсӧгӧн йитчылім Украинаысь Житомир каркӧд. Одыбын компьютер водзын виччысим, кор скайп пыр мыччысяс Житомирас олысь Нина Михайловна. И со сійӧ шыасис. Кыпыда ышловзьӧмӧн вочаасим ӧта-мӧдкӧд. Нина Михайловна быдмылӧма Алтайын, Сыктывкарын помалӧма пединститут (ӧнӧдз на бур кывъясӧн казьтылӧ сэтчӧс велӧдысьяс Борис Николаевич Тюрнинӧс, Николай Александрович Шумиловӧс, Лидия Павловна Крыловаӧс). Институтсӧ помалӧм бӧрын ёртъясыс ылі сиктӧ мунны абу кӧсйӧмаӧсь, а Нина Михайловна шуӧма, ме пӧ комсомолка да, муна, мыйӧн нӧ пӧ мыжаӧсь сиктса челядьыс? И вит во учителялӧма Одыбын.
— Та бӧрын Житомирса 34-ӧд номера роч школаын уджалі география-биология велӧдысьӧн, завучӧн.
Нуӧді чужан му туялысьяслысь кружок, бур уджысь сетлісны медаль, — висьталіс Нина Михайловна Саморукова. — Одыбса школалысь бур опытсӧ вуджӧді и Украинаса школаӧ. Комиын ӧд ми вӧчлім ставсӧ, мый кужим да кӧсйим, мый ёна сьӧлӧм вылас воӧ вӧлі велӧдчысьяслы. Ӧнӧдз шензя, кыдзи ми вермылім кутны киын да велӧдны челядьӧс, кор классын пукалӧ 37 ныв-зон, кор ӧти классын велӧдчӧны квайт Иван Михайлов... Одыбса челядь бур сьӧлӧмаӧсь, рамӧсь да унатор тӧдмавны кӧсйысьяс. Дерт, вӧліны и вильышъяс. Менам паметьысь эз вунны сэтшӧмъясыс. Стёпа Абдулганиев пыр сёрмыліс урок вылӧ. Юала, мыйла? А сійӧ вочавидзӧ: «Лыдди лэбалысь джыджсӧ, сы вӧсна и сёрми». Тадзи детинка сёрмыліс пӧшти быд лун. Либӧ со Коля Габов школаӧ дзонь вежон эз волы. Мекӧд сёрнитігӧн висьталіс: «Воссис вӧралан кад, ветлі ягӧ, кыйи уна пӧтка, сійӧн и эг волы школаӧ». Шензьӧдіс менӧ, кор сы мында лун кольӧм бӧрын математикаысь контрольнӧй уджсӧ «4» вылӧ гижис. Ёна тышкасим челядьлӧн куритчӧмлы паныд. Пыр на син водзын Вася Габов. Ыджыд, ён тушаа зонка. Вежӧра, но дышӧдчӧ велӧдчыны. Ыръянитӧ, а мукӧд зонпосниысь гусьӧн, менам корӧм серти, пыр дӧзьӧритіс школа калидоръясын быдмысь дзоридзьяс бӧрся. Татшӧмыд некор оз вун. Дерт жӧ, и бура велӧдчысь ныв-зонмӧс помнита, унаысь вайӧдлі найӧс Житомирса челядьлы пример пыдди. Тайӧ Анна да Тоня Габоваяс, Надя Подорова, Проня Габов, Вова Михайлов, Коля Попов да унаӧн мукӧд.
Нина Михайловна абу на вунӧдӧма Одыбын уджалігас тӧдмалӧм коми кывъяс: «дыш», «пуксьы, тшай ю», «чеччӧй, нывъяс, сёйӧй шаньга». Овмӧдлӧмаӧсь сэки том велӧдысьясӧс ӧтка мужичӧйлӧн ыджыд керкаса мӧд жырйӧ, джоджын пӧ ковёр пыдди вӧлі вольсалӧма паськыд ош ку.
Муӧдз копыр да ыджыд аттьӧ висьталіс Нина Михайловна сиктса войтырлы, кодъяс ас мортӧс моз сибӧдӧмаӧсь роч нывбабаӧс: «Августын вои сиктӧ. Петі самолётысь, сьӧрысь сё сайӧ килограмм груз — книгаяс. Лэччи сиктса столӧвӧйӧ, кӧні пукаліс гажа юра некымын мужичӧй. Ме дорӧ пырысьтӧм-пыр матыстчис ӧти кӧмтӧм морт, чургӧдіс меным кисӧ да шуӧ-тӧдмасьӧ: «Муслим Магомаев».
И мӧдіс мургыны сылысь сьыланкывъяссӧ. Бӧрынджык тӧдмалі, мый тайӧ вӧлӧма Иван Степанович Габов, сиктса шмонитысьяс пиысь ӧти».
Нина Михайловна Саморуковалӧн бура велӧдӧмыс меным сьӧлӧм вылӧ воис, и олӧмас туй восьтіс — школа да КГПИ помалӧм бӧрын ме тшӧтш лои географ-биологӧн.
Вӧвлӧм велӧдысьяс пырисны нин школалӧн историяӧ, а ӧні Одыбын зільӧны тӧлка да писькӧс войтыр, кызвыннас тайӧ жӧ школасӧ помалысьяс: директоралӧ Любовь Александровна Королёва, суйӧрсайса кывъясӧ велӧдӧны Лариса Ивановна Панкова да Татьяна Васильевна Габова, Ладановъяслысь физкультураӧ челядьӧс сибӧдӧмсӧ водзӧ нуӧдӧ Михаил Николаевич Габов — «Коми войтыр» ӧтмунӧмын водзмӧстчысь.
Сьӧлӧмсянь уджалӧны и мукӧд.
Школаӧ волігӧн меным мойвиис кывзыны информатикаысь восьса урок, нуӧдіс сійӧс Ирина Сергеевна Гостинчикова. А бӧрынджык аддзысьлі-сёрниті гырысьджык велӧдчысьяскӧд. Шензьӧдіс, мый 10-ӧд да 11-ӧд классъясын сӧмын кык детинкаӧн и эм. Нёльнанныс дасьӧсь водзӧ велӧдчыны, кӧсйӧны лоны военнӧйӧн, пусьысьӧн, физкультура велӧдысьӧн, программистӧн. Ме висьталі аслам олӧм-велӧдчӧм йылысь, вӧзйи и налы бура велӧдчыны да зумыда воськовтны верстьӧ олӧмӧ. Эска, найӧ водзӧ нимӧдасны Одыбса радейтана школанымӧс.
Сиктса школаӧс гӧгрӧс пасӧн чолӧмалісны и гӧсьтъяс да велӧдчанін помалысьяс, на лыдын Кӧрткерӧс районса велӧдан управлениеӧн веськӧдлысь Юлия Савина, райсӧветса депутат, «Нившера» видз-му овмӧсӧн юрнуӧдысь Татьяна Ларукова, сиктса администрацияӧн юралысь Нина Изъюрова. Кӧкъямыс чой-вок да 1975-ӧд воӧ школа помалысьяс нимсянь ме сідзжӧ аттьӧалі велӧдысьясӧс, кори водзӧ нуӧдны школалысь бур традицияяссӧ.
Восьса урокъяс да юбилейлы сиӧм линейка бӧрын ставӧн петалім ывлаӧ.
Киӧн-киӧн кутчысьӧмӧн котыртлім «Сывйыштлам школанымӧс» флэш-моб.
Водзӧ вылӧ бур туй тэныд, миян школа!
