ӦТВЕТ

Ты жива еще, моя старушка?
Жив и я. Привет тебе, привет!
Кӧдзыд войтӧв йиӧн кодыр пушкӧ,
Кодыр нинӧм вылӧ гаж оз пет,
Сьӧлӧмлысь кор вемсӧ йирмӧг йирӧ,
Сӧнті вирыс визъялӧ кор сирӧн,
Тыртӧм лым эрд вылын кодыр вой, —
Муса юӧр лӧньӧдыштлӧ вой.

Тӧда: жеба шонтӧ арся югӧр.
Тӧда: сьӧлӧмлӧн кӧдзалі жар.
Нимкодь мем, мый дзикӧдз ме эг жугав,
Кӧть и пушкӧ йирмӧгӧн сёр ар.
Медым менам лӧнис кӧ яр шытӧв,
Медым луныс катовтчӧ кӧ рытӧ,
Мед и выльысь шонді кӧ оз пет —
Ставыс «медым», ставыс дзикӧдз мед!

Пыдын-пыдын кӧнкӧ сьӧлӧм пытшкын,
Сьӧлӧм вемас, сьӧлӧм шӧрас эм,
Выйим би кинь, выйим, коді бытшкӧ,
Бытшкӧ сэні ёсь-ёсь йыла ем.
Сизим сюрс верст сайӧ мед жӧ нуас
Кӧдзыд пошта гӧрд шӧвк шоныд юӧр.
Мыйла сьӧлӧм мусӧн тыр — ог тӧд,
Аслым ачым ог куж сетны тшӧт.

Гашкӧ сійӧн, чужан муын кыа,
Сэтшӧм мича тувсов асыв, дон;
Гашкӧ сійӧн: жугыль Эжва лыа
Менсьым коркӧ пальӧдлывліс он?
Али сійӧн: ӧтчыд гудыр рӧкыс
Тальччис менсьым сьӧлӧмвывса ӧгыр...
Кусі ӧгыр, кусі би кинь жар,
Вына сьӧлӧмлӧн ӧзйылӧм яр.

Норасян ме вылӧ, муса ёртӧй —
Письмӧ месянь, юӧр абу дыр,
Но ме гижа воча тэныд гортӧ
Быд гижӧдтор вылӧ пырысь-пыр.
Кодыр ӧмидз рӧма арся рытын
Сьыла гора сьыланкыв ме шытӧг,
Ок, сэк чеччӧ ӧгыр сьӧлӧм брун.
Ок, оз лок сэк менам чӧскыд ун.

Онзіль — сьӧлӧмӧйлысь восьтӧ ӧбӧс
Кольӧм вӧлӧмлӧн нюдз жугыль гор.
Розӧвӧй шӧвк тӧбйӧн сьӧлӧм тӧбӧ
Бузган шутёвтӧм вӧлӧмлӧн шор.

Сы понда ог шогсьы ме вӧд ньӧти
Мыйысь туша-рожа ичӧт, жеб,
Сы понда ог шогсьы ме вӧд, кӧть и
Водзӧ вывлань помӧдз ме эг лэб.
Шогся сы понда ме, ёртӧй, сӧмын,
Мыйла сӧдзва синмӧй абу рӧмыд,
Мыйла лов оз лэпты юны стӧч
Шӧвк-кашемир асъя кыаӧдз.
Эськӧ сэки, сэки сьӧлӧм кылӧм,
Сьӧлӧм ыпйӧм-доймӧм лӧнис тшук,
Эськӧ сэки вӧтӧй пыр мем кыліс
Кольӧм томдыр, тулыс, муса друг.
Мед жӧ гартчас сьывйӧ нюгыль тасыс
И шувкнитлас тӧлӧн долыд расыс,
Долыд расыс мусӧн ворсыштлас
Ӧти секунд, ӧти минут, час.

Тӧда: кывбур менам гӧгӧрвотӧм.
Тӧда: сьӧлӧм тіпкӧм гудыр, лёк.
Тӧда: менам йӧй бӧб сьӧлӧм потӧм —
Некодлы гӧгӧрвотӧма шог.
Лӧня ломзьӧ — дзирдӧ мича кыа...
Эк тэ, шыась, муса ёртӧй, шыась,
Вынӧн тырас мед рудзмунӧм ки,
Медым кусас курыд сьӧлӧм би.
Тӧдса меным, аньӧй, мортлӧн сьӧлӧм,
Быд тіпкыштӧм гора кучкӧ мем.
Тӧда: мывкыд сьӧлӧмӧс оз ӧлӧд,
Ва нидзув кор нёнялӧ юр вем.