***

Овлі кыдзи пемыд вӧрын,
Пуяс мозыс шатлалі.
Комсомолӧ пырӧм бӧрын
Уна буртор тӧдмалі.

Войдӧр ветлывлі вичкоӧ,
Енлы зіля кевмысьлі.
Ӧні пыри комсомолӧ,
Поп гыж улысь мездыси.

Энӧй дивитӧй, мам-батьӧй,
Комсомолӧ пырӧмысь.
Ог ме вина ю ни, матькы,
Дугда лёк ног дурӧмысь.

Комсомолӧ гижсьӧм бӧрын
Газет куті судзӧдны, — 
Мамлы-батьлы ужын бӧрын
Быд рыт понді лыддьыны.

Миян сиктын комсомолъяс
Вылысь олӧм дорысьяс.
Ставныс найӧ зэв шань зонъяс,
Ошкӧны тшӧтш пӧрысьяс.

Босьтӧй менӧ, комсомолъяс,
Аскӧдныд тшӧтш уджавны.
Пыркниті нин узян онъяс,
Дӧзми прӧста шлёнъявны.

Регыд-регыд тулыс воас,
Пулӧн коръяс вежӧдас.
Комсомолӧн Миша лоас:
Выль ног олӧм лӧсьӧдас.

Комсомолеч газет новлӧ,
Сикттӧ ёна югдӧдӧ,
Отеч Ласей енлы кевмӧ,
Ад вомӧ мед веськалӧ.

Ог мун, мамӧ, Сидӧр сайӧ,
Уна тшӧктӧ вӧчны кур.
Комсомолеч менӧ вайӧ,
Оз ков пуны самӧкур.

Мыйысь нӧ тэ, мамӧ повзин, — 
Быд лун сундуктӧ лышъян?
Комсомолыд оз кор козин, — 
Чувки-кепысь, кузьчышъян.

Оз ков шӧрасьӧм ни, вурсьӧм,
Оз ков уна сикас нянь.
Сӧмын исполкомын гижсям,
Гӧгӧр сэсся лоас шань.

Мамӧ менӧ войдӧр видліс 
Комсомолӧ пырӧмысь.
Ӧні ошкыны бӧр кутіс
Омӧльтор кор бырӧді.

Сиа коми комсомоллы
Бура овны, уджавны,
Выльысь олӧм зіля дорны,
Важлысь лёксӧ пузлавны!