УДМОРТЛЫ

Аттьӧ жӧ тэныд, удмортӧй,
Сё аттьӧ бур кывйыд вылӧ.
Абу на вунӧма вокыд —
Ыстӧмыд юӧртор сылы.

Шудтӧмӧсь тэкӧд ми чужим,
Потансянь торйӧдісны,
Войвывса пармаяс, нюръяс
Миянӧс гычӧдісны.

Роч буржуй миянӧс виис,
Нартитчис быдсяма ног.
Миян став олӧмным вӧлі
Синва да помасьтӧм шог.

Сувтіс став кедзовтӧм йӧзыс
(Терпитіс ёна нин дыр).
Рытывсянь мездлунным петіс,
Дзирдаліг, югъялігтыр...

Асывсянь кыпӧдчӧ кымӧр,
Пемдыны пондіс сьӧд вӧр, —
Комилысь вӧлясӧ кӧсйӧ
Буржуйыд мырддьыны бӧр.

Чеччы жӧ, вокӧй удмортӧй,
Шондіа тэ дінтӧ сет...
Кымӧрысь весалам, югдас —
Садьмас и коми йӧз сэк.

Аттьӧ жӧ тэныд, удмортӧй,
Сьӧлӧмтӧ сетӧмыд вылӧ,
Ыстӧмыд вокыдлы юӧр
Войвылӧ, пармаӧ, ылӧ.