НӦШТА ӦТЧЫД ШУАМ


Пӧшти быд газетын ми чуксалам: “ЭНОВТӦЙ САМӦКУР ВӦЧӦМ ДА СУР ПУӦМ! ОТСАЛӦЙ ТШЫГЪЯЛЫСЬ УДЖАЛЫСЬ ЙӦЗЛЫ!”

Кодкӧ нӧ кылӧ оз тайӧ горзӧмсӧ?

Веськыда шуны: оз кыв, буракӧ, некод, оз мӧрччы некодлы сьӧлӧмӧдзыс миян ыджыд гӧлӧсӧн горзӧмыс.

Газетӧ деревняяссянь ёна гижӧны (да и сёрни костын пыр кылан): сэні пӧ самӧкур да сур пуӧны, мӧдлаын — пуӧны, гӧгӧр Коми му кузя тшыналӧ, руалӧ, кылӧ вина дук...

САДЬМӦДЧӦЙ, ПАЛЬӦДЧӦЙ, КОМИ ЙӦЗ!

Онӧ ӧмӧй кылӧ Сӧветскӧй власьтлысь гӧлӧссӧ: “ОТСАЛӦЙ ТШЫГЪЯЛЫСЬЯСЛЫ”?

Дас миллионысь унджык уджалысь йӧз ӧні миян Россияын тшыгъялӧны.

А ті, самӧкур пуысьяс, мый вӧчанныд?

Мыйкӧ нӧ ті сетінныд энӧ тшыгъялысь йӧзлы?

Энӧ! Весиг ӧти пунт нянь эз вичмы тіянсянь налы!

Яндзим! Яндзим сур да вина пуны, кор Россия пасьта тшыгъялӧны уджалысь йӧз; яндзим кодавны, аслад вокъясыд кӧ тшыгла кулӧны.

Оз ков вунӧдны комилы: КОМИ МУ ОЗ ВЕРМЫ ОВНЫ АСЛАС НЯНЬӦН.

Быд во на Коми муӧ ваявлісны нянь, сё тысеча пудъясӧн мукӧдлаысь.

КЫТЫСЬ НӦ ВӦЛІ ВАЙӦНЫ ТАТЧӦ НЯНЬСӦ?

САМӦЙ СІЙӦ МЕСТАЯСЫСЬ ВОӦ ВӦЛІ МИЯНӦ НЯНЬЫС, КЫТӦН ТАВО СТАВЫС СОТЧӦМА ЖАРЛА, КӦНІ ЙӦЗЫС ТШЫГЪЯЛӦНЫ, мый вӧсна и горзӧмыс ӧні кылӧ: “ОТСАЛӦЙ ТШЫГЪЯЛЫСЬ УДЖАЛЫСЬ ЙӦЗЛЫ!”

ТӦДӦЙ, КОМИ КРЕСТЬЯНА! ОТСАЛӦЙ ВОДЗӦСНЫТӦ АСЬНЫТӦ ОМӦЛЬ ВОЯСӦ ВЕРДЫСЬЯСЛЫ! ЭНОВТӦЙ САМӦКУР ДА СУР ПУӦМЪЯС!

Сэсся таво оз ло виччысьны кысянькӧ нянь вайӧм, ковмас ас няньӧн кыдзкӧ судзӧдчыны. Сы понда — видзӧ няньтӧ, энӧ кыдзсюрӧ бырӧдӧ! Дзескыда, топыдджыка колӧ овны!

Сэсся, Сӧветскӧй правительство кӧ тӧдас, Коми муын пӧ ёна нянь бырӧдӧны самӧкурӧн да сурӧн, шуас: “Комилӧн пӧ няньыс лишнӧй, коми йӧз пӧ оз на тшыгъявны, коми йӧз пӧ ас няньӧн оласны”. Да и вӧчас: “Коми муӧ (став Обласьтӧ) не сетны весиг ӧти пунт нянь”!

Мыйкӧ нӧ, коми йӧз — самӧкур вӧчысьяс, та йылысь думыштланныд али онӧ?

Со ӧд мый вермас лоны тіян лёк вӧчӧм вӧсна!

Тайӧ збыль вермас лоны: газетӧ быдласянь ыстӧны гижӧд, газет вылысь тӧдасны Мӧскуаын, да сідзи и вӧчасны.

Мед огӧ воӧ та выйӧдз, колӧ став коми йӧзлы ӧтвылысь босьтчывны бырӧдны самӧкур да сур пуӧм. Сэтшӧм йӧзсӧ колӧ кутны да судӧ сетны, вӧчысьсӧ да и юысьсӧ тшӧтш. Исполкомъяслы да милициялы, став юра-вежӧра йӧзлы колӧ ёна кутчысьны татчӧ.

Нӧшта ми шуам:

Эновтӧй лёк удж! Отсалӧй кыдз-мый верманныд тшыгъялысь йӧзлы! Мынталӧй, чукӧртӧй ӧдйӧджык продналог!


Н. В.


Гижӧд
Нӧшта ӧтчыд шуам

lkejrlkelkrgner klrjnelknfrkl ekjnrjkenfrej

1