КӦСЙИ ДОРЙЫНЫ — АРТМИС МӦДАРӦ


Январ помын Сыктывкарын муніс писательяслӧн собрание. Сёрниыс вӧлі Коми ССР-са гижысьяслӧн устав да «Войвыв кодзув» журналлӧн удж йылысь. Журналын йӧзӧдӧм гижӧдъяс йылысь кывзім куим доклад: проза, поэзия да драматургия йылысь. Зэв колана сёрнитанторъяс, но республикаса печать чӧв оліс, эз кыпав лолыс паськыдджыка гижны и «Коми му» газетлӧн. Миян асланым литературнӧй газет абу, и лыддьысьысьяс этша мый тӧдӧны коми литераторъяслӧн олӧм да тӧждъяс йылысь, коми книгаяслӧн да журналъяслӧн судьба йылысь.

Со и кӧсъя шуны аттьӧ кыв республиканскӧй радиоса коллективлы, коді эз на коль веськодьӧн коми литература дінӧ. Буретш радио пыр февраль 11 лунӧ сетісны писательяслӧн собрание йылысь ыджыд отчёт. Вӧлі ужнайта, кор кылі передачасӧ. Кывзі помсянь помӧдз и тайкӧ эг ляскы шыд тасьтіӧс: сыметь дӧзми «Войвыв кодзув» журналӧс пинялӧмысь. Кызь минут чӧжӧн эг кыв журнал йылысь ни ӧти бур кыв. Ӧтарӧ сійӧс видісны передачасӧ нуӧдысь журналист Л. Лыткин, писательяс союз правлениеса член В. Лодыгин, В. Дёмин, прозаа гижӧдъяс кулитіс поэт Н. Щукин. И дзикӧдз дӧнзьылі, кор кылі пель вундана кывъяс: «Войвыв кодзулӧс» ӧткодялісны помӧй ведракӧд! Кыдзи нӧ он дӧнзьы? Ӧд ачым сэні редколлегияса член, уна во нин йӧзӧда сэні ассьым кывбуръяс да повесьтъяс.

Аскинас, эг вермы лӧньны да, звӧниті радиоса главнӧй редактор А. Ларевлы. Мыйла нӧ, мися, сэтшӧма видінныд коми журналсӧ? Александр Константинович кылӧ серӧктіс, шуис: «Виктор, мыйкӧ кӧ не сідз, ачыд лок да сёрнит радио пыр». Кык рыт пукалі пызан сайын, жуглі юрӧс «Войвыв кодзув» журналӧс доръяна гижӧд вылын. Листалі-бергӧдлі киын журналлысь вель уна номер, корси думысь ошканаджык гижӧдъяс, синмӧ шыбитчана материалъяс. Но эз, эз артмы ошкана статьяӧй. Эг вермы сувтны сійӧ фактъясыслы паныд, кодъяс кылісны радиопередачаын.

Сӧмын вензьыштны кӧсъя В. Н. Дёминкӧд. Сылӧн сёрниыс ӧвтыштіс 60–70-ӧд воясса тӧвруӧн, кор литературнӧй начальникъяс диктуйтлӧмаӧсь гижысьяслы темаяссӧ. «Пленум комиссии СП РСФСР по критике и литературоведению четко и однозначно определил темы, над которыми следует работать поэтам и прозаикам», — гижлӧма 1969 воын «Литературная Россия» газет. Сійӧ кадсяньыс колис нин 23 во, литература вевъяліс мездысьны соцреализмысь, а критик Дёмин век на велӧдӧ коми поэтъясӧс: гижӧй пӧ сэтшӧм да татшӧм темаяс вылӧ. Владимир Николаевич! Тэ кӧть менӧ ньӧръяв, но ог кут примитны вӧзйӧм тематӧ. Кута гижны сы йылысь, мый вӧрзьӧдас сьӧлӧмӧс: лым улысь мыччысьӧм дзоридз йылысь и кузь туганъяса пожӧм йылысь, лӧсьыд мыгӧра ныв йылысь и бедь вылӧ мыджсьӧм пӧль-пӧч йылысь...

И нӧшта кӧсъя ыстысьны «Литературная Россия» газетлӧн неважӧнся номер вылӧ. Сэні вӧлі юӧртӧма, мый Москваса писательяс асланыс организацияысь вӧтлӧны витсё критикӧс, переводчикӧс да челядьлы гижысьӧс, кодъяс ылынӧсь литературнӧй жанрысь. Татшӧмторсьыс миян республикаын повны нинӧмла. Иван Куратов кадсянь талунӧдз — 150 во чӧжӧн — писательяс союзын коми членыс вӧлі 60 морт (кулӧмъяссӧ и ловъяяссӧ ӧтлаын босьтӧмӧн). Орччаӧдӧм могысь казьтышта: Чувашияын талун писательскӧй билета мортыс сёысь унджык. Збыльысь зэв тӧдчанаӧн лоис 1991 вося июнь, кор Россияса приёмнӧй комиссия Комиысь примитіс писательяслӧн союзӧ ӧкмыс литераторӧс. Татшӧмторйыс вӧлі медводдзаысь коми литература историяын. Но «Войвыв кодзув» та йылысь эз висьтав кыв ни джын.

Союзӧ пырысь коми литераторъяслысь уджъяссӧ донъялісны Москваса да Ленинградса нималана писательяс. Сідз, менсьым повесьтъясӧс да кывбуръясӧс рецензируйтісны Глеб Горышин, Дмитрий Жуков, Аркадий Савеличев да Евгений Чернов. Нёльнанныс гижӧдъясӧс видлалӧмаӧсь уна боксянь и ставныс донъялӧмаӧсь зэв вылӧ. Тадзи некор на эз видлавлы ни ӧти коми критик. Г. А. Юшковлӧн да В. В. Тиминлӧн водзмӧстчӧм серти вӧлі шуӧма некымын рецензия йӧзӧдны «Войвыв кодзулын». Журналса уджалысьяс гогйӧдлісны юрнас: йӧзӧдам пӧ. Но ни ӧти рецензия сідз эз и петав. А тайӧ эськӧ интереснӧ вӧлі и лыддьысьысьяслы, и коми критикъяслы. Зато журнал эз нин ӧтчыд чепляв «Коми котыр» обществоӧс. Кутшӧм лёктор вӧчӧма сійӧ коми журналыслы? Код тӧдас! Журналын эмӧсь и сэтшӧм корреспонденцияяс, кодъяс йылысь оз сулав сёрнитнысӧ.

Сэсся и абу мича, кор журнал ылӧдлӧ ассьыс лыддьысьысьяссӧ. Менам киын 1991 вося сизимӧд номер. Корка вылас юӧртӧма, мый лоӧ йӧзӧдӧма волӧн мӧд джынйын. Сэні индӧма: печатайтам пӧ и П. Шаховлысь «Еджыд керка» да В. Напалковлысь «Ме тэнӧ радейта» повесьтъяс. Воыс колис, а некоднан гижӧдыс сідз эз и мыччысь. Ме ассьым повесьтӧс пырті журналӧ июнь тӧлысьын.

Аддзи сійӧс во джын мысти, декабрын. Восьті папкасӧ, и мый жӧ? Поздысьӧмаӧсь сэтчӧ колькъя тӧрӧканъяс — уна-уна. Эз ло лӧсьыд сьӧлӧм вылын. Эз ло лӧсьыд рукопись дінӧ веськодьлунысь.

Либӧ со татшӧм пример. Кольӧм вося августын нин композитор А. Рочев вайӧма журналӧ выль сьыланкыв. Редакция век на эз аддзы места сійӧс йӧзӧдӧм вылӧ. И сэк жӧ обложка вылын мунӧны непрофессиональнӧй авторъяслӧн рецензируйттӧм нотаяс.

Журналлӧн титульнӧй листын индӧма редколлегияса войтырлысь нимъяссӧ. Эм сэні нимыс и Василий Лодыгинлӧн. Но мортыс ни ӧтчыдысь на эз вӧв редколлегиялӧн заседание вылын — абу на корлӧмаӧсь. Унджык татшӧм заседаниеыс мунӧ мода ради. Со и редколлегияса членъясыд локтӧны сэтчӧ дышпырысь. Оз век волывлыны весиг асьныс журналын уджалысьяс, кодъяс дасьтӧны гижӧдъяссӧ печатьӧ. Михаил Елькинысь ӧтдор.

Газет лыддьысь казяліс нин, мый тані ме ог сёрнит повесьтъяс да висьтъяс, кывбуръяс да поэмаяс йылысь. Тайӧ торъя, ыджыд сёрни. Да и художествоа гижӧдъяссӧ медводз мед донъялӧны асьныс лыддьысьысьяс. Ме гарала сӧмын сэтшӧмторъяс, кодъяс мен кажитчӧны пинь костын ёг кодьӧн. Бура помнита 1977 во, буретш уджалі сэк «Войвыв кодзулын». Ӧти асылӧ сёрми редакцияӧ, вои сэтчӧ дас часын. Аддзылӧма менсьым сёрӧн локтӧмтӧ Г. А. Юшков. Мӧд лунас вӧлі писательяс союзса да «Войвыв кодзувса» уджалысьяслӧн собрание, кӧні видлалісны журналлысь локтан во вежлӧ план. Сэсся и удж дисциплина йылысь кыптіс сёрни. Босьтіс кывсӧ Геннадий Анатольевич, шуис: тӧрыт пӧ Напалков сёрмис удж вылӧ. Видісны менӧ сёрмӧмысь. А мый вӧчсьӧ талун? Гижны кӧ став збыльторсӧ, яндзимысла гӧрдӧдас эськӧ перӧ улын бумагаӧй. И сэк жӧ писательяс союзлӧн контораын уджалысьяс — Г. А. Юшков, В. В. Тимин, Е. Козлова — чӧв олӧны, сетчӧны унатор казявтӧм улӧ.

Да, позис и нинӧм не казявны, журналъяс кӧ вӧліны частнӧй киын, либӧ коллективъяс кӧ лэдзисны найӧс асланыс тшӧт вылӧ, журналъяс кӧ асланыс прибыль вылӧ кутісны писательяс союзлысь конторасӧ. Но тайӧ абу тадз. Ми ставным босьтам деньгасӧ госбюджетысь, ставнымлӧн учредительыс, шуны кӧ веськыда, Министръяслӧн Сӧвет. Сідзкӧ и, быдлаын мед вӧлі государственнӧй дисциплина, творческӧй да экономическӧй корсьысьӧм. Да, да, экономическӧй.

Кыдзи кутны тупкысьӧмысь газет-журналъяс — медсясӧ та йылысь и сёрнитісны Коми ССР-са журналистъяс, кодъяс февраль 21 лунӧ чукӧртчылісны асланыс съезд вылӧ. Абу гӧгӧрвоана, мыйла эз вӧвны тайӧ съезд вылас коми журналъясысь да «Йӧлӧга» газетысь редакторъяс («Чушканзіса» редакторысь ӧтдор), эз некод вӧв и писательяслӧн союзысь, кӧть эськӧ и съездвывса быд кыв кутшӧмкӧ ног инмис тшӧтш налы. Оз ков думайтны, мый миянлы, комияслы, кутасны сетны кутшӧмкӧ льготаяс да привилегияяс. Рынок ӧткодялас став национальностя войтырсӧ.

Коми ССР-са журналистъяслӧн союз мӧд во олӧ дотациятӧг, вердӧ-юкталӧ ачыс асьсӧ. Пенсионеръяслы сетӧ быд тӧлысся денежнӧй отсӧг. Кольӧм во комын сайӧ журналистлы вӧлі сетӧма шойччан керкаясӧ путёвкаяс. Журналистъяс союзӧн веськӧдлысьяс и водзӧ корсьӧны сэтшӧм туйяс, кыдзи да кутшӧм ногӧн нажӧвитны унджык деньга. И сэк жӧ ӧти делегат крапкис: мыйла писательяслӧн союз, коді ачыс оз нажӧвит ни ӧти шайт, пукалӧ уна да гырысь кабинетын, а журналистъяслӧн союзлы вичмӧдӧма сӧмын 14 квадратнӧй метр?!

А кыдзи сувтіс кок йылас «Молодежь Севера» газет? Ӧд во-мӧд сайын на сійӧ вӧлі ӧнія «Войвыв кодзув» моз коньӧр кодь газетӧн. Либӧ: кыдзи котыртӧ уджсӧ акционернӧй общество, кодӧн веськӧдлӧ фотограф В. Ячменев? Эм нин, кодъяслысь позьӧ велӧдчыны уджавны рынок вылӧ вуджан кадӧ. Сӧмын колӧ веськӧдлысьяссянь кӧсйӧм да водзмӧстчӧм. Таӧ жӧ, коммерческӧй уджӧ, чуксалӧ и Россияса писательяслӧн союз. Мӧд ногыс, В. Распутинлӧн кывъяс серти, «вымрут не только средние, но и серьёзные писатели». Россияысь журналистъяслӧн союзса председатель В. И. Новиков съезд вылын чуйдіс: республикаясса да обласьтъясса творческӧй союзъяс пӧ ӧні котырталӧны координационнӧй центръяс, кӧні ӧтвылысь корсьӧны асьнысӧ социальнӧя доръян туйяс. А эм-ӧ кутшӧмкӧ йитӧдъяс Коми ССР-са писательяслӧн да журналистъяслӧн союзъяс костын?

Тані кодкӧ вермас юавны: мый эськӧ вӧзйи ме ачым? Литературнӧй олӧмын коммерческӧй уджсӧ позьӧ панны «Войвыв кодзув» журналсянь. Индыны сэтчӧ сэтшӧм главнӧй редакторӧс (Г. В. Беляевӧс либӧ В. В. Тиминӧс), коді эськӧ оліс-уджаліс эз сӧмын удждонсянь удждонӧдз, а мед журнал дінас сылӧн вӧлі ыджыд интерес. Главнӧй редактор (кыдзи, шуам, президент либӧ премьер-министр) мед ачыс бӧрйис ассьыс команда — уджавны вермысь (дееспособнӧй) коллективӧс. Мездысьны сэтшӧмъясысь, кодъясысь ичӧт пӧльзаыс. Ӧнія мында сотрудниксӧ видзны сэні абу коланлуныс. Кольны сӧмын главнӧй редакторӧс, ответственнӧй секретарӧс (сійӧ жӧ редакторӧс вежысь), кык литсотрудникӧс. И нӧшта лоӧны корректор (сійӧ жӧ техредактор), машинистка да бухгалтер. Журналлысь ыдждасӧ вайӧдны 64 лист бокӧдз, кӧть и став рӧскодсӧ государствоӧн артыштӧма 80 лист бок вылӧ. Сёрнитчыны минфинкӧд, медым видзтӧм средствосӧ эз спишитны. А видзтӧма лоӧ 11 номерысь вель уна бумага да типографскӧй рӧскодъяс. 12-ӧд номерын пыддиыс видзтӧм средствояс тшӧт весьтӧ лэдзны роч кыв вылын коммерческӧй книга — фантастика либӧ историческӧй тема вылӧ. Ыдждаыс, шуам, 10-15 печатнӧй лист, тиражыс 75 тысяча экземпляр, быд книгалӧн доныс 15-20 шайт. Ӧти воӧн журнал вермас босьтны миллион сайӧ шайт доход и ачыс нин вермас лоны благотворительнӧй организацияӧн. Ме думысь, и Совмин, минфин та вылӧ мунасны. Оз дӧзмыны таысь и журнал судзӧдысьяс, ӧд дас кыкӧд номер пыддиыс налы воас дон босьттӧг вель кыз книга. Ставыс кӧ артмас лючки-бура, журналса гижӧдъясысь позяс содтыны гонорар, а сэтчӧс сотрудникъяслы — удждон. Унджык лоас сэк и журнал судзӧдысь.

Кольӧм лунъясӧ радио пыр сёрнитігӧн Зоя Рогова (сылысь лэдзӧма книгаяс, гижӧ журналӧ висьтъяс) норасис гонораръяс этша мынтӧмысь. Неважӧн пӧ босьті сы мында сьӧм, мый весиг эг вермы ньӧбны кык метр дӧра. А видзӧдлывлӧ-ӧ кодкӧ писательяс союзӧн веськӧдлысьяс пӧвстысь «Войвыв кодзулысь» гонорара ведомосьтсӧ? Оригинальнӧй гижӧд эз-ӧ ло донтӧмджык роч кыв вылысь комиӧдӧм статья серти? Юалӧмыс уна, но коді вочавидзас юалӧмъяс вылас? Журналъясӧн веськӧдлӧмысь писательяслӧн союз мыйлакӧ ӧтарӧ кедзовтчӧ. Кӧть и журналистъяслӧн съезд вылын, перерыв дырйи, ӧти делегат «Войвыв кодзулӧс» шуис «ведомственнӧй малотиражкаӧн».

Киссис СССР-са писательяслӧн союз, разіпели лоины Россияса гижысьяс, а коми литераторъяслӧн котырлысь правлениесӧ весиг эз томмӧдыштны. Кольӧм собрание вылын эштылі ме вӧзйыны сэтчӧ поэт Михаил Елькинӧс, но он на тай босьт. Кыдзи и тоталитаризм дырйи, ставсӧ вӧлӧм водзвыв решайтӧны. Та кузя збыльысь демократия петкӧдліс журналистъяслӧн съездыс. Союзлӧн сӧветӧ войтырсӧ бӧрйисны эз чинъяс серти.

СП-лӧн общественнӧй уджӧ колӧ ёнджыка кыскыны Е. Габоваӧс, М. Елькинӧс, Е. Козловаӧс, А. Лужиковӧс, Е. Козловӧс, Г. Бутыреваӧс. Найӧ кӧ оз пыртны литературнӧй олӧмӧ выль русӧ, то виччысьны сэсся кодсянь? Сӧмын вот ӧтитор менӧ майшӧдлӧ: томъяс пиысь кодсюрӧ вышитчӧкодь, кӧть и нинӧм на эз вӧч сэтшӧмсӧ. А писательыд пӧ, кымын ыджыдджык талантнас, сымын сійӧ скромнӧйджык. Со примеръяс. Иван Тороповӧс сідз эг и аддзыв морӧсас депутатскӧй значокӧн, кӧть и вит во чӧж вӧлі Коми республикаысь Верховнӧй Сӧветса депутатӧн. А кымын авторлысь повесьтсӧ да висьтсӧ сійӧ вайӧдіс «Войвыв кодзувлӧн» лист бокъясӧдз! Надейнӧ, и ачыс весиг стӧчасӧ оз тӧд. Газетъяс эз нин этшаысь гижлыны Валентин Распутинлӧн скромносьт йылысь. Сибырса уна авторлы отсалӧма сійӧ быдмыны писательӧдз. Уна во тӧда Геннадий Юшковӧс, Енмӧн козьналӧм таланта гижысьӧс, но чир мында на эг казявлы сылысь вылӧ пуктысьӧм.

Бур эськӧ вӧлі, гижысьяслӧн союзын кӧ вӧчисны тадзи: правлениеса председатель курируйтӧ «Войвыв кодзув» журнал, сійӧс вежысьыс — «Би кинь». Тайӧ эськӧ отсаліс ладмӧдны уджсӧ кыкнан редакцияас.

Бӧръя кык воӧн «Войвыв кодзувлӧн» тиражыс чиніс нӧшта тысяча экземпляр. Тадзи кӧ лоас и водзӧ, то во сизим мысти коми литературно-художественнӧй журналлы ковмас вӧчны горт да крест. Ӧд талунъя тиражыс сылӧн нёль тысячаысь этшаджык. Орччаӧдӧм могысь пасъя: «Чушканзі» журнал петӧ 12 тысяча, «Йӧлӧга» — 8 тысяча, Кулӧмдінса «Парма гор» районнӧй газет — 6 тысяча сайӧ экземпляр.

Ӧткымынӧн шуӧны, мый журнал лыддьысьысь кӧдзалӧ жеб публицистика вӧсна. Редакцияын ӧні квайт литработник, главнӧй редакторӧс тӧд вылӧ босьтӧмӧн. Быд сотрудник кӧ во чӧжӧн котыртас кык статья, и то лоӧ тырмымӧн. Ме думысь, медыджыд бедаыс сыын, мый журналистскӧй водзмӧстчӧмыс да нырисыс и оз тырмы. Ӧти делӧ — гижны кывбуръяс, висьтъяс; мӧд делӧ — петкӧдлыны миян олӧмысь збыль процессъяссӧ коми мортлы гӧгӧрвоана фактъясӧн. А ӧні редакцияын комиӧдӧны ки уланыс веськалӧм уна ковтӧм материал. Темаяс водзвыв индытӧг, авторъясӧс корсьтӧг, дерт жӧ, бур публицистика оз ло.

Казялӧны татшӧмторъяссӧ и асьныс гижысьяс, и критикъяс, да и лыддьысьысьяс. Но ставӧн нин, тыдалӧ, ӧвтыштісны журнал вылӧ кинас. Пӧжалуй, абу на кольӧма веськодьӧн журнал дінӧ Василий Лодыгин. Со и сёрнитіс собрание вылын медвеськыд кывъяснас. Г. А. Юшков аслас кывкӧртӧдын чуксаліс петкӧдлыны гижӧдъясын коми характер. Геннадий Анатольевич пока велӧдіс, книготоргын пӧ бара нин куйлӧ ыджыд список коми книгаяслӧн, кодъясӧс лӧсьӧдчӧны мӧдӧдны макулатураӧ. Сэсся Юшков «чепӧльтіс» челядьлы «Би кинь» журналӧс. Каньяс пӧ сэні нявзӧны рочӧн — «мяу»-кайтӧны, и да ракаяс пӧ вунӧдӧмаӧсь чужан кывсӧ: «крав-крав» пыдди пӧ «кар-кар» горзӧны. Ӧти-кӧ, «мяу»-ыс журналын эз петав: мӧд-кӧ, кутшӧм кывйысь нӧ артмӧма «карзыны» кывйыс, коді эм быд коми словарын?

Пӧльзуйтча газетӧн и сьӧлӧмсянь чолӧмала Г. А. Юшковӧс юбилейӧн — 60 арӧс тырӧмӧн. Сиа сылы бур дзоньвидзалун, вермӧмъяс гижан уджас.

«Войвыв кодзув» журналса главнӧй редактор Е. В. Рочев, кодлы сьӧлӧм вылас воӧма Б. Н. Ельцинлӧн войвывсаяслы льготаяс йылысь указыс, лӧсьӧдчӧ (ог тӧд — ылӧдчӧ али оз-а) петны пенсия вылӧ. Сідзкӧ, ковмас на чукӧртчывны коми гижысьяслы бӧрйыны выль главнӧй редакторӧс. Вайӧ бӧръямӧй сэтшӧмӧс, коді эськӧ водзӧ нуӧдіс медбур традицияяссӧ Яков Рочевлысь да Иван Вавилинлысь, Серафим Поповлысь да Иван Тороповлысь, Владимир Ширяевлысь да Петр Шаховлысь. Ме ассянь кандидатураяссӧ вӧзйи нин.


«Коми му», 1992 вося март.


Гижӧд
Кӧсйи дорйыны — артмис мӧдарӧ
Йӧзӧдан во: 

lkejrlkelkrgner klrjnelknfrkl ekjnrjkenfrej

1