КУЖИН КӦ БОСЬТНЫ БАНКЫСЬ СЬӦМ, КОЛӦ КУЖНЫ ЛӦСЬӦДАВНЫ ВИДЗ-МУ УДЖАЛАН КӦЛУЙЯС ДА СРОК КЕЖЛӦ УДЖЙӦЗТӦ МЫНТЫНЫ

Матысмыны кутісны банкӧ уджйӧз мынтан срокъяс. Быдӧнлы, код босьтӧма банкысь сьӧм, колӧ ӧні жӧ думыштны та йылысь, мед эськӧ банкыд вермис удждыны мукӧдлы. Уджа войтырлы оз ков вунӧдны — онӧ кӧ кутӧ срок кежлӧ мынтысявны, банкыд вермас бӧр мырддьыны ньӧбӧм кӧлуйяссӧ да мукӧдтор овмӧс пытшкысь, пеня содтӧмӧн. Сьӧмсӧ босьттӧдзыс та йылысь колӧ ёна мӧвпыштны, мед эськӧ мырдӧн перйытӧг, судтӧг, срокъяс кежлӧ верминныд мынтынытӧ, мед эськӧ мырдӧн перйӧмнад да пеняяснад овмӧсныд оз торксьы.

Банкын уджа йӧзӧс оз вунӧдны, видзӧдӧны гижӧдъяс вылӧ чорыда, некутшӧм нюжйӧдлӧм оз пондыны лэдзны. Срок кежлӧ мынтысьтӧмъястӧ пондасны законъяс серти пырысь-пыр жӧ кыскыны судӧ. Та йылысь оз ков некодлы вунӧдны, оз ков виччысьны корӧм.

Миян Республика войнаяс бӧрад да тшыгъялӧм бӧрад эз на вермы дзикӧдз сӧвъявмынысӧ, быдлаӧ на колӧ уна сьӧм сюйны, мед эськӧ ставсӧ вӧлі лӧсьӧдӧма бура, крепыда. Кӧрт туйясыд да пабрик-заводъясыд ыджыд отсӧг на корӧны государствоыдлысь. Сы понда банк оз вермы уджйӧзъяс кольны перйытӧг.

Коркӧ воас, дерт, сэтшӧм пӧра, ставсӧ государство лӧсьӧдалас, пабрик-заводъяс сувтӧдалас кок йылӧ, сэки Сӧветскӧй власьт вермас крестьянаыдлы отсавны уджйӧз перйытӧг, прӧстӧ. Татшӧм пӧра вотӧдз крестьяналы колӧ быд ногӧн водзмӧстчыны уджалӧмӧн, велӧдчӧмӧн да отсавны асланым власьтлы ӧдйӧнджык сӧвъявмыныс.

К-в.