ПАВКӦДЧЫСЬЯС

Вӧлӧсьтъясын позьӧ эськӧ уна вӧчавны бурторъяс. Олысьяслы эськӧ лӧсьыдджык, кокниджык вӧлі овнытӧ. Но эмӧсь «павкӧдчысьяс». Быдторйысь найӧ йӧзтӧ павкӧдӧны, сэсся пыр нинӧм оз и артмыв. Пыр йӧзыд кыссьӧны бӧрын, пыр олӧны важ моз, кыдзи дедъяс, важ пӧльяс овлӧмаӧсь.

Выльгорт вӧлӧсьтын медся сэтшӧм павкӧдчысьяс: Ивӧ Ӧлексан, Васька Кӧсьта, Пӧлик Иван, Митьӧ Мишка. Воддза куимыс нинӧм эськӧ оз и тӧдны, а пыр лыддьӧны асьнысӧ сюсьӧн да тӧдысьӧн. Гӧгӧрвотӧм йӧзыд и веритӧны. Нёльӧдыс эськӧ этша тӧдӧ, лыддьывлӧ пӧ уна нигаяс, но буракӧ нарошнӧ мыйлакӧ павкӧдчӧ. Кытчӧдз найӧ оз дугдыны павкӧдчӧмысь, некутшӧм буртор вӧлӧсьтын оз ло.

Ӧні, неважӧн, Выльгортын вӧлі скод — восьтыны «Комитет Взаимопомощи». Тайӧ эськӧ зэв нин буртор, вензьыны, ме ногӧн, нинӧмысь нин, — он ӧд тӧд, гашкӧ, ӧні жӧ тэнӧ суас кутшӧмкӧ ыджыд нужа, отсӧгыд ковмас. Но Ивӧ Ӧлексанъясыд, другъясыскӧд, бара на скод вылад ёна павкӧдчисны: «Нинӧмла пӧ восьтыны „взаимопомощитӧ“, пӧльзаыс пӧ зэв ичӧт, сӧмын пӧ став чукӧртӧм деньгасӧ да мукӧдторсӧ кытчӧсюрӧ тратитасны». Асьныс ӧд найӧ ещӧ судзсяна йӧз. Буракӧ налы зэв нин жаль пуктыштныд шайт-мӧд деньгатӧ либӧ тув-мӧд няньтортӧ.

Скодыд сэсся шуис тӧлкуйтны та йылысь деревенскӧй (десята) скодъяс вылын; мыйкӧ вӧчасны ли оз ли, ме ог тӧд.

Скодуйтысь.