КОЛЛЬӦДӦМ

Рытъя кыа узьны водіс,
Кусі рытъя кыа би,
Бӧбмӧм сьӧлӧм, тэ нӧ коді?
Моякылан, ичӧт пи?
Вокзал ломзьӧ югыд биӧн,
Чӧв ланьтӧма ывла выв.
Гашкӧ, сьӧлӧм, тіпкан сійӧн,
Мый лачалӧн кылӧ кыв?
Морӧс менсьым гажтӧм жмитӧ.
Асъя кодзув, вай тэ китӧ,
Кыдзи ветлін ме том дыр,
Югыд лача-н кутін дыр!
Тӧда, войыс синсӧ тупкас,
Синсӧ куняс арся вой.
И юр вылам меным шупкас
Гудыр эшкын — сьӧлӧм дой.
Тӧда — аски чеччас асыв,
Гажтӧм асыв восьтас син:
И вот быттьӧ пемыд расын
Тшӧк ланьтӧма оланін.
Тшӧк ланьтӧма олан жырйӧй,
Сӧмын котралӧны шыръяс.
Оз мем нюмъяв ичӧт ныв,
Аньлӧн кӧдзыд гор оз кыв.
Шонді ворсӧ мӧдар боксянь,
Мӧдар боксянь вӧзйӧ гаж...
Тэ пӧ, зонмӧ, мыйла шогсян,
Быттьӧ сьӧлӧм чегӧм каж?
Кодлы колӧ тэнад шогыд,
Кодлы муса нюдз кывбур?
Тэнад лӧня оланногыд
Кодлысь пестас сьӧлӧм, юр?
Быттьӧ он тӧд, шу тэ «к чёрту!»
Тӧдан, абу сэтшӧм мортыс.
Олан гаж корсьӧ быд лов,
Тэныд ли гажлун оз ков?
Лудік ваджзьӧдӧ стен кузя,
Лудік пышйӧ крӧватьсянь.
Ыджыд жырйын ӧтнам узя.
Тырмас узьны, тырмас, шань!
Мӧвп лэбалӧ рытыввылын.
Сьӧлӧм пытшкын гажтӧм ун.
А ёна-ӧ сійӧ ылын.
Выль аддзысян гажа лун?
Рытыввылӧ грымгис поезд.
Меным коли сӧмын войыс.
Войыс пемыд, войыс кузь.
Войтыр олӧ. Ме ог узь?