НЫВБАБА КОСТЫН

Кулӧмдін карулын

Эжва вылад тай нывбабаясыд абу жӧ зэв ёна кольччӧмаӧсь Емваса дорса нывбабаяссьыд. Женотделыскӧд тӧдсаӧсь жӧ. Уджыс заводитчӧма.

Ставыс нывбабаыс Кулӧмдін кар улас 26095 морт лыддьысьӧ. Делегаткаяс эмӧсь — 219 морт. Собранньӧяс вылӧ волывлӧны лёка бура. Кывзӧны-сёрнитӧны быдтор йылысь, олӧмысь оз кольччыны. Бӧръя пӧраас ёна пондісны агроном сёрнияс кывзыны. Ветлӧны видзӧдны, кыдзи уджалӧны выль ногӧн, агроном велӧдӧм серти, школьнӧй опытнӧй участок вылын. Шуӧны, локтан во пӧ асьным тадзи пондам вӧчны.

Делегаткаяс пытшкысь 7 морт уджалӧны Исполкомъясын, 2 — Комитет взаимопомощиын, 8 — кооперативъясын, Нарсудын — 38 морт заседателялӧ. Сэсся 10 делегатка уджалӧ йӧзӧс югдӧдан учрежденньӧясын.

Гожӧм кежлас, Женотделкӧд тшӧтш, делегаткаяс сьӧм чукӧртӧмаӧсь челядьлы ясли восьтыны.

Делегаткаяс кындзи, мукӧд бабаяс собранньӧяс вылӧ тшӧтш волывлӧны. Женотделыд нывбабаяслы, мыйӧн вермӧ, отсасьӧ жӧ. Могъясыс бабаяслӧн сэтшӧм жӧ — юксьӧм да, челядь вердӧм вылӧ батьсянь сьӧм перйӧм да, мый да. Бӧръя кык тӧлысьнас морт кызь кымын Женотделӧ заявленньӧяс сетӧмаӧсь — ставсӧ ыстӧма кытчӧ колӧ, висьталӧма, кыдзи-мый колӧ вӧчны.

Мед жӧ уджаласны делегаткаяс Женотделкӧд! Мед став 26 сюрс нывбабасӧ кыпӧдасны, югдӧдасны, мортӧ воштасны!

Эжваса нывбабаяс! 26 сюрссьыд ӧд 219 делегаткаыд да на пытшкысь 65 уджалысьыд зэв на этша! Кыдз ті та йылысь думайтад? Гижыштанныд кӧ эськӧ кодсюрӧ, кыдзи чайтад водзӧ вылӧ ассьыныд олӧмъястӧ лӧсьӧдны — зэв бур лоӧ.

Коми аньястӧ радейтысь.