СЬЫЛАНКЫВ

Сьӧд синкымӧса, сьӧд синма
Мича, муса зон тай
Сьӧлӧм вылӧ воис меным,
Вунӧдны ог вермы.
Кыдз ме лоа сэтшӧм шуда — 
Сылы мусма, ог тӧд...
Котӧрта ме паныд зонлы,
Сьывъяс сылы ӧшъя.
Топӧда ме, окала ме
Мича, муса зонмӧс,
Висьтала, кыдз радейта ме,
Сьӧлӧмыс мед бурмас.
Паныдалі мича зонмӧс
Йӧзтӧминын, ӧтнам,
Ӧшйи эськӧ сылы сьывъяс, — 
Гӧрддзасьӧма горшӧй...
Лӧсьӧдалӧм кывъяс пыдди
Сыркъялӧмӧн бӧрддзи,
Ёна синва шорӧн кисьті,
Кытчӧдз зон эз шыась.
Сэтшӧм кывъяс сійӧ шуис:
«Сьӧлӧмшӧрӧй, нылӧй,
Он мӧй аддзы, кутшӧма ме
Жугляся пыр ӧнӧдз...
Ог лысьт вӧлі, муса-й менам,
Ӧти кыв тэн шуны,
Чайта вӧлі, серам кындзи,
Нинӧм тэсянь оз ло...
А тэ, вӧлӧм, радейтан жӧ,
А тэ, вӧлӧм, менам...
Тайӧ лунсянь, тайӧ войсянь
Мӧда-мӧдӧс аддзим».
Сэсся зонмӧй, муса зонмӧй,
Топӧдіс сывтырнас,
Окаліс да, окаліс да, — 
Синва менам косьмис...