ВЕЖӦРТӦМ1сулала ю дорын, видзӧда ваын шпольӧдчысь ёсъясӧс. эзысьӧн югъялан сьӧмныс гажӧдӧ синмӧс, но вежӧрӧй тыртӧм. джуджыд мӧвпъясыс кытшовтӧны менӧ ылысянь, быттьӧ ме кутшӧмкӧ полӧкалӧ, кодлӧн могыс — ки шевкнитӧмӧн сулавны тӧв йылын да видзӧдны водзлань и нинӧм йылысь не мӧвпавны, дай мӧвпавнысӧ сылы некыдз — вежӧрыс абу. менсьым вежӧрӧс кокалӧмаӧсь ракаяс — ӧні найӧ дізьвидзӧны кутшӧмкӧ пу вылын да кравзӧны кывбуръяс. а ме сулала ю дорын, но сылӧн зарниасьысь гыыс оз нин козьнав мӧвпсӧ меным воддза моз. артала выльӧн шедӧм чери вылысь эзысьӧн югъялан сьӧмсӧ. тайӧ меным войт радлун оз сет, но кӧть нин вежӧрӧй уджалӧ.2шондіыс войталӧ юр вылам пӧсь мӧс выйӧн. вежӧрӧй сылӧ да лоӧ сӧчӧн кодь вӧсниӧн. ӧшӧда сійӧс пу вож йылӧ: татшӧм жарас сыысь тӧлкыс абу. серпасыс дзик быттьӧ Сальвадор Далилӧн. вежӧрӧй — сылӧм кӧрт часі. но сійӧ оз петкӧдлы кадсӧ. стрелкасӧ нетшкӧма катша.
