ЛЭЧЫД ГЫЖЪЯ КАНЬОліс-выліс налим сера кань, Еджыд уска, пышыд бӧжа ань, Сёйис чӧскыд йӧв да выя нянь, Ачыс вӧлі мича да зэв шань. Зіль зэв вӧлі — войбыд кыйис шыр, Луннас мыськис ассьыс мича ныр, Шонді водзын вермис узьны дыр, Узигмозыс мыйкӧ мойдіс пыр. Вӧлі шыльыд, вӧлі госа, тшӧг, Ёна зэв радейтліс чӧскыд нӧк. Кӧзяйкаыс вылӧ петіс лӧг — Мыйла эз лэдз сёйны тшӧктытӧг. Талун каньыд кургӧ-сьылӧ, Лабич улын рузум вылын Нёльӧн синтӧм пиа-ныла Муртса веглясьӧны сылӧн. Пияныс зэв шаньӧсь, Любитӧны каньӧс. Со тай найӧ ӧні Зіля нёнясьӧны. Каньыд куйлӧ рузум вылын, Синсӧ читкыртӧма, сьылӧ. Сьылӧм мелі-мелі сылӧн, Мича-мича мойданкылыс: «Кос нянь гиджгӧ шыррр, Пышкай лэбзьӧ жбыррр, Сылӧн ёсь зэв ныррр, Лок жӧ татчӧ пыррр!» Пышкай пыдди пырис пон, Ош кодь скӧр да ӧш кодь ён. Сійӧс лабич увлань кыскӧ нырыс: Чӧскыд каньпи дукӧн сійӧ тыри. Тувччӧ каньпиланьӧ кокыс, Кань вылӧ уськӧдчӧ лёкысь. Кань чеччыштіс шарс, Сьӧвзис понлы карс, Гӧн сувтӧдіс варс — Лои быттьӧ барс. Сэсся уськӧдчис пон вылӧ, Банбокас сетӧбтіс сылы, Ӧтарас и мӧдарас Гыжнас вӧчис сылы пас. Понйыд повзис, пышйис ылӧ, Лёкысь лявзӧ кильчӧ вылын. Каньыд век на мурзӧ-сьылӧ: «Эн тэ усьлась пиян вылӧ, Кытшовт мӧдысь найӧс ылі, Дзонь коляс сэк ныр и сьылі!» Каньыд миян бур, Прӧстатӧ оз дур. Пон кӧ мыччас юр, Гыж улас эн сюр! Тодмышкалас пыр — Пасъяс понлысь ныр, Нявзіг-мурзігтыр. Каньлӧн сьӧлӧм пуӧ, Скӧра понлы шуӧ: «Ветлӧдлы туй шӧрӧд, Керкаӧ эн пыр! Каньпиян эн вӧрӧд, Жалит ассьыд ныр!» Лабич улын миян Тивзӧны каньпиян, Тіралӧны, кӧдзыд: Гурйыв восьса ӧдзӧс. Мамсӧ виччысьӧны: «Кӧн нӧ сійӧ, кӧні?» Пиян дінӧ водіс каньыд, Збой сьӧлӧма аньыд. Ставсӧ ӧтчукӧрӧ вайис, Лапанас шымыртіс найӧс, Нюмсидзис-чукыльтіс юр Да и шуис: «Куррр, Челядь менам буррр!» Тірзьысь каньпиянӧс шонтіс, Небыд кывнас нювны пондіс. Вунӧдӧма каньыд — Мышкас сылӧн аня, Сійӧ вунӧдӧма дзикӧдз: Понлӧн пиньыс тышкасигад Сатшкысьлӧма сэтчӧ, Кытысь вир со лэччӧ. Кань оз тӧждысь, шуӧ: «Узьӧй да йӧв юӧй, Понйыс весьсӧ увтчас мед, Пиян некодлы ог сет!» Аттӧ, каньыд кутшӧм ён: Пышйӧ сыысь ыджыд пон!
