ЧИПСАН

Оліс-выліс пышкай, сылӧн вӧлі ёрт — суслик. Ӧтчыд пышкайлы сюри чипсан да кутіс сійӧ шутьлявны ӧтарӧ-мӧдарӧ лун и вой.

— Эй! Пышкай ёрт, вай меным чипсантӧ, ме сэсся шутьлялышта, — корис суслик.

— Ог сет, менам чипсаныс, — вочавидзис пышкай да ёнджыка на кутіс шутьлявны.

Забеднӧ лои сусликлы, пырис аслас позйӧ, бӧрдӧ. Батьыс и юалӧ:

— Мый нӧ эськӧ бӧрдан?

— Пышкай меным чипсансӧ эз сет ворсыштны-шутьлялыштны.

— А мыйла тэд чипсаныс, аслад пинь костад тай эм, сӧмын пинь пырыд пӧльышт.

Пӧльыштіс суслик пинь пырыс, да збыль вӧлӧма, сэтшӧма шутёвтіс, кӧть пельтӧ сирав. Котӧртіс суслик пышкай дінӧ да горӧдіс:

— Эй, пышкай, менам эм жӧ шутьлялысь чипсаныс!

— Кӧн?

— Пинь костын, — и сідзи шутёвтіс, мый пышкай лэбзис медджуджыд коз пу вылӧ, а сэсянь и шуӧ:

— Кӧсъян, ме тэд ассьым чипсанӧс сета.

— Оз ков.

Сэсся пышкай мый вынсьыс кӧсйис шутёвтны, да эз артмы сылӧн, муртсук чипӧстіс сӧмын.