КОМИ ЙӦЗЛЫ

Сувталӧй, коми йӧз, чеччӧй,
Ёна нин узим ми дыр!
Выль олӧм аслыныд вӧчӧй,
Правдалы веритігтыр!

Гажсӧ тэ ньӧтчыд эн аддзыв,
Юисны пыр тэнсьыд вир!
Шойччывтӧм спинанад озыр
Вӧчлывліс унаысь пир.

Медбӧръя няньтортӧ вомсьыд
Нетшыштліс тэнсьыд лёк морт.
Сэки, кор пируйтіс озыр,
Кырсь йирин, гӧль коми ёрт.

Виисны яндысьтӧг тэнсьыд
Коми кыв ёна нин дыр.
Вины оз вермыны ньӧтчыд,
Коми кыв миян оз быр!..

Витсё во рабствоын олін:
Эн лысьтлы кыв шуны сэк...
Быдласянь быд ногӧн тэнӧ
Озыр йӧз кедзовтіс век.

Му вылын шонді ӧд петӧ...
Садьмӧдчы, коми йӧз, ов!
Лёкъяс да озыръяс тэнсьыд
Вины оз вермыны лов!