ӦТИК...

Сьӧд вӧр сайсянь дзоргӧ тӧлысь.
Сьӧд вӧр дорын лыйсьысь чукӧр.
Мунӧ ыджыд, чорыд кось.
Клопкакылӧ пищальныс.
Ӧтик, чептын куйлысь пытшкысь,
Омӧль мӧвпалӧма мӧвп.
Гажтӧм лоӧм сылы чептын — 
Гортыс усьӧм дум вылас:
Эз вӧв гортас куим во.
Сьӧлӧм чеччӧ ёна зэв.
________________

Енэж шӧрсянь дзоргис тӧлысь.
Кустъяс пытшкын волі ӧтик...
Кыліс сэсянь клопкӧм шы — 
Лыйис сійӧ ассьыс ки...
Нимкодь ӧні гортас мунас,
Тырмас овны окоп гуын.
Аддзӧ гӧтырсӧ и мамсӧ.
— „Лок жӧ, лок жӧ, дона пиӧй!
Волы, волы, сьӧлӧмшӧр!“
Пызан вылын самӧвар,
Небыд шаньга, выя нянь...
________________

Сьӧд вӧр сайӧ лэччӧ тӧлысь.
Эз мун гортас асьсӧ дойдысь.
Тӧдіс полевӧй суд мыж,
Ыстіс сійӧс гуӧ бӧр,
Ыстіс сійӧс гуас дзикӧдз,
Тыртіс муӧн сылысь гу.
Парма дорын нитшъяс вылын
Тӧдчӧ лыа сора сёй.
Паськыд тӧлысь, енэж пи,
Лӧня видзӧдіс выль гу.