КЫДЗИ ОЛӦНЫ АЙКИНА ВӦЛӦСЬТЫН

Поп-дяктӧг.

Крестьяна кутчысьӧны ӧні выль ног овны. Важӧн кӧ вӧлі гозъясясны венчайтчытӧг, нэм чӧжныс найӧс лыддясны другӧн да пӧдругаӧн. Ӧні эз пондыны сідзи видзӧдны. Вӧлӧсьт улын эмӧсь нин венечтӧг, поп-дяк гӧгрӧдлытӧг олысьяс, олӧны зэв лӧсьыда.

Кутчысьӧны велӧдчыны.

Вомынса (Айкина вӧлӧсьтын) крестьяна корӧны школа восьтыны. Ас вылысь кӧсйысьӧны ломтыны школасӧ. Челядьлы ӧні лоӧ вӧлі котравны быд лун Айкинаӧдз нёль верст сайӧ. Уна крестьяна асланыс гӧльлун понда челядьӧс эз велӧдны. Ас сиктад кӧ лоӧ школаыд, сэки омӧльджык кӧмкот-паськӧмӧн позяс петавлыныд.

Кӧдзаяс.

Таво ӧзимъяс, кузя зэрӧм понда, омӧликӧсь. Ид кӧдзаяс ёна тшыксялӧмаӧсь. Колӧ эськӧ видлалыштны экспертнӧй комиссиялы.

Коді нӧ дӧзьӧритысьыс?

Шожымын эм государство кипод улӧ босьтӧм (муниципализированные) кык керка. Коймӧд — важ школа. Школасьыс гусявлӧмаӧсь нин унатор. Ӧшинь стеклӧясыс нин абуӧсь. Дӧзьӧритысь кӧ оз ло, мукӧд керкаясыскӧд вӧчасны школаыс моз жӧ.

Колӧ школасӧ сетны Нардом улӧ, мукӧд керкаясас лэдзны гӧль крестьянаӧс, кодъяслӧн абу асланыс керкаясныс.