«ГАЖА ЛУН»

Тури-тари, гури-гари,
Пемыд йӧзлы воис бара
Гажа Ыджыд лун. (2-ысь)
Поп-дяк ноксьӧ, вуні шогсьӧм;
Асывводзсянь вичко дорсянь
Жыннян бовгӧ: «брун!..» (2)
Вой шӧр бӧрын, вичко шӧрын,
Сьӧд йӧз шӧрын кыптіс вӧрӧм,
Быттьӧ ыджыд кось. (2)
Сиська биӧн йӧзыд жуӧ,
Поплы дякӧн кылӧ шуӧ:
«Двери-ӧдзӧс восьт!..» (2)
Вӧлтар дорын, кырлӧс дорын
Кылӧ «хорӧн» сьылӧм гора:
«Кристос пӧ воскрес». (2)
Сьывсьӧм бӧрын, водзӧн-бӧрӧн,
Йӧз бӧр петӧ вичко шӧрысь,
Кыссьӧ быттьӧ гез. (2)
Недыр мысти локтӧ кылӧ,
Кильчӧ вылын «паска» сьылӧ
Сыла бана поп. (2)
Пемыд йӧзыд кывзӧ сӧрӧм,
Поплы сӧвтӧ, мыйта тӧрӧ,
Пирӧг-шаньга — шнёп! (2)
Мудзтӧм кокъяс — дякъяс-попъяс
Чукӧртасны гырысь нопъяс,
Медся уна нянь. (2)
Лун-лун батько крестӧн ӧвтӧ,
Жыннян юргӧ, сідзи-й лӧвтӧ:
«Биринь-бурунь-брань!
Сёям на дась нянь!»