ЭЖВАВЫВСА БИЯС

Эжва вылын югзялӧны бияс,
Эзысь рӧмӧн вералӧ ю выв,
Небыдика валъялӧны гыяс,
Гӧгӧр чӧв-лӧнь, некоді оз кыв.

Быттьӧ вичкопытшса вежа бияс,
Нюжӧдчӧны Енлань — сійӧ эм,
Кыдзи йӧзыс кыпӧдӧны кияс,
Сетас мед бур шуд да кузьджык нэм.

Сэтшӧм кокни лои сьӧлӧм вылын,
Юрысь петі-быри шогсьӧм-тӧжд.
Тайӧ бияс пытшкас быттьӧ сылі...
Наын эськӧ овны олӧм чӧж!

Эжва вылын югзялӧны бияс,
Вежалунӧн ӧвтӧ гӧгӧрбок...
Сьӧлӧмӧй кӧ вӧяс гажтӧм пиас,
Кыдз нӧ бара татчӧ ме ог лок?