КОРЪЯСӦ БОСЬТСЬӦ КРЕСТЬЯНАСЯНЬ ДОХОД НАЛОГ

Унаысь миянсянь крестьяна юасьлӧны: босьтсьӧ оз пӧ крестьяна доходысь налог? Босьтсьӧ кӧ пӧ — мыйысь босьтсьӧ?

Быд доходысь Сӧветса государствоын босьтсьӧ налог — шусьӧ подоходно-поимущественный. Тайӧ налогыс оз босьтсьы крестьянасянь, видз-му уджалӧмысь кӧ воӧ доходыс.

Крестьянасянь босьтсьӧ татшӧм налогыс со коръясӧ:

1) Кор видзӧ патерщикӧс торъя оланінын (помещение); кор сійӧ олӧ ӧтлаын кӧзяевакӧд — сэки налог оз босьтсьы.

2) Кор крестьяна босьтӧны доход кутшӧмкӧ мастерствоысь. Таысь налогыс босьтсьӧ толькӧ сэтшӧм крестьянасянь, кодъяс оз мынтыны сельхозналог. Сельхозналог мынтысьяслысь мастерство доходысь босьтсьӧ налог сӧмын сэки, кор мастерствосяньыс воӧ доходыс унджык видз-му уджалӧмсьыс.

3) Кор крестьяна лӧсьӧдӧмаӧсь кутшӧмкӧ доход ваяна артель аслыныс. Оз босьтсьы налог, кор артельыс лӧсьӧдӧма кооперативногса уджалӧм — кӧзяйство кыпӧдны, видз-му уджавны, мукӧд татшӧм пӧлӧс удж нуӧдны.

Сэсся налог босьтсьӧ деревняясын ас вӧляысь служитысьяслысь (вольная частная практика): докторъяслысь, пельшӧръяслысь, бабкаяслысь, мукӧдлысь. Попъяссянь, тӧргӧвӧйяссянь, вузӧс ньӧбалысьяссянь (скупщики) налог перйыссьӧ. Налы оз сетсьы некутшӧм льгота налогысь, босьтсьӧ ӧткодя каръясын олысьяскӧд.

Крестьяна кӧ артельӧн кутӧны мельнича, налог сэки босьтсьӧ ичӧтджык разрядӧн, кыдзи мастерствоӧн олысьяссянь.

Сэсся босьтсьӧ налог деревняса служащӧйяссянь, кодъяс босьтӧны жалӧванньӧсӧ 75 шайт тӧлысь. Кодъяс босьтӧны таысь этшаджык — налог оз мынтыны. Сідзжӧ оз мынтыны крестьяна доход налог, кор найӧ нажӧвитасны корсюрӧ (случайно) удж костын.