МЕД ПАСЬКАЛАС, ШЫЛЯЛАС «ОРДЫМ»!

Дыр нин зэв мырсисны, уна пӧсь кисьтісны, уна вын пуктісны — сук парма пӧвстӧ кӧсйылісны писькӧдны ордым. Босьтчылісны ёна пиньӧн-гыжйӧн писькӧдчыны, заводитлісны розьӧдны-писькӧдны — сӧмын сук пармаса лӧптӧн бӧр пондіс тырны, вӧрсявны, вошны...

Дыр олӧм бӧрын, ки-кок ёнмӧм бӧрын, выль ён лэчыд черъясӧн, пӧсь сьӧлӧмӧн, босьтчисны выльысь писькӧдны. Важ ордымлысь туйсӧ корсисны, розьӧдісны важ туйӧд, писькӧдісны. Ӧні векньыдик ичӧтик ордым кузя ветлам нин, огӧ нин вошӧй парма пӧвстӧ. Ордым кузя мунігмоз ёна пасъялам, пыр водзӧ писькӧдам, увъяссӧ-бадьяссӧ весалам, шыльӧдам, паськӧдам, мед сійӧ ордымыс став пармаса войтырлы, став коми йӧзлы тӧдса лоас. Мед сійӧ ордымыс пармаса войтырӧс петкӧдас ыджыд паськыд туйӧ. Ордым кузяыс повтӧг водзӧ пыр тувччаламӧй паськыд чорыд туй вылӧ. Паськыд чорыд туй кузя водзӧ петамӧ выль долыд гажа олӧмлань.

Мед жӧ олас, паськалас-шылялас парма пӧвстӧ «Ордым».