ДУГДӦЙ ДУРНЫ!

Уна деревняын том йӧз зэв гажтӧма олӧны: праздник, весьлун, ыджыд зык да кось. Аслыныс сэки зэв гажа кажитчӧ. Лэбалӧны веськыда. Быдӧн водзмӧстчӧны, быдӧнлы колӧ асьсӧ петкӧдлыны: «Со пӧ ӧд ме кутшӧм морт — кыкӧс нӧйті», а мукӧдыс ошйысьӧны: «Менӧ ёна-й нӧйтісны. Нинӧм. Бурдас». Уна сэтшӧмторсӧ.

Аскинас видзӧдан, да ӧти кӧртасьӧма да тӧрӧкан моз рувъялӧ, мӧд гортас ружтӧ, коймӧдӧс больничаӧ кыскӧны. Ставыслӧн кыткӧ жугалӧма — кодлӧн юрыс, кодлӧн киыс, кодлӧн кокыс.

Сэтшӧмыс кокньыда на мынӧма, а кымынлысь ловсӧ босьтасны, олігкості, том вылысь?

Том йӧзыдлы эськӧ, дерт нин, сюрӧ, да ӧд и гырысь йӧзыслы тшӧтш абу лӧсьыд. Рытнас, кӧть кутшӧма колӧ керкасьыд петнытӧ — он лысьт; сійӧ мый на, а ӧд косяс кыссьӧны тшӧтш гырысь йӧз. Сэсся лӧгалӧны мӧда-мӧд вылас.

Со мыйтӧм лёкыс косясьӧмас; некод, ме чайта, оз шу, косясьӧмыс пӧ бур. Быдӧн шуасны: «дерт, омӧль».

Шунытӧ шуасны, а вӧчныс некод абу. Мый колӧ вӧчны?

Вӧчтӧдзыс колӧ корсьны, мыйысь лыбӧ косьыс.

Ме ногӧн, медся ёнасӧ кык торйысь: самӧкурысь да тӧдтӧмысь.

Быд праздник видзӧдан, да быдлаын тшынасьӧны — самӧкур пуӧны. Эм тай няньыд сэтчӧ, а юалан кӧ — эм-ӧ-абу кытӧнкӧ лыддьысян, гажӧдчанін — Народнӧй дом, клуб, библиотека, — сійӧс некод оз тӧд. Сы вылӧ нянь абу. Шуан кӧ сы йылысь, веськыда кос пуӧ кутасны кайны. Том йӧзлы рытсӧ коллявны, пальӧдчыны, гажӧдчыны некӧн.

Сідзкӧ, мый колӧ вӧчны?

Колӧ самӧкурысь дугдыны да клубъяс, народнӧй домъяс, лыддьысянінъяс лӧсьӧдны. Вӧчны сэтӧні спектакъяс, лекцияяс, лыддьысьӧмъяс.

Союз молодёжьлы колӧ кутчысьны татчӧ, нырсӧ нуӧдны сійӧ вӧчигӧн. Кыскыны сэтчӧ став том йӧзсӧ. Гырысь йӧзыслы колӧ отсавны мый верманныд. Сэки толькӧ бырӧ кось и уна мукӧд мисьтӧм омӧльтор.

Кутчысьӧ сэтчӧ ставныд, том и гырысь!

Ставныдлӧн ӧтвылысь сійӧ бурторйыс зэв кокньыда артмас.

А. Нестеров