«СТИХЪЯСЫСЬ ӦТДОР И КЫВБУРЪЯС НА ГИЖАН?..»


Менам мода абу, мед ӧти и сійӧ жӧ книгасӧ лыддьыны кыкысь. Овлӧ, кор ӧти пӧвсӧ лыддьыны помӧдзыс ог вермы, абу кӧ кыскана гижӧдыс. Во-мӧд сайын ӧти авторлысь книгасӧ лыдди тӧлысь, да сідз эг и помав. Шуи помӧдзыс лыддьыны сэк, кор пета пенсия вылӧ. Юалі поэт Евгений Козловлысь: лыддьылін, мися, сэтшӧмтӧ книга: мыйӧн, мися, помасьӧ? Юрнас гогнитіс Женя: босьтчылі пӧ лыддьыны, но некымын лист бӧрын эновтчи. Тешкодьтор артмӧ: критикъяс ошкисны книгасӧ, а лыддьыны ог вермӧй весиг ми, литература дінӧ матысса йӧз.

А вот Василий Лодыгинлысь «Вуджанін» сборниксӧ лыдди нин нёльысь кымын. И водзӧ на окота киӧ босьтлыны. Прӧстӧйӧсь, мичаӧсь, сьӧлӧмад примитанаӧсь сэні кывбуръясыс. Судзӧдӧй тайӧ книгасӧ, лыддьӧй ужын бӧраныд гораа: кажитчасны кывбуръясыс и бать-мамлы, и челядьлы. Поэтыс сёрнитӧ тіянкӧд, гижӧ тіян йылысь, тіянӧс кытшалысь вӧр-ва йылысь. Гижӧ кокниа, гӧгӧрвоана образъясӧн.


Жбыркнитісны жоньяс —

Пелысь пуыс куш.

Жӧлӧбсянь йинёньяс

Нюжӧдісны чуш.


«Вуджанін» сборниксӧ сӧмын на лэдзис Коми издательство. Поэтлӧн тайӧ квайтӧд книга. Тӧдчӧда: В. Лодыгинлысь некор на эг аддзыв магазинъясын «туплясьысь» ни ӧти сборник. Мыйла чӧв олӧ сылӧн творчество йылысь критика — абу гӧгӧрвоана. А республиканскӧй радио сетӧ творческӧй портретъяс гижысьяслысь, кодъяс коркӧ йӧзӧдлӧмаӧсь ӧти-кык висьт либӧ кык-куим кывбур. И передача чӧжыс ӧтарӧ ошйысьӧм. Ми тадзнад сӧмын уськӧдам збыль писательяслысь, сідзкӧ и литературалысь, авторитетсӧ. Веськыдджыка колӧ гижны и критикъяслы. Оз ков видзӧдны писательлӧн чин да ним вылӧ, кад нин донъявны гижӧдъяснысӧ.

Лыддьысьысьтӧ ылӧдлыны зэв сьӧкыд. Ӧд унджык гижӧдсӧ, мый петӧ торъя книгаӧн, авторыс водзджык йӧзӧдӧ «Войвыв кодзулын». Тайӧ журнал сертиыс и донъялӧ мортыд сійӧ либӧ мӧд авторӧс. Во кык сайын Сыктывкарса «Книга керкаӧ» ме веськалі «Коми му» газетса редакторӧс вежысь И. И. Белыхкӧд. Сэки магазинса джаджъясыд тырӧсь жӧ вӧліны коми книгаяснад. Ӧти и сійӧ жӧ авторыслӧн кык-куим нима книгаӧдз куйліс. И со, менам водзмӧстчӧм серти, Иван Ильичкӧд книга джадж дорас шуим нуӧдны неыджыд эксперимент. Шмонитігмоз, дерт. Иван Ильич куняс синсӧ, а ме чутка киӧн кутшӧм веськалӧ книга вылӧ да юала: кымын во книгаыс куйлӧ? «Кык во», — вочавидзас Белых. Видзӧдам да — дас во сайын нин петӧма. Чуткылім вит-ӧ-квайт книга вылӧ и казялім: ставсӧ лэдзлӧма Коми издательство то кӧкъямыс, то квайт, то нёль во сайын. На лыдын вӧліны и прозаа, и кывбура книгаяс. Шӧр арлыдаяслӧн, олӧмаджыкъяслӧн и классикъяслӧн — В. Савинлӧн, В. Юхнинлӧн, Г. Фёдоровлӧн... Менам помнитігӧн пыр тадзи вӧвлі: весиг ичӧтик тиража коми книгаяс куйлісны магазинъясын уна во чӧж. Мыйла? Чайта да, коркӧ вочавидзасны на литературоведъяс.

Шуны кӧ ассянь, то помкаыс уна. Художествоа коми книгаяс ме куті чукӧртны да лыддьыны квайтымынӧд вояс заводитчигӧн. Сэксянь кымын жӧ и лыддя «Войвыв кодзув». Литературасӧ тӧдӧмыс мен ёна отсаліс журналистскӧй уджын, кодлы сии ме ассьым став олӧмӧс. Ветымын сизимӧд вося гожӧмын, кор кад кежлӧ инаси уджавны Кулӧмдін районса «Вӧр фронт» газетӧ, медводдзаысь ньӧби куим коми поэтлысь книгаяс: Серафим Поповлысь «Утро на Вычегде», Фёдор Щербаковлысь «Менам Отчизна», Иван Вавилинлысь «Менам парма». Воддзаыс петӧма ветымын кыкӧд воын роч кыв вылӧ вуджӧдӧмӧн, мӧдыс — ветымын витӧдын, коймӧдыс — ветымын сизимӧдын. Кулӧмдінса книжнӧй магазинын куйлісны найӧ ыджыд чукӧръясын. Тайӧ книгаяссяньыс менам пансис поэзиякӧд матісянь тӧдмасьӧмыс. Кӧть и вӧлі нин эрдӧдӧма личносьтлысь культ, ме медся азыма лыдди С. Поповлысь Сталин бать йылысь кывбуръяссӧ да поэмасӧ.


— Говорю: товарищ Сталин

Был у нас в лесах!

Есть на Вычегде, в низовъях

Городок глухой.

Вот оттуда и пришёл к нам

Сталин дорогой

Поздней осенью...

Говорил с народом — любо,

Песни с нами пел;

Брал топор у лесоруба,

Топором владел!..


Мыйла, буретш да, кыскисны ас дінас тайӧ строкаясыс? Со мыйла. 1951 воын, кор ме велӧдчи Донын квайтӧд классын, медводдзаысь гижи вит кывбур ставсӧ Сталин йылысь. Петкӧдлі найӧс велӧдысь С. И. Ульныровлы, коді оліс сійӧ жӧ керкаас, кӧні и вӧлі интернатным. Семён Ивановичыд и мӧдӧдіс менсьым стихъясӧс (кывбурӧн сэки эз шулыны) «Войвыв кодзулӧ». Вежон кык мысти воис машинка вылын печатайтӧм ыджыд воча кыв. Гижӧма Павел Доронин. Сійӧ воча кывсӧ ӧнӧдз видза аслам архивын. Сэні эмӧсь и татшӧм кывъяс: «...Стихъясыд абу артмӧмаӧсь. Сталин йывсьыд гижны колӧ велӧдчыны Серафим Поповлысь. Ёна лыддьысь, лыддьы «Войвыв кодзув» журнал, кӧні опубликуйтӧны ассьыныс произведениеяссӧ миян медбур поэтъяс...»

Со, сӧмын квайт во мысти веськалісны менам киӧ Сталин йылысь кывбуръясыс. 50-ӧд вояс помӧдз эг аддзыв синмӧн и «Войвыв кодзув». Сідз эг и удит велӧдчыны гижны Сталин йылысь: литератураын бырис став народъяслӧн бать йылысь темаыс. Сы пыдди поэтъяс кутісны шӧтны кывбуръяс Ленин, партия да комсомол йылысь. Ф. Щербаков сьыліс мир дорйӧм да шуда колхознӧй олӧм йылысь.


Свет да разум, твердыня и слава,

И став уджалысь йӧзлӧн почёт.

Здравствуй, миян великӧй держава —

Мирын мирлӧн могучӧй оплот!


Либӧ:


Идралім и ставсӧ вартім

Быдтӧм озыр урожай.

И колхознӧй ыджыд праздник

Пасйӧ миян вӧльнӧй край.


Октябрлы, партиялы, коммунизмлы сиис ассьыс вына строкаяссӧ И. Вавилин.


Партия — туй индысь кодзув.

Партия — миян юр вем.

Партия нуӧдӧ водзӧ.

Партия — шуда выль нэм.


Либӧ:


И кыла, кыдзи локтӧ нин ме дырйи

Планета вылӧ коммунизмлӧн лун.


Сэсся и, ӧзйи да, ачым гижи кывбуръяс Ленин да коммунизм йылысь. «Войвыв кодзулӧ» мӧдӧдӧм водзвылын пукті конвертӧ нӧшта ӧти кывбур — бобувъяс йылысь. Регыд и воис воча кывйыс, гижӧма критик А. А. Вежев: «Патриотическӧй кывбуръясыд петасны журналын, а бобувъясыд — оз. Бобувъясыд найӧ номыръяс. А колӧ-ӧ гижны номыръяс йылысь?»

Ветымынӧд вояс помын ме тӧдлі сӧмын тайӧ куим поэтыслысь книгаяссӧ. Карӧ лэччӧм водзвылын найӧс мукӧд книгаяскӧд тшӧтш петкӧді сарайӧ (олім Паспом посёлокын), кӧні мамӧ видзис гортса пемӧсъясӧс. Тӧвся каникулъяс дырйи петі сарайӧ, куті лукйысьны бумагаяс пиын и казялі: куимнан книгатӧ сёйӧмаӧсь кӧзаяс. 1985 вося гожӧмын, кор Сыктывкарын муніс финн-угор войтырлӧн конгресс, «Книга керкаын» вӧлі лэптӧма уна важ коми книга. На лыдын и С. Поповлысь «Лӧз енэж улын», И. Вавилинлысь «Менам парма» да Ф. Щербаковлысь «Менам Отчизна». Кӧнкӧ тай куйлӧмаӧсь?! Ӧд издательство лэдзлӧма найӧс 25–30 во сайын. Ньӧби. Куим сборникысь, ӧтлаын босьтӧмӧн, мынті 50 ур.

Гӧль эськӧ вӧлі поэзияным, эз кӧ локны литератураӧ Геннадий Юшков да Альберт Ванеев. Найӧ асланыс медводдза книгаясӧн нин вайисны поэзияӧ выль ру, тэчисны кывбуръяссӧ эз кӧртысь да бетонысь, а сьӧлӧмтӧ вӧрзьӧдана шыясысь. Кодсюрӧлы абу кажитчылӧма Г. Юшковлӧн небыдик кывбуръясыс, сюравлӧма таысь «Войвыв кодзувлӧн» лист бокъясын. Нарошнӧ ме видзӧдлі важ журналъяссӧ. Гораммӧдны пӧ колӧ кывбуръястӧ, паськӧдны темасӧ. А поэтыд асныра вӧлӧма, абу кывзысьӧма. Кывзысис кӧ, Юшков эськӧ эз ло Юшковӧн. Но Юшков да Ванеев воисны сэк, кор нин кывбуръяс дінӧ муслуныс йӧзыслӧн вӧлі ыркалӧма, сэсся и рочӧдны кутісны районнӧй газетъяс, республикаса школаясысь ӧтарӧ кутісны зырны коми кыв. Йӧз ӧтарӧ воштісны интерессӧ эз сӧмын поэзия дінӧ, но и ставнас литература дінӧ. 60-ӧд воясӧдз нинӧм вӧлі бӧрйыны и прозаысь. Куим-ӧ-нёль гижысь медсясӧ «паньӧдісны» лыддьысьысьясӧс кулакъяскӧд да белогвардеецъяскӧд тыш йылысь висьтъясӧн, повесьтъясӧн да романъясӧн. Эз этша вевъяв таын Г. А. Фёдоров.

Мыйысь смекайтчисны гижысьяс кулакъяс вылас? Ӧд республикаса уна сиктын сельсӧветъяс, колхоз правленньӧяс, медпунктъяс, весиг клубъяс дас вояс чӧж вӧліны кулак керкаясын. Да и кулакъясыс вӧлӧмаӧсь сиктын медся зіль йӧзӧн. Ёна нин кӧ коліс чесьтӧ уськӧдчыны коммунистическӧй системалы (мӧд ногыс сьӧкыд нажӧвитны орден-медаль, госпремия, оз сетны заслуженнӧй да мукӧд почётнӧй ним), позис и серавны (дерт, яндзимтӧ воштӧмӧн) кулакъяс да белӧйяс вылад, шуам, ӧти повесьтын. Но кор ӧтиторсӧ аддзан гижӧдысь гижӧдын, босьтӧ зывӧк. Г. Фёдоровлысь «Сиктса асыв» (1932 во) да «Колхозницаяс» (1936 во) повесьтъяссӧ шуӧма классикаӧн. Збыльысьсӧ, кутшӧм али классика, дзикӧдз кӧ киссисны-гӧльмисны коми сиктъяс (а кымын грезд нин бырис 60 вонад!). Ӧні быдӧн нин гӧгӧрвоам, мыйӧ вайӧдіс колхозъясӧ йӧзӧс мырдӧн пыртӧмыс. Эз, эз вермыны спаситны коми деревнятӧ Павел Зонов, Маша Попова, Алексей Юдин коддьӧмъяс («Сиктса асыв»), кодъяс тышкасьӧны народлӧн врагкӧд — кулакъяскӧд.

Кыдз тӧдса, классикаыд некор оз пӧрысьмы (Куратов, Пушкин, Гоголь, Лермонтов). Коми литератураысь сэтчӧ эськӧ ме пырті В. Юхнинлысь «Алӧй лента» романсӧ. Весиг аски ли аскомысь кӧ выльысь кутасны воссявны райкомъяс, «Сиктса асывса» геройясыд оз кутны лӧсявны талунъя лунлы. Ӧд и асьныс коммунистъяс колана ног, критическӧй синмӧн донъялісны партиялысь кузь туйсӧ, выль ног нин видзӧдӧны талунъя олӧм вылас.

Квайтымынӧд воясын коми проза озырмис выль темаясӧн. «Войвыв кодзув» лист бокъясын зэв лыддяна повесьтъяс чужисны Г. Юшковлӧн, И. Тороповлӧн, П. Шаховлӧн... Асланыс пельпомъяс вылын пӧшти комын во чӧж найӧ кутісны коми прозанымӧс, «Войвыв кодзув» журнал пыр отсалісны быдмыны томджык арлыда гижысьяслы. Ёна содліс журналлӧн тиражыс. И сэк жӧ магазинъяслӧн джаджъясын кутісны ӧкмыны инасьтӧм книгаяс. Тыдалӧ, литература радейтысьяс пиысь унджыкыс судзӧдісны «Войвыв кодзув», и торъя книгаяссӧ ньӧбӧм вылӧ эз ло коланлуныс. Ӧд книгаясас петісны сійӧ жӧ гижӧдъясыс, мый и журналын. Кор школаяс дзикӧдз вуджисны роч кыв вылӧ, кор быд керкаын лоис телевизор, коми литература дінӧ интересыс вошис нӧшта на ёнджыка. Ӧти и сійӧ жӧ авторыслӧн магазинъясын чукӧрмис 3–6 нима книгаӧдз. Быд во уна книга кутіс веськавны шыбласа кладбище вылӧ. И тадзи кыссис вель дыр. Мыйла Коми издательство лэдзис вевся книгаяссӧ? Чайта, коркӧ кодкӧ збоймӧдчас издательствоысь да вочавидзас.

Бӧръя кадӧ литература дінӧ интересыс нӧшта на усис. Эз сӧмын комиын, но и Россия пасьтаын (та йылысь оз этша гижны газетъяс). Февральын Кулӧмдін районын мунісны коми литература лунъяс. Асланыс, гижысьяскӧд аддзысьлыны Кужба сиктса клубӧ волӧма... 1 морт. Тайӧ нӧшта ӧтчыд висьталӧ: мунны сӧмын сэтчӧ, кытчӧ корӧны. И, дерт жӧ, волыны школаясӧ, кӧні гӧгӧрвоӧны коминас. Кодкӧлун «Би киньса» да «Йӧлӧгаса» уджалысьяс ветлӧмаӧсь аддзысьлыны Выльгортса коми челядькӧд, но сёрнитнысӧ ковмӧма рочӧн. Медуна тӧдчӧ мам-батьсянь. Ас кыв дінӧ муслунтӧ медводз колӧ чужтыны семьяын. Ӧтнас школа нинӧм вӧчны оз вермы. Оз ло ыджыд пӧльзаыс и сыысь, издательство кӧ медсясӧ кутас лэдзны сӧмын челядьлы книгаяс. Челядьлы литератураыс кызвыннас жебиник да ӧтсяма. Тӧдса журналист мен висьталіс татшӧмтор. Посни грездса челядь пӧ весиг оз тӧдны, кыдзи лоӧмаӧсь найӧ вӧльнӧй светас. Ӧтиясӧс мамныс чужтӧма киняулӧдыс, мӧдъясӧс — кутшӧмкӧ лэбачьяс кыськӧ вайӧмаӧсь... Коляс недыр кад, и ныла-зонкаяс кутасны нуӧдны гуся опытъяс, збыльысь-ӧ тайӧ тадз. Сыктывкарса телевидение пыр сёрнитіс врач, коді унаӧс шызьӧдіс виччысьтӧм юӧрӧн: дас куим арӧсаяс пӧ локтӧны больничаӧ вурны жугӧдӧм ныв мывкыдлунсӧ.

Бур эськӧ вӧлі, Коми издательство кӧ босьтчас лэдзны семьяын лыддьӧм вылӧ книгаяс. Ӧти и сійӧ жӧ корка улын мед вӧліны и пӧль-пӧчлы, и 20–40 арӧса мам-батьлы, и челядьлы да том йӧзлы лӧсялана гижӧдъяс — проза и поэзия. Сэтшӧм изданиеыд лоӧ быд коми семьяын зэв колана книгаӧн. Но гижӧдъясыс мед вӧліны кысканаӧсь, мед окотапырысь лыддисны став сикас арлыда войтыр. «Мама — рама», «удж — шуд» рифмуйтӧм строкаясыд ӧні абу нин интереснӧйӧсь весиг начальнӧй классъясын велӧдчысьяслы. Россияса ӧткымын школаын пӧ нёльӧд классӧ ӧні пыртӧма астрономия, гырысь классъясын пӧ велӧдӧны Гумилёвӧс, Ахматоваӧс, Солженицынӧс...

Неважӧн миян ордӧ гортӧ воліс школаын велӧдысь, народнӧй образованиеса отличник, кодкӧд дыр варовитім коми литература йылысь, школаясын коми кыв да литература велӧдӧм йылысь. Орфографияыс пӧ зэв дзуг, и челядь гижӧны коминас уна ӧшыбкаӧн. Эм сэтшӧм вӧрса пемӧс — рысь (вӧркань). Комиа-роча словарын кӧ тайӧ нимсӧ гижӧма ӧтлаын, то орфографическӧйын — торйӧн (вӧр кань). Код ногыс колӧ? Либӧ: мыйла пӧ «сопляк» кыв комиӧн гижны торйӧн — зырым бедь? Татшӧм тешкодьторсӧ позьӧ аддзыны зэв уна, мыйысь велӧдчысьяс тшӧкыда босьтӧны двойкаяс. Тайӧ нӧ кӧдзӧдӧ челядьӧс коми кыв дінас.

Велӧдчан программаӧ пӧ пыртӧма сэтшӧм гижӧдъяс, кодъясӧс челядь примитӧны ыркыда. Ыджыдджык классъясын велӧдчысьяс коми литература урок вылын пӧ гусьӧн лыддьӧны рубежсайса фантастика да ӧнія роч писатель Лимоновлысь «Эдичкасӧ». А ми том йӧзӧс мырдӧн тшӧктам лыддьыны гижӧдъяс, кӧні висьтавсьӧ краснӧйясӧн белӧйясӧс, гӧльясӧн озыръясӧс вермӧм йылысь. Гашкӧ, школьнӧй программаястӧ колӧ дасьтыны классӧвӧй тыштӧг?

Менам киын нёльӧд классын велӧдчысьяслы «Лыддьысян книга». Сэні быдса лист бок вылын эм татшӧм серпас: кык том зон — ӧтиыс нинкӧма, мӧдыс — сапӧга, нуӧны лыйлыны кӧмтӧм кокъяса белӧй офицерӧс. Сапӧгаыс маузерсӧ кутӧ офицерлӧн кӧсича бердын. Зонъясыс — Пучком сиктса том йӧз. Офицерыс, дерт жӧ, роч морт, коді локтӧма Комиӧ пӧдтыны Сӧветъяслысь власьт. Ёна-ӧ колӧ татшӧмторйыс ичӧт класса челядьыслы талун? Да и эм история урок, кӧні велӧдӧны став сикас войнаяссӧ.

Оз нин лӧсявны талунъя учебникад и со татшӧм строкаяс:


Пырис медводдзаяс лыдын

Сэк колхозӧ менам бать.


Эз татшӧм кокниа артмыны колхозъясыд, найӧс котыртісны мырдӧн, крестьянинлӧн синваӧн, няньӧн-солӧн олысьяслысь став эмбурсӧ мырддьӧмӧн, асьнысӧ катаргаясӧ мӧдӧдӧмӧн.

Пыралі Сӧветскӧй уличавывса (Сыктывкар) книжнӧй магазинӧ. Бӧръя кадӧ коми книга петӧ этша, чужан кывнымӧс шуӧма государственнӧйӧн, и чайті, мися кӧ, миян писательяслысь гижӧдъяссӧ ог нин и аддзы. О, енмӧй! Чорыд коркаа, сэтшӧм мича книгаяс сярвидзӧны джаджъяс вылас. Со, усьӧм фронтӧвикъяслӧн ӧтувъя книгаыс петавлӧма кӧкъямыс во сайын, сизим во сайын джадж вылас лэптӧмаӧсь Н. Поповлысь (Жугыльлысь) «Настясӧ», вит во нин мыйкӧ висьталӧны да оз вермыны помавны сёрнисӧ М. Игнатовлӧн дона юсьясыс, дыр нин гажтӧмтчӧ Г. Фёдоровлӧн Куратов йылысь романыс, виччысьӧ асьсӧ ньӧбысьӧс А. Лыюровлӧн повесьтыс...

Муні сэсся Коммунистическӧй уличавывса магазинӧ. Залас медся югыдінас лэптӧмаӧсь коми авторъяслысь сочинениеяссӧ. Синмӧн котрала книгаяс бӧрсяыс и шензьӧмӧйла кыла, кыптылӧ юр вылам шляпаӧй: ӧти, куим, дас... Дас квайт сикас книга казялі. Гырысьлы и челядьлы. Гашкӧ, коми книгаяслы выставка? Эсійӧ «Сёрмӧм тулысыс» ӧкмыс арӧса. А тонӧ орччӧн кило сьӧкта двӧйня сулалӧ: Б. Шаховлӧн «Тшӧтшъяяс» да «Сибӧд менӧ, чужан муӧй». Син водзын вералӧны авторъяслӧн ним-овъясыс: Виктор Савин, Илья Пыстин, Геннадий Фёдоров...

Сэсся 60–65 арӧсаяслӧн, сэсся дас арӧсӧн томджыкъяслӧн... Медтом арлыдаыс — Е. Козлова аслас «Ивук вокыскӧд» виччысьӧны ичӧтджык арлыда нывкаясӧс да зонкаясӧс. Неважӧн на авторыс чужтіс тайӧ повесьтсӧ. Пыралӧй, ньӧбӧй. Сэні жӧ челядьлы «Куим чой» книга, корка вылас куим нывкаӧс серпасалӧма. Налӧн тшӧтшъяясыс, тӧдӧмысь, важӧн нин петісны верӧс сайӧ, ӧд книгаыс арлыда жӧ нин.

Абу, абу вӧлӧма выставка.

— Ой, бурджык эн юасьӧй, — вочавидзис менам юалӧм вылӧ кассирыс. А юалі сы йылысь, ёна-ӧ ньӧбӧны коми книгаяс. — Со, ставыс син водзаныд... Листалӧны, но оз ньӧбны.

— А мый колӧ вӧчны, тіян думысь? Ӧд тані зэв уна бур книгаыс.

— Интереснӧя кӧ гижисны, сэк эськӧ эз куйлыны дас воясӧн.

Татарстанын, Башкортостанын, Чувашияын, Мордовияын да и мукӧд республикаын важӧн нин вӧчӧмаӧсь правилӧӧн: сэтчӧдз, кытчӧдз оз инась писательлӧн (поэтлӧн) воддза книгаыс, мӧдсӧ оз лэдзны, тэ кӧть кутшӧм лауреатӧн эн вӧв. Сы пыдди лэдзӧны книгаяссӧ выль авторъяслысь. Та йылысь уна гижліс «ЛитРоссия» газет. Гашкӧ, и миянлы тадзи колӧ вӧчны.

Сійӧ пӧ и бур, магазинъясын кӧ эмӧсь коми книгаяс, — шулывлӧ ӧти писатель. Тайӧ лӧж. Бур лоӧ сӧмын сэк, кор книгаясным воасны коми войтырлӧн книжнӧй шкапъясӧ.

Коми гижысьяслӧн, кыдзи и СССР-са став писательлӧн, творческӧй подулын вӧлі социалистическӧй реализм. Искусстволӧн сійӧ сэтшӧм метод, кор олӧмсӧ коліс петкӧдлыны революционнӧя сӧвмӧмын. И газетъяс, и журналъяс ӧтарӧ тӧдчӧдлісны: литературалӧн выныс — йӧзӧс коммунистическӧя воспитайтӧмын. Та могысь художествоа гижӧдъясӧ колӧ вӧлі пыртны положительнӧй геройӧс, и мед быд гижӧдын тӧдчис джуджыд идейносьт да коммунистическӧй партийносьт. А кыдз тайӧс позис вӧчны? Дерт жӧ, важ да выль костын чорыд тышын революционнӧй характера йӧзӧс петкӧдлӧмӧн. Ме думысь, тайӧ могъяссӧ миян писательяс пӧртісны олӧмӧ. Налӧн гижӧдъясыс тырвыйӧ лӧсялісны кадыслы.

А мыйӧдз воим збыльысьсӧ? Асьныс жӧ странаса партократъяс кисьтісны СССР-нымӧс, вальдӧдісны компартияӧс, разнӧй национальностя йӧз костын чужтісны зык. Водзджыксӧ бырӧдісны крестьянствоӧс, жуглісны вичкояс... Йӧз эз кутны эскыны ни енлы, ни беслы. Вот тіянлы и революционнӧй характер да соцреализм!

Ме думысь, мед быд писательлӧн сьӧлӧмын вӧлі аслас, аслыс нога реализм. Мед писательыд эз вӧв кӧртвомалӧма сэтшӧм методъясӧн да правилӧясӧн, кодъясӧс вынсьӧдлісны быд сикас конференцияяс да съездъяс, торъя литначальникъяс. Ӧні гижысьяслӧн вӧляыс ыджыдджык. Чайта, мый налӧн книгаясыс кутасны воны оз сӧмын книжнӧй магазинъясӧдз, но и лыддьысьысь киӧдз. Дерт, кутасны кӧ на петны коми книгаяс.

Ӧти телепередачаын, кӧні кузь пызан сайын пукалісны Коми Республикаса зэв тӧдса йӧз Верховнӧй Сӧветысь, «Коми котырысь», «Доръям асьнымӧс» ютырысь, научнӧй центрысь, а сідзжӧ журналистъяс, гижысьяс (Е. Козлова, Ю. Васютов, Е. Козлов), кыптыліс сёрни и коми книга йылысь. Ӧти ыджыд начальник Коми му пасьтаыс крапкис: мыйла пӧ лэдзны сэтшӧм книгаяссӧ, кодъясӧс йӧзыс оз лыддьыны! Мӧд: коми писательяс пӧ регыд кутасны гижны сӧмын ӧта-мӧдыслы! Виччыси, кыдзи кутасны водзсасьны сэні пукалысь гижысьяс. Слабог, чӧв олісны. Ӧд водзсасьнысӧ вӧлі нинӧмӧн.

«Племянниклы, коді школаын велӧдчӧ, ыджыд классын нин, вӧзйи лыддьыны некымын коми книга. Ставыс, мися, зэв бур книга, лыддьы. Лыддя пӧ. Вежон мысти бӧр вайис ставсӧ: ачыд пӧ лыддьы татшӧм книгаястӧ!» — норасис аслас племянник вылӧ учёнӧй Г. Г. Бараксанов. Омӧля лыддьысьӧны оз сӧмын том йӧз. Лёка тӧдӧ чужан кывсӧ да литературасӧ и коми интеллигенция. Тӧдіс кӧ, сиктса учительыд эськӧ эз сёрнит радио пыр татшӧм кывъясӧн: «Решитім организуйтны отбор на конкурсной основе». Лыддьысисны кӧ, 1–2 тысяча экземпляра книгаыд эз эськӧ куйлы магазинад некымын воясӧн. Гашкӧ, комиясыс дзикӧдз нин рочмисны? Абу жӧ тадз. «Коми му» газет со быд вежон куимысь петӧ 8 тысяча экземплярӧн. Ӧти кывйӧн кӧ, лыддьысьысь виччысьӧ писательсянь вом кӧр вежантор!

Лун-мӧд сайын карса улича вылын паныдаси важ тӧдсакӧд. Менӧ пельпомӧд тапкӧдігмоз шуис:

— Кывлі, кывлі радио пыр... Тэ тай стихъясысь ӧтдор и кывбуръяс тшӧтш гижан.

— Да, гижа. А тэ тӧдан, мый сійӧ кывбурыс?

— Ог...

Со ӧд мыетш воим.


«Коми му», 1993 вося март.


Гижӧд
«Стихъясысь ӧтдор и кывбуръяс на гижан?..»
Йӧзӧдан во: 

lkejrlkelkrgner klrjnelknfrkl ekjnrjkenfrej

1