ӦШИНЬ ДОРЫН

Зэрасьӧ. Коръяс усьӧны.
Ме восьса синмӧн узя на.
Ӧшиньсянь арся пӧраын
ӧвтыштас ыркыд тӧвруӧн.

Тӧвруӧн унмӧс лэбӧдас.
Ныр помӧй кынмас, кельдӧдас.
Ӧні кӧ эськӧ сывъялін
сэтшӧма жӧ, кор нылавлі!

Нылавлі недыр. Ылалі.
Коръяс моз шудӧй гылаліс.
Верӧс сайын кӧть, ӧтнам пыр.
Синваӧй матын... Тырмас дыр.

Дыр тырмас медым эбӧсӧй,
видзӧдлывла Ен пельӧсӧ...
Водз асыв. Керка узьӧ на.
Зэрасьӧ. Коръяс усьӧны.