* * *


Косьтӧм йӧрш кучик кодь лоас «Войвыв кодзулыд», литературнӧй уджысь кӧ и водзӧ кутасны мынтыны грӧшъяс.

Сыктывкарын финн-угор войтыр консультативнӧй комитетлӧн заседание вылын вӧлі и Мордовияса гижысь, «Мокша» литературно-художественнӧй журналса главнӧй редактор Г. И. Пинясов.

Коми гижысьяслӧн союзын Григорий Ильич аддзысьліс «Войвыв кодзув» да «Би кинь» журналъясса, литератураӧн тӧдмӧдан бюроса, «Йӧлӧга» газетса, писательяс союзса уджалысьяскӧд. Гӧсьт висьталіс асланыс республика йылысь, мордовскӧй народлӧн асшӧрлун вӧсна тыш йылысь, литературно-художественнӧй журналъяс да Мордовияса гижысьяс йылысь. Кык республика костын эм уна ӧткодьлуныс. Налӧн республикаын кӧреннӧй олысьыс пӧшти сы мында жӧ, мыйта комиыс и миян республикаын. Торъялӧмыс, пӧжалуй, ӧтиторйын: налӧн эм асланыс президент.

Г. И. Пинясовлӧн кывъяс серти, сэтчӧс правительство, Верховнӧй Сӧвет зэв пыдди пуктӧны ассьыныс национальнӧй литература. «Мокша» журналыс ыджданас «Войвыв кодзувкӧд» ӧткодь. Но выль восянь налӧн журналын быд тӧлысся гонорарыс 20 тысяча шайт. Миян коми журналын — та серти джынсьыс на этшаджык. «Войвыв кодзулын» серти сэні ыджыдджыкӧсь и тарифнӧй ставкаяс. Таысь ӧтдор, сэні мынтӧны журналса дзик быд сотрудниклы тӧлысьнас содтӧд куим тысяча шайт. Сідз шусяна пытшкӧсса резервъясысь. Отсалӧны пӧ и спонсоръяс. Сідз, Саранскса цемент вӧчан завод сетӧма журналлы миллион шайт. Редакцияыс топыд йитӧдъяс кутӧ и мукӧд предприятиекӧд, кодъяс отсалӧны судзӧдны писательяслы сёян-юан, промышленнӧй тӧваръяс.

Шензян, кор «Войвыв кодзув» эз вермы корсьны сьӧм (уна вылӧ 5 тысяча шайт) литературнӧй конкурс вылӧ, кодӧс юӧртлім кольӧм во. Дерт, колӧ уджавны. Г. И. Пинясов кӧть и главнӧй редактор, асьсӧ шуӧ кӧзяйственникӧн. Ӧтарӧ пӧ котӧрта то Верховнӧй Сӧветӧ, то Совминӧ, то печать министерствоӧ пычкыны унджык сьӧм. Журналас кызвын литературнӧй делӧяссӧ бергӧдӧ сійӧс вежысьыс. Сӧмын жӧ литературнӧй удж вӧчӧ и ответственнӧй секретарь. Техническӧй редактирование пӧ нуӧдӧ мӧд морт.

Гашкӧ, «Мокша» журналлӧн ыджыд штатыс, ыджыд тиражыс? Абу. Тиражыс сылӧн 1.600 экземпляр. «Войвыв кодзувлӧн» — 4.000. И уджалысьыс кыкнан журналас ӧтмында.

И нӧшта ӧти выльтор. Мордовияса печать кузя министрӧс вежысьыс ӧттшӧтш и челядьлы петысь журналын (миян сэтшӧмыс «Би кинь») главнӧй редактор. Журналыс петӧма Мордовияса писательяс союзлӧн сывборд улысь и учредительнас лоӧма сӧмын ачыс уджалысь коллективыс. Аслас учредителькӧд — писательяс союзкӧд — сёрнитчӧ ӧні и «Мокша» журналса коллектив. Моральнӧй отсӧгысь кындзи сысянь кӧсйӧны корны и мукӧд сикас отсӧг. Кыдзи шуис Г. И. Пинясов, формальнӧй учредительясыд пӧ миянлы оз ковны. Став газет-журналсӧ Мордовияын финансируйтӧны печать министерство пыр.

Кыптыліс сёрни и литература пропагандируйтан бюролӧн удж йылысь. Бюро кабинетас пӧ ӧні вузасьӧны кӧм-паськӧмӧн, мед кутшӧмкӧ ног нажӧвитны деньга. Предприятиеясӧ гижысьяслысь аснаукӧн чукӧрӧн ветлӧмсӧ дугӧдӧма. Энӧ дӧзмӧдӧй йӧзсӧ, но колӧ кӧ — мынтысям — тадзи пӧ шуӧны предприятиеясӧн веськӧдлысьяс. Корасны кӧ, дон босьттӧг литераторъяс ветлывлӧны школаясӧ. И дум вылӧ мен усис татшӧмтор. Кулӧмдін районса Улыс Воч сиктын ноябрсянь нин абу сетавлӧмаӧсь удждон, Канаваын да Дёмаын деньга серсӧ абу нин аддзылӧмаӧсь октябрсянь. Радӧвӧй мортлӧн тӧлысся шӧркодь удждоныс ӧти сюрс шайт. Вот и мунӧй да лыддьӧй сэн кывбуръяс! Мыйӧн жӧ мынтысясны, кутшӧм сьӧмӧн сэтчӧс йӧзыс? А ыштас-ӧ сьӧлӧмыд босьтны деньга школаын челядькӧд аддзысьлӧмысь?

Оз, оз нажӧвит талунъя писательыд сиктысь сиктӧ ветлӧмнад. Мӧд делӧ, ветлӧдлан кор йӧзыскӧд аддзысьлӧм ради. Россияса ӧткымын обласьтын, Коми-Пермяцкӧй автономнӧй округын писательяс союзса став членыслы мынтӧны литературнӧй стипендия. Оз ӧтка йӧзлы, а став писательыслы! Ӧд литературатӧ вӧчӧны оз кык-куим морт, а став профессиональнӧй гижысьыс. Мыйла тадзисӧ оз вӧчны Коми Республикаын — Россияса медся озыр республикаясысь ӧтиын?

Г. И. Пинясов тӧдмӧдіс миянӧс и книга лэдзӧмӧн. Медыджыд тиражыс пӧ овлӧ 2 тысяча экземпляр, медічӧтыс — 500. Писательяс союзса членыс Мордовияын 41 морт, Комиын — 35.

Тайӧ сёрнисӧ кывзыны корлім и Коми Республикаысь печать да информация министр А. П. Юдинӧс. А гижи сы могысь, медым рӧдвуж кывъя гижысьяслӧн делӧясӧн мыйкӧ мында тӧдмӧдны Коми Республикаса став писательӧс. Ӧд литературнӧй уджысь кӧ и водзӧ кутасны мынтыны сӧмын грӧшъяс, «Войвыв кодзув» вермас лоны косьтӧм йӧрш кучик кодь.


«Коми му», 1993 вося февраль.

Гижӧд
Косьтӧм йӧрш кучик кодь...
Йӧзӧдан во: 

lkejrlkelkrgner klrjnelknfrkl ekjnrjkenfrej

1