ДАС ВИТӦД
Тувсов вой — Зарни чой... Енэж пасьта кыа. Саридз — шыльыд ной — Узьӧ, оз кыв шыыс. Пыжаным оз кой. Гӧгӧр чӧв, Шы ни тӧв. Петав, лэптысь, ыдждыв, Вой саридза тӧв! Сэки парус пыжным Тюлас, кыдзи ньӧв. Пестӧй би! Турдӧ ки. Моякылӧ сойӧй, — Сынім лунтыр ми, Локтіс вой шӧр войын Саридзшӧрса ді. Зэв нин сёр — Асъядор. Бипур дорын том йӧз. Сёрни — серамсор Нюмдӧмаӧсь вомъяс!.. Сӧмын ӧти — нор. «Тэд, бур вок, Мыйысь шог? Мыйла нӧ тэ жугыль? Юрад кутшӧм мог? Мыйла оз пет нюмыд? Висьтав, пӧльӧ, лок!» «Эк, бур морт, Ичӧт ёрт! Саридзын мем лои Эськӧ гу и горт. Муртса татчӧдз вои... Кывзы вай, бур морт! Миян сикт Ставнас дзик Коммуна сэк вӧлі. Вӧлі няньысь пик. Олім уна тӧлысь Чери вылын ми. Вӧлі ар. Кӧдзтӧм пар. Пыжӧн ветлім туйӧ Дас вит коммунар — Сюӧн вежны нуим Чери, сьӧла, тар. Локтам... лун... Нэм оз вун, Кутшӧм гыа вӧлі; Тайкӧ пыж оз сун. Йӧткис, ызгис тӧлыс: “Тэрмась, тэрмась, мун!”... Кырныш кодь Парокод Уськӧдчис ми вылӧ, Вӧтіс эстчӧ со. Кутіс... Сэки вӧлі Дас кӧкъямысӧд во. Капитан, Англичан, Шуис: “Бара сюри — Коммунаръяс тан! Лэдзӧй увлань юрӧн Саридзӧ сун-сан!” Зына трум. Гысянь шум, — Дас витӧн ми сэні... Войбыд йирис дум. Ковгис крейсер стенӧ Гыыс зым да зум. Ёртъясӧс Лыйлісӧ. Мӧда-мӧдыс бӧрысь Ваӧ лэдзисӧ. Ме вӧлі медпӧрысь — Коли медбӧрӧ. Капитан, Кырныш-пан, Сьӧвзис меным синмам. Чургӧдіс наган. Садьтӧм код... эз инмы. Ваӧ ме — сун-сан, Мый эм вын, Сойӧй, сын! Гыыс тыртӧ, пӧдтӧ. Выныд сёйтӧг — джын! Сьӧлӧмӧй, сет ӧдсӧ — Кыдзкӧ ловйӧн мын! Ді со эм!.. Вои ме... Дас нёль шапка валыс Вайис діӧ мем... Гыыс кулӧм налысь Сьыліс... сьылӧ нэм! Дас нёль морт Аслыс горт Аддзис саридз пиын. Тӧд вылам быд ёрт — Талун, другъяс, сійӧн Татшӧм жугыль, нор. Тӧдса мен Сиктса вен, Киссис вирным уна... Но... эн шогсьӧй, эн — Ӧні выль коммуна Дзоридзалӧ сэн». Висьтлы пом. Войтыр том — Сьӧлӧмъясныс гыа: Збыль-ӧ тайӧ пом? Чужӧманыс кыа — Югыд син и вом. Тувсов вой — Зарни чой. Енэж пасьта кыа. Саридз — шыльыд ной — Узьӧ, оз кыв шыыс. Пыжаным оз кой. Гӧгӧр чӧв, Шы ни тӧв. Петав, лэптысь, ыдждыв, Вой саридзса тӧв! Сэки парус пыжным Тюлас, кыдзи ньӧв!
Гижысь: 
Гижӧд
Дас витӧд
Жанр: 
Пасйӧд: 

Зына — дука

Лыйлісӧ, лэдзисӧ — лыйлісны, лэдзисны

lkejrlkelkrgner klrjnelknfrkl ekjnrjkenfrej

1