ТЭРМАСЬӦЙ НЬӦБНЫ ВОАНА УДЖДЫСЬӦМ БИЛЕТ
Воана удждысьӧм билет (
Воана удждысьӧм билет ньӧбӧмысь ньӧбысьыслы зэв ыджыд бур. Кодлӧн эм лишнӧй сьӧм, энӧ куйлӧдӧй сійӧс гортад. Ньӧбӧй билет. Шуам кӧть, тэнад билет вылӧ воана пудйыс оз усь, да ассьыс, куш билетсьыс гӧль крестьянинлы ыджыд бур. Арнад пондасны вот перйыны. Крестьянинлӧн сьӧм абу мынтыны, босьтны друг сійӧс некысь. Дзик мат. Майшасян-ветлӧдлан. Билеттӧ кӧ водзвыв лӧсьӧдан, вотыд зэв кокниа мынас. Билет ньӧбӧмсӧ позьӧ лӧсьӧдны сідзи, медым вештыны сійӧс позис ичӧтикаӧн, эз ӧтпырйӧ. Гӧль крестьяналы либӧ дӧва бабаяслы зэв ыджыд кокньӧд сійӧ. Тадзи ньӧбасьӧм позьӧ лӧсьӧдны асланыд кооперативъяс пыр. Кооператив судзӧдас тэнад ним вылӧ билеттӧ, тэ билета лоан. Ар кежлад дась. Сэсся кооперативыдлы гожӧмбыдӧн ньӧжйӧникӧн мынтан нин: кор 20 ур, кор 10 ур, кор четвертак.
Билет ньӧбны колӧ ӧні жӧ; ӧні доныс сылӧн ичӧт на, сэсся вермас донсявны, содны. Медвойдӧр ӧти шайта билет вузалісны 85 урӧн, ӧні 87 урӧн нин — 2 ур содӧма. Недыр мысти ещӧ дона лоӧ, сы бӧрын ещӧ донсялас... бӧрынджык ӧти шайта билетысь шайт и ковмас мынтыны. Шайтнас кӧ мынтан, немтор на — шайтысь дона вермас лоны. Судзсяна войтыр донтӧм донсьыд ньӧбасны билетъяссӧ чукӧрӧн, сэсся мӧдысь, йӧрмӧм гӧль мортыдлы ыджыд донысь кульыштасны-вузаласны. Энӧ узьӧй, гӧль крестьянин да крестьянка, тэрмасьӧй судзӧдны билеттӧ ӧні жӧ, донтӧм каднас!
Тіян тэрмасьтӧм вылӧ, нюжӧдчӧм вылӧ кодъяскӧ радлӧны, нимкодясьӧмӧн кияссӧ ниртӧны. Видзчысьӧй наысь!
Тэрмасьны билет ньӧбӧмӧн колӧ нӧшта мӧдтор вӧсна. Сентябр медводдза лунӧ да декабр 15-ӧд лунӧ лоӧны пудъясьӧмъяс (розыгрыш).
Быд пудъясиг 22.160 воӧм 250.000 шайт дон. Сідзкӧ выль воӧдз кыкысьнад воасны 44.320 морт. Он тӧд, гашкӧ, тэ, гӧль морт, шуда, тэнад билет вылӧ воана пудыс усьӧ. Нелямын нёль сюрс морт пиад быдторйыс вермас лоны. Воан кӧ — эмбуртӧ, овмӧстӧ бурджыкӧс верман лӧсьӧдны, аслыд кокньыдджык лоӧ овны. Сёян-юаныд, паськӧмыд бурджыкӧсь лоӧны.
Медся ёна Воана удждысьӧм билеттӧ ньӧбӧм йылысь колӧ думайтны, чорыда мӧвпавны судзсьытӧма олысь, гӧль крестьяналы. Налы воттӧ мынтыны сьӧкыдджык, найӧ ӧтпырйӧ чукӧртны сьӧм оз вермыны, налы медся ёна колӧ отсӧг бурмӧдны, ыдждӧдны, паськӧдны ассьыныс лёк-омӧлик овмӧссӧ.
Кывзӧй жӧ, крестьянин да крестьянка! Тэрмасьӧй ньӧбны Воана удждысьӧм ӧні, донтӧм каднас. Висьталӧй, коді тӧдад, та йылысь мӧда-мӧдыдлы.
Велӧдчӧм йӧз, лыддьӧй та йылысь велӧдчытӧмъяслы, отсалӧй бур кывнад да кужӧмнад судзӧдны налы билетъяс.
А.
