ЗЕЛЕНЕЧЫН

(Сыктыв уезд улын)

Ноябрын 23-ӧд лунӧ Зеленечын вӧлі Вӧлӧсьтса съездлӧн чукӧртчылӧм. Съезд шуис, таво пӧ воис омӧль нянь. Нянь пӧ сӧмын тырмас апрель тӧлысьӧдз. Позьӧ пӧ удж корсьны бокысь, медасьны вӧр лэдзны. Сійӧн пӧ йӧзыс выль няньӧдз вермасны овны.

Зеленечлы колӧ лӧсьӧдавны туйяс да вӧчны ремонт обществоса керкаяслы. Съезд тшӧктіс Исполкомлы тӧдмавны, уна-ӧ ковмас сы вылӧ кер, да мӧд во кежлӧ сійӧс лӧсьӧдны. Сійӧ жӧ лунӧ чукӧртчыліс Волпросветком (сиктса югдӧдан-велӧдан удж нуӧдысь комиссия). Сэні шуисны чукӧртлыны декабрын крестьяна конференцияяс. Медым бурджыка позьӧ нуны йӧзӧс велӧдан-югдӧдан удж, Волпросветком лӧсьӧдавны кӧсйӧ кружокъяс, бӧрйыны сэні уджсӧ нуӧдысьясӧс сизим мортӧс.

Воссьысь лыддьысян керка лои лӧсьӧдны Исполкомӧ, бурджык керкаыс сэсся абу да. Оз тырмыны газетъяс, журналъяс да, нигаяс да.

Сыктывдінкарса коммунист ячейка №8 — Зеленечлӧн шеф — сетіс Зеленечлы югдӧдан удж ёнмӧдӧм вылӧ 50 шайт. Дерт, сійӧ оз на тырмы, лоӧ на ичӧтикаӧн кӧть водзӧ кежлӧ отсавны.

Н. Ч.