ЮГЫД ТУЙ

Важӧн унатор эз тӧдлы
Коми мортлӧн юр — 
Сэки некыдз вӧлі тӧдны,
Мый нин кывсьӧ бур.
Эз и тӧдлы газет йылысь
Миян коми сикт,
Сӧмын ӧти-мӧдлы ылысь
Воліс «Биржевик».
Сідзи овны пемыд вӧрын
Кузя лои, збыль...
Революцияяс бӧрын
Олӧм пуксис выль.
Вит во сайын тані чужис
Газет «Югыд туй»,
Квайтӧд вылӧ нин со вуджис — 
Восьтӧ олан туй.
Сійӧ велӧдӧ, кыдз овны,
Кыдзи бур да шань;
Кыдзи крестьяналы овны — 
Кӧдзны-гӧрны нянь.
Коми йӧзлы ӧні позьӧ
Тӧдны газет пыр:
Саръяс костын бара косьӧ
Кодкӧ оз-ӧ пыр;
Оз-ӧ кӧсйы Пуанкаре
Петкӧдлыны «страсьт»;
Мый нин вӧчӧ Москва карын
Миян Сӧвет власьт;
Тӧдам: кор и кутшӧм нота
Ыстӧ лёк Керзон...
Кутшӧм Отдел мыйӧн «чотӧ» — 
Овлӧ фельетон.
Сы пыр сідзжӧ тӧдам: кӧні
Попыс медся горш...
Кыдзи мӧдлаын ли сэні
Олӧ молодёжь.
Мукӧддырйи «Югыд туйын»
Овлӧ коми стик;
Овлӧ статья: «Чукля туйӧд
Мунӧ меньшевик...»
Овлӧ: «Поёлын пӧ петӧ
Медъён самӧкур»...
Газет вит во чӧжӧн сетіс
Вывті уна бур.
Петіс квайтӧд арӧс вылӧ.
Лыддьысь содӧ век.
Сиам водзӧ овны сылы — 
Бурӧс вӧчны сэк!