ВИДЗА ЮӦРСТАВМУВЫВСА РЕВОЛЮЦИОННӦЙ ГИЖЫСЬЯСЛЫ
І
Пионер! Лэпты Ичӧтик китӧ, Чӧвтлы миянлань Синмыдлысь Нэриник битӧ. Гӧрд галстуктӧ Кӧртав выліӧ — Миян сьыліӧ. Комсомолец! Медводзӧ пет. Сьылӧмным юргас Ӧтвылысь мед. Ударник! Топыда дор. Мӧлӧтнад кучкав Лючки — Мед торкысьлӧн* Юр чашка шольӧ, Мед вит вося план Артмас нёльӧн! Гӧрдлыйысьяс! «Смирно!» Тіян водзын сулалӧ съезд Гижысьяслӧн, кодъяс Дон гӧрд перӧӧн Перйӧны мезд. СССР-лӧн мыджӧд! Чолӧм тіянлы ыджыд! Ми — капитала му вылӧ Ӧзталам би. Ставмувывса революцияӧс Сьылам ми, туналам. Капиталлӧн Бриллианта пельыс Чунавлӧ, Кор ми сьылам Революция ногъясӧн. Топӧдӧй миянӧс морӧс бердад, Тыш выв ёртъясӧй, Вокъясӧй.
ІІ
Кытісянь локтім ми? Сэтісянь, Кӧн револьвер миянлысь Тупкӧ быд шы. Сэтісянь, Кӧні пӧдтӧ ладан тшын. Сэтісянь, Кӧн туплясьӧ няйтын Уджалысь йӧз, Кӧн амбаръяс польтчӧма няньӧн, Гӧраӧн дізьвидзӧ из шом да пес, Сэтӧні орччӧн (Тшыгысла, кынмӧмла лӧз) Бӧрдӧны челядь. Сэсянь ми локтім. Ми локтім сэтісянь, Кӧн восьлалӧ гӧрд фронтовик, Гӧрд флагӧн шевъялӧ Китайса сикт, Кӧн Англияса горняк Мездысьӧ чептысь, Кӧн тувччалӧ Индияса бунт лэптысь, Кӧн Сакко да Ванцетти ёртъяс. Сэтісянь, Кӧн кашкӧмӧн Барабан шаргӧ, Ракаӧн, кырнышӧн карзӧ, СССР вылӧ Выль война лэптӧ, Гӧрд флагсӧ кӧсйӧ Пасьвартны Капитал чептӧн. Сэсянь, Кӧні Медбур ёртъяснымӧс Виалӧны. Сэсянь, Кӧн сымын ёнджыка Усьласьӧны миян вылӧ, Кымын пӧсьджыка Сьӧлӧмысь киссьӧ Кось вылӧ чуксалан сьылӧм. Сэсянь, Кӧн сісь школа, вичко Йӧзлысь мывкыдсӧ личкӧ. Сэсянь, Кӧн кылӧ: «Чунь пом йывтӧ Окыштыштны — Шуд мый ыштӧм! О, мадамӧй!» Тайӧ чуньыс Удж эз тӧдлы, Тайӧ вомыс Сӧрӧмысла сісь — Отсасьӧны мӧда-мӧдлы Сідз: Тайӧ вомыс Лыйлыны тшӧктіс Бастуйтысь уджалысь йӧзӧс. Тайӧ киыс Радысла Кекӧнач вӧчис да... йӧктіс. Тайӧ чуньясыс сійӧ мадамлӧн, Коді Уж улӧ, пон улӧ водӧ — Сэтшӧма тшӧгӧма! Сюрс пӧлӧс сёяннад Гос пиӧ вӧйӧма. Локтім ми сэтысь, Кӧн сымын ёнджыка йирӧны Пиньнысӧ миян вылӧ, Кымын пӧсьджыка морӧсысь петӧ Кось вылӧ чуксасян сьылӧм. Век жӧ... Быдлаын, му пасьта быдлаын Няйт помӧд пырыс Писькӧдчӧ выль сьылӧм, Шонді югӧрӧн чилскӧ вылӧ. Косьтвывса визулӧн пызйӧ, Зӧм гӧрасянь зэв ыджыд изйӧн Быгыльтчӧ сёнӧ. Увгӧны скӧр гыӧн Му выв пасьта выль шыяс: «Сувт, чеччы, кедзовтӧм йӧз! Гӧрд знамя битӧ ӧзт! Буржуйлы голяас гез! Винтовкаын миян мезд!» Выль сьылӧм, Скӧр шыяс! Тӧв нырӧн Уськӧдчӧй косьӧ — Важ Бакшасьӧм сьылӧм Вылӧ! Сісьмӧм капитал мусӧ Вежӧй... Коді туй шӧрас? Весасьӧй, кежӧй! Сэтісянь локтім ми, Кӧн кашкӧмӧн барабан шаргӧ, Ракаӧн-кырнышӧн каргӧ, Лэптӧ выль война Сӧвет му вылӧ. Сэтісянь локтім ми, Кытӧн выль сьылӧм, Гымалан чуксасьӧм Уличьяс вылын Грымгӧ. Кӧн дзижалӧны миянӧс Дон кӧртӧн, Сы понда, Мыйла ми сьылам Сьыланкыв Гӧрдӧс.
ІІІ
Локтім ми Ылысь: Америкаса паськыд степысь, Аравияса доналӧм лыа вылысь, Сэтысь, Кӧн дзирдалӧ алмаз моз йиыс, Став му пасьта вывсьыс Ӧтчукӧрӧ шывгим. Чолӧм жӧ тіянлы, Сӧвет му пиянлы — Биа пӧсь чолӧм тіянлы, СССР-са Революцияа гижысьяс. Тіян водзын Козин — Тышӧ чукӧстан кывбурным. Ми аддзам: Асъя кыа югӧр пиын Ыпъялӧ Ставмувывса Сӧветлӧн биыс.
ІV
Пионер! Лэпты Ичӧтик китӧ... Комсомолец! Медводзӧ пет... Ударник! Топыда дор... Харьков!* Сойбордтӧ восьты, Топӧд Морӧс бердад аслыд Му выв революцияа Сьылысьясӧс.
Гижысь: 
Гижӧд
Видза юӧр ставмувывса революционнӧй гижысьяслы
Жанр: 
Пасйӧд: 

* Видза юӧр — привет.

* Торкысь — вредитель.

* Съездыс муніс Харьковын.

lkejrlkelkrgner klrjnelknfrkl ekjnrjkenfrej

1