ПОМӦСДІНЫН

Исполком.

Исполкомӧ пыран да гӧгӧр видзӧдлан, да сэсся думыштан — абу жӧ, мися, эськӧ тайӧ керкаыд бур да. Ӧшиньяс зэв дӧмасаӧсь, няйтӧсь-бусӧсь, югыдсӧ омӧля нин лэдзӧны. Стенъяс ёна нин сьӧдасьӧмаӧсь (во пытшкад ӧд кӧнкӧ ӧтчыд мыськӧмыс овлӧ).

Кыдзи бара уджалӧны тані-а?

Водзӧ мунан — кык ӧшиня вежӧсын ӧти пызан дорын йӧршитчӧмаӧсь-пукалӧны куимӧн кымын да уджалӧны-гижӧны.

Коркӧ куритчиг дырйи шуӧны:

— Кор бара тайӧ уджыс помасьлас-а?

— Гашкӧ некор да.

— Мыйла?

— Поштаыд кӧ омӧля вайӧ, нарошнӧйясыд тай кыза уджсӧ сюйыштӧны.

— Питор кулыштіс да, онӧ гижыштӧй? — кылӧ тьӧтка локтӧма да шуӧ.

— Кысь нӧ, кор кулі?

— Бадьёль йылысь.

— Бара Бадьёль йылысь?

— Мый нӧ керан, кулі да.

— Мыйӧн нӧ висис?

— Первой тай горшнас лябсис-а, сэсся пыктавны мӧдіс.

— Сідзкӧ нӧ скарлатинаӧн!

— Дерт кӧнкӧ, сійӧн.

Гижӧм бӧрын сэсся шуӧ: «Прӧста ӧд Покров праздниктӧ Бадьёль йывсьыд эг тупкӧй. Тайӧ праздничайтӧмӧн ёна эськӧ висьӧмыд паськалӧ да».

Оз ӧд миян йӧзыд гӧгӧрвоны. Кымыныськӧ пельшӧрыд висьӧмъяс йывсьыд дольліс жӧ нин да, пыдди оз и пуктыны.

— Исполкомъяс, кыдз нӧ мый видз-мусӧ оз сетны миянлы? Весиг мый эм мырддьыны лӧсьӧдчӧны, — локтӧмаӧсь нёльӧн кымын кырнышасаяс.

— Мый нӧ ті, кырнышчи, керсянныд, коді оз сет, коді мырддьӧ?

— Йӧзыс.

— Кыдз нӧ йӧзыс вермас?

— Вермытӧг оз овны, мерайтчӧны да.

— Мерайтчӧны?! Вӧлись кыла да тӧда? Код нӧ тшӧктіс? Исполкомлысь юавтӧг оз жӧ мерайтчыны?

— Вӧчӧны тай, мися.

— Колӧ асьсӧ селисполнительсӧ корлыны да сыкӧд сёрнитны. Зонмӧ йӧз жӧ — секретар кылӧ шыасис.

Гижисны селисполнительлы аски кежлӧ волыны исполкомӧ. Кырнышасаяслы висьталісны — некод пӧ му-видз мырддьыны оз вермы — законыс сэтшӧм абу. Тьӧткаяс нимкодьпырысь муніны, дай гижӧм кабаласӧ пӧпуттьӧ лэччӧдісны.

Муртса удитісны пуксьыны, бара локтіс ӧти дядьӧ, юасьӧ: «Справкаяс тай нӧ колӧ да».

— Кутшӧм справка нӧ, дзик пыр колӧ али оз, — юаліс исполкомса.

— Оз эськӧ да, пыр тай кӧсъя пыравны, да век вунӧ, ӧні дум вылӧ уси да пыри.

— Он сідзкӧ ёна тэрмась.

— Ог, удита на мӧд здук пыравныд.

— Вай, другӧ, мӧд лун инӧсь пырав, со ӧд мыйтӧм колӧ вӧчны (петкӧдлӧ зэв ыджыд чукӧр кабалаяс), ставсӧ наперво колӧ видлавны да ӧдйӧнджык ыстыны срок кежлӧ.

Дядьӧ муніс.

— Вась, вай игнышт-сипты тайӧ ӧдзӧссӧ — уджным эз кут мунны водзӧсӧ, ёна прӧста шӧйтӧны да сэсся прӧста сёрнитӧдӧны, кодлы ковмам — чукӧстас!

— Можно войти? (кодкӧ кылӧ камӧдӧ ӧдзӧсӧ).

— Войдите!

— Вот эти требовательные ведомости нужно заверить.

Зэв ыджыд стопа гижӧдъяс вайӧма таксатор. Бара сэсся та вылын бура дыр лои пукавны да гижны.

— Ӧльӧксан Павлович, кыдз нӧ пессьыд? Ньӧтик ӧд школа дорын абу?

— Чӧвлы, кырымасяла да вӧлись. Пестӧ ӧд аддзам на жӧ, школатӧ ломтытӧг ог на кольӧ.

Кодкӧ кылӧ бара нин председательӧс юалӧ.

— Списокъяс вайи вотъяссьыд да бланокъяс — окладнӧй листъяс. Ковмас талунсянь пуксьыны та бердӧ, мед регыдджык эштас, — шуӧ налогӧвӧй фининспектор. — Тайӧн бура дыр на лоӧ ноксьыштны. Кымынӧд разрядӧ нӧ миянлысь вӧлӧсьтсӧ лӧсьӧдӧмаӧсь?

— Пятойӧ.

— Зэв тай нӧ вылӧ?

— То тай постановленньӧыс уисполкомыдлӧн.

— Сэсся нӧ кор ковмас перйыны?

— Войдӧр лӧсьӧдны колӧ, мыйтӧм кодлы мынтыныс, сэсся ӧд срокъясыс индалӧма тані.

Тадзи пӧшти быд лун удж мунӧ исполкомын. Вылісянь тшӧктӧм уджыд ёна оз сулав. Ӧні кежлӧ лӧсьыдакодь на мунӧ уджыс, сӧмын тай ас оланінсӧ озджык пелькӧд-а. Сэсся ас вӧлӧсьт кост уджас озджык жӧ вермы кутчысьныс. Унатор ӧд колӧ вӧчны: Земельнӧй комиссияад заявленньӧтӧ видлавны — бура уна нин чукӧрмӧма, комитет взаимопомощыдлысь уджсӧ кыпӧдны. Изба-читальнятӧ лӧсьӧдны — гожӧмнад да арнад крестьянаыдлӧн уджыс зэв уна да, сійӧн кӧнкӧ вӧлӧсьтса уджыд эзджык мун-а. Ӧні тӧвнад босьтчас.

Ператив.

— Педьӧ, кытчӧ нӧ ветлін?

— Перативӧ.

— Мый нӧ сэн бурыс?

— Ог куж висьтавныс, лавкаас тай наперво нинӧм сэтшӧм бурторйыс абу-а. Пырав ачыд да видзӧдлы, гашкӧ, аддзан.

— Мый аддзан?

— Тэныд коланторсӧ.

— Пыравны, буракӧ, лоӧ видзӧдлыны.

Стойка сайын джаджъяс тыртӧмкодьӧсь. Кымынкӧ чашка нисьӧ тшайник сулалӧ, нёль‐ӧ‐вит пома; бумазея, ситеч, роч дӧра-полотно — бура нин джынъялӧма куйлӧ. Лӧсьыда чукӧрын дас кымын гоз носки ньӧбасьысьсӧ виччысьӧны. Кымынкӧ кольк томан йӧжгыльтчӧмаӧсь джадж пельӧсӧ. Мукӧдлаын тыдалӧ кӧрӧбкаяс, дерт кӧнкӧ сэн кизь-кручки да кнопкаяс. Краска дозъяс сулалӧны, ог тӧд, тыра‐ӧ‐тыртӧм. Кымынкӧ чер, ассьыныс тышнысӧ бувгӧдӧмаӧсь.

Пач костӧ йӧзсьыс дзебсьӧмаӧсь чугунъяс. Ёна карасин дук нырад парскӧ, буракӧ, эм жӧ. Тыдалӧ бӧчкаын кослунъя вый. Медвылыс джаджъяс кык-куим ящик клянича бока — пытшкӧссьыс нинӧм оз тыдав, дерт кӧнкӧ тыртӧмӧсь. Тув йылӧ ӧшлӧма тугъя вӧньяс, шнурокъяс, лакӧвӧй тасмаяс. Ӧдзӧс дорын бӧчкаын сов. Колӧкӧ сэсся унатор на эм да. Лавкаас тай оз тыдав-а. Тӧвар серти кӧ артавны, позьӧ шуны — омӧлякодь уджалӧ. Йӧзыс эськӧ сійӧ жӧ кайтӧны да. Ӧні тай мельнича вӧчӧны да сы вылӧ надейтчӧны-а. Бура уна жӧ ӧд мельничаыд няркнитас сьӧмтӧ. Ме ногӧн кӧ, дась вӧчигас жӧ колӧ паськӧдны мельничатӧ. Кык изкитӧ сувтӧдан да, кытчӧкӧ нянь мешӧкъястӧ ковмас сувтӧдны — дай йӧзыслы овны виччысигас. Сэсся, буракӧ, мӧвпалӧны тоян лӧсьӧдны дай.

Прамӧя кӧ шуны, перативыд оз на ёна уджав.

— Тӧварыд нӧ мыйла зэв этша?

— Мыйла деньгаыс этша.

— Мыйла нӧ сьӧмыс этша?

— Мыйла шленыс этша.

— Мыйла шленыс этша?

— Мыйла уджсӧ прамӧя оз нуӧдны.

Колӧ перативса юралысьяслы босьтчыны кыпӧдны уджсӧ, мед йӧзыд гузьгыны кутас, мед ӧтик перативӧс тӧдӧны. Кужны кӧ кутам тӧвартӧ вайны да пӧраӧ — уджыд, майбыр, мунны кутас.

Епӧ.