ЗЭВ ЫДЖЫД КЕРКА МИ...

Сьӧд-пемыд гу вылӧ посньыдик изъясысь,
Пӧсьысь да мудз сьӧлӧм синваясысь
Зэв ыджыд керка ми — зэв ыджыд керка ми — 
Лэптамӧ уджалысь йӧз.

Ёнлунла тіралам. Чорыдӧсь сойясным.
Кужам ми вӧчныс, кӧть пемыд на сэн.
Сыркнитам керка ми — сыркнитам керка ми — 
Вылӧ нин кыптӧма стен.

Букыша видзӧдӧ кымӧра енэжыс...
Мудзысла уси нин вель уна йӧз...
Зэв ыджыд керка ми — зэв ыджыд керка ми — 
Лэптамӧ уджалысь йӧз.

Ру пытшкын, пемыдын зэв вылӧ кыпӧдчас,
Шонді моз разӧдас сьӧд-пемыд вой.
Кӧрт кодьӧсь лоам ми — кӧрт кодьӧсь ёнӧсь — 
Разьсялас кӧртӧда сой.

Ёнджыка, ёртъясӧй!.. Эн повзьӧй нинӧмысь — 
Сюрӧма туйыс ӧд, со сійӧ тан...
Эскан кӧ асывлы — эскан кӧ асывлы — 
Мудӧдсӧ пукты тшӧтш, пан...

Сьӧд пемыд гу вылӧ посньыдик изъясысь,
Пӧсьысь да мудз сьӧлӧм синваясысь
Зэв ыджыд керка ми — зэв ыджыд керка ми — 
Лэптамӧ уджалысь йӧз.