СПАСПОРУБЫН

Волисполкомыс эськӧ уджалӧ лёка-бура, сӧмын шленъясыс мыйкӧ оз жӧ зэв тӧждысьны удж вӧснаыс. Частӧкодь гортаныс ветлывлӧны гӧститыштны. Кор недель гӧститасны, кор унджык, сэккоста Исполкомыд тшӧтш шойччыштас — оз уджав.

Юралысьыс Исполкомсьыс пондіс нажӧвитчыны: пес пилитӧ Исполкомыслы — 95 кӧпейкаӧн сыв. Крестьянаыс эськӧ шуӧны вӧлі — пилитам пӧ, колӧкӧ, пӧлтинникӧн сыв, да эз сет, ачыс пилитӧ. Стӧрӧжыс зэв ёна висьӧ лудӧмӧн: кок увсяньыс юрӧдзыс тырӧма, весиг пырныс Исполкомас он зэв лысьт — полан вуджӧмысь.

Йӧзӧс югдӧдан удж Исполком ньӧтик нинӧм оз вӧч.

Оз жӧ, тыдалӧ, думыштны пӧжаръяс йылысь: машинаыс эськӧ эм, да абу дзоньвидза. Аддзывлан мукӧддырйи — ыпъялӧ вель ёна трубаясӧд мукӧд керкасьыс. Сотчыны тай оз на ещӧ ёна сотчавны — шудаӧсь Спаспорубсаяс — оз и тай и ков пӧжарнӧй машина.

Йӧзӧс югдӧдан удж омӧлика жӧ мунӧ. 709 керка вылӧ эм кык школа; ӧтикас сӧмын 7 морт и волӧ. Школа бердас эм нардом дай библиотека. Шочиника том йӧз чукӧр да кодсюрӧ крестьяна пытшсьыс вӧчлӧны спектакъяс.

Том йӧз чукӧрын 3 шлен да 4 кандидат эм. Мыйкӧ оз жӧ вермыны бурасӧ уджавныс. Тыдалӧ, удж нуӧдысьыс слаб.

ЕПО эм; вузасьӧ вель ёна. Барышъяс йылысь оз кывсьы. Эм кӧ, кытчӧ инасьӧ, огӧ тӧдӧй. Колан тӧвар эм, сӧмын донъясыс гырысьӧсь. Тулыснас абу вевъялӧмаӧсь ньӧбныс тӧварсӧ, ӧні сэсся вӧлӧн лоӧ кыскавны — доныд и лыбӧ. ЕПО кындзи вузасьысь абу, огӧ кӧ лыдӧ пуктӧй кык-куим посньыдик спекулянтӧс.

Регыд олысь.