ШОЙНАТЫЫН

(Кулӧмдін уезд улын)

Нянь таво воис омӧлик. Нажӧткаяс сорӧн, гашкӧ, кыдзкӧ кыссясны вотӧ. Нажӧткаяс воӧ, босьтӧны шпал лэдзӧмӧн.

Вот мынтӧм.

Сельхозналог да страхӧвӧйысь вот мынтӧны бура, ёна шуасьӧмъяс вот вылӧ он кывлы. Сельхозналог чукӧртӧма нин 70%, страхӧвӧй сӧмын на 10%. Срокӧдз вот мынтасны, ме чайта, ставсӧ.

Кооператив.

Неважӧн шленъяслӧн вӧлі собранньӧ, кӧні шуисны торйӧдны став капиталсьыс вит прӧчент гӧль йӧзлы кооперативӧ пырны отсалӧм вылӧ. Тайӧ лунъясӧ чукӧртчыліс кооперативнӧй кружок. Шуисны тӧдмавны-велӧдны, кыдзи уджавлӧма кооператив войдӧр став му вылас, кыдзи колӧ бурджыка удж нуӧдны ӧні.

Декабр тӧлысьын кутасны нуӧдны йӧзӧс кооперативӧ шленъясӧн пыртан удж, медым лоӧ ӧти шленӧн быд керкаысь. Сэки вежон чӧж кутасны вузасьны донтӧгджык: шленъяслы шыбитасны 7% тӧвар донлысь, мукӧдлы — 3%.

Лыддьысян керкаын удж заводитчӧ. Лэдзӧма ӧти номер газет. Рытъясын овлывлӧ лыддьысьӧмъяс. Воссис Об-во «Долой неграмотность», кытчӧ пырисны морт 35−40. Регыд лӧсьӧдам му-видз уджалан кружок.

Спектакъяс овлывлӧны оз дзик шоча. Йӧзыс спектакъяс вылӧ волӧ ёна. Сӧмын коми пьесаяс абуӧсь, рочтӧ омӧля гӧгӧрвоӧны.

Важ вичко праздникъястӧ йӧзыс ыджыда оз нин тӧдлыны. Попным абу. Зэв лӧсьыд сытӧг.

Неважӧн заводитчис удж пионеръяс пӧвстын. Гижсисны пионерӧ 60 морт, школаын велӧдчысь челядь. Сӧмын оз тӧдны, кыдзиджык колӧ уджавны. Некутшӧм индаланъяс (инструкцияяс) абуӧсь.

Пинь.