КОМИӦН ВЕЛӦДӦМ ДА РОЧ КЫВ ИЧӦТ ШКОЛАЫН


Октябрса революцияӧдз коми крестьяналӧн челядьыс велӧдчисны роч школаын: велӧдысьясыс вӧліны рочӧсь, лыддьысисны рочӧн гижӧм нигаяс вылысь. Сёрниыс школаас муні рочӧн жӧ, весиг эз позьлы челядьлы сёрнитыштны комиӧн урӧкъяс костас. А челядьыс вӧліны дзик комиӧсь. Гортаныс найӧ пыр сёрнитісны дай мӧвпалӧны вӧлі комиӧн. Роч школаясын жӧ велӧдчисны и мукӧд пӧлӧс сёрниа йӧзлӧн челядьыс. Ас кыв шы школаысь вӧлі шыбитӧма.

Дерт, 7–10 арӧса коми челядьлы ыджыд отсӧг йӧзкостса оланног тӧдмавны да ывлавыв (природа) вежӧраліг роч школаыд эз вермы сетны: унджык велӧдчан кадыс вӧлі мунӧ роч кывсӧ тӧдмалӧм вылӧ. Мӧд ног сэки эз и вермыны велӧднытӧ: сар правительство эз зіль школа пыр йӧзсӧ югдӧдны, эз тӧждысьлы крестьяна овмӧс кыпӧдӧм йылысь. Школа вылӧ сар правительство видзӧдіс мӧд ногӧн:

«Став ас кывъя ичӧт йӧзӧс велӧдігӧн колӧ пӧртны найӧясӧс рочӧ, ӧтлаавны рочьяскӧд» — гижліс йӧзӧс велӧдан удж нуӧдысь министерство 1870 воӧ.

Октябрса революция сетіс быд ас сёрниа йӧзлы ас кывйӧн велӧдчан школа. Октябр 31 лунӧ 1918 воӧ йӧзӧс велӧдан удж нуӧдысь Комиссариат шуис: РСФСР-ын олысь ас кывъя йӧз пӧ вермасны лӧсьӧдны велӧдчӧм ичӧт школасянь ыджыд школаясӧдз ас кыв вылын.

Коми йӧз ичӧт школаясын челядьсӧ велӧдӧны комиӧн. Велӧдчысь челядь ӧні школаын гортса мозыс жӧ сёрнитӧны да мӧвпалӧны комиӧн, лыддьысьӧны коми нига вылысь. Мед челядь ёнджыка велалӧны, мед школаын велӧдӧм чорыда пырас челядь юрӧ, став уджсӧ школаясын нуӧдӧны челядьыскӧд коми кыв вылын. Ӧнія школа оз кӧсйы пӧртны челядьӧс рочӧ, оз жӧ кӧсйы дзикӧдз эновтны и роч кыв. Велӧдчысьяс мӧд вонас тӧв шӧрсяньыс школаын заводитӧны тӧдмавны роч кыв. Колӧ шуны — оз на быд школаын велӧдны челядьӧс нёльнан восӧ дзик комиӧн. Первой кык восӧ кӧ унджык школаас велӧдӧны комиӧн, мӧд кык вонас ёнджыкасӧ велӧдчӧмыс мунӧ сора кывйӧн: кыті рочӧн, кыті комиӧн. Вуджлӧны и дзик роч кыв вылӧ, — сӧмын, дерт, шочджыка-а. Роч кыв вылӧ вуджӧны велӧдысьясыс — абу на тырмымӧн гырысьджык челядьӧс велӧдан нигаясыс да. Сэсся тэрмасьӧны регыдджык велӧдны челядьӧс рочӧн сёрнитны-гижны, мед вермисны найӧ пырны шӧр школаӧ (сэні рочӧн на жӧ велӧдӧны). Тшӧкыда сэсся велӧдчысьяслӧн бать-мамныс воча шыасьлӧны комиӧн велӧдӧм вылад. Кежӧдӧны велӧдысьтӧ школаын роч кыв вылын уджалӧм вылӧ.

Комиӧн школаын велӧдӧм вылӧ коми крестьяна шулывласны: мыйла пӧ тадзи вӧчисны, мыйла коми кывйӧн кутісны велӧдны. Кодлы пӧ колӧ комиӧн велӧдӧмыс. Челядьыд ӧд коминад кужасны сёрнитнытӧ и коми кывтӧ велӧдтӧг. Миян крестьяна унаӧн на видзӧдӧны школа вылӧ ӧнӧдз важ моз. Школалысь ӧнӧдз на виччысьӧны сӧмын роч кывйӧ велӧдыштӧм.


Колӧ быть комиӧн велӧдны.


Ӧнія школа вылӧ ми видзӧдам мӧд ногӧн: школа дорӧ челядьысь выль олӧм тэчысьясӧс. Мед найӧ кутасны кужны ӧтвылысь кыпӧдны крестьяна овмӧс. Сідзкӧ, унатор вылӧ на, роч кывсьыд кындзи, колӧ велӧдны школаад. Челядьӧс быдтӧм-велӧдӧм йылысь наука (педагогика) шуӧ: мед пӧ велӧдчӧмыс бурджыка мунас, челядьӧс колӧ велӧдны ас сёрнитан кывнас.

Мӧдарсянь кӧ видзӧдлам — став важ олӧмыс велӧдӧма миянӧс коми кывтӧ увтыртны, пыдди сійӧс не пуктыны. Сы вӧсна крестьяналы ӧнӧдз на кажитчӧ, — комиӧн велӧдчӧмыс быттьӧ абу и велӧдчӧм кодь. Найӧ мӧвпалӧны — позьӧ бура мыйкӧ вылӧ велӧдчыны сӧмын роч кыв вылын. Сӧмын пӧ роч кывйӧн гижӧм нига вермас мортлы сетны уджалан сямсӧ да вежӧрсӧ.

Вӧлӧмкӧ абу сідзи, — ми огӧ на тӧдӧ ас кывлысь донсӧ. Быдӧн ӧні шуасны — ӧнія велӧдчысьясыд пӧ войдӧр, роч школаясын велӧдчысьяс серти, дерт, унджык тӧдӧны, кӧть важӧн и рочӧн велӧдісны. Ас кывйӧн велӧдчигӧн челядь бурджыка, ӧдйӧджык дай кокниджыка велалӧны. Кор нин найӧ велалӧны грамотаӧ ас кыв вылын, сэки найӧлы ёна кокни и роч кывтӧ тӧдмавны, кокняммӧ водзӧ велӧдчӧмыс.

Мый вӧсна нӧ коми кагаӧс школаын оз позь велӧдны роч кылӧн, мый вӧсна сылы рочӧн велӧдчыны сьӧкыдджык? Ӧти ёна велӧдчӧм морт, Амос Коменскӧй, важӧн нин шуліс: велӧдны челядьтӧ йӧз кыв вылӧ ас кывсӧ тӧдмавтӧдзыс дзик жӧ кагаӧс кок йылас на сувттӧдзыс верзьӧма вӧв вылын ветлыны велӧдӧм кодь. Збыль ӧд сійӧ шулӧма. Бать-мамлӧн кывныс кагалы чужигас оз вудж. Сійӧ быдмигас велалӧ сёрнитнысӧ, кутшӧм кывйӧн сёрнитӧны ас гӧгӧрыс олысь йӧзыс. Коми кагаӧс кӧ чужӧм бӧрас нуан Англияӧ да сэні сійӧс быдтан (кӧть и коми рӧдысь сійӧ вӧлі), сёрнитны да мӧвпавны кутас англичана челядь моз жӧ, англияса кывйӧн. Сёрнитны кага велалӧ ньӧжйӧникӧн, сійӧ оз кут тӧдны ӧтпырйӧ став кывсӧ. Куим-нёль арӧса кага велалӧ нин шуавны 500 кымын кыв. Гӧгӧрвоӧ, вежӧралӧ тайӧ каднас и мукӧд кывъяс, сӧмын шуавнысӧ оз на куж. Школаӧ пыригӧн, ар сизима-кӧкъямыса челядь тӧдӧны нин став кывсӧ уджалӧм-олӧм йылысь. Ичӧтдырйи челядь тӧдасны сӧмын сэтшӧм кывъяс, кодъясӧн нимтӧма матыс гӧгӧрса олӧмсӧ да уджсӧ. Челядь вермасны сёрнитны сомын асьнысӧн аддзылӧмтор йылысь, асьнысӧн тӧдантор йылысь.

Быд кыв шуиг кагалы вежӧрас шуан кывйыс йитчӧ кодкӧдкӧ, либӧ мыйкӧдкӧ. Шуам, 6–7 арӧса челядь кылас кӧ кыв «сов», — вежӧрас: сійӧ сола, еджыд рӧма, пуктасны шыдӧ; «чери» — вугырӧн кыясны, пуасны да сёясны.

Челядьыс кылӧны коми сёрни, асьныс сёрнитӧны комиӧн, мӧвпалӧны бара жӧ комиӧн. Мый нӧ лоӧ челядьтӧ кӧ ваян школаӧ да пырысь-пыр жӧ роч кывйӧн босьтчан велӧдны? Зэв сьӧкыд сэки челядьыдлы. Ньӧти оз кутны гӧгӧрвоны. Дай рочӧн велӧдӧмыд этша пӧльза сетас: роч кывтӧ прамӧя оз кутны тӧдны, велӧдӧмторйыс юраныс омӧля пырас.

Сьӧкыд коми челядьлы велӧдчыны рочӧн. — Сійӧс ми тӧдам асланым велӧдчӧм серти. Зэв сьӧкыда важӧн миянлы сетчыліс лыддьысьӧм. — Лыддян, а лыддьӧмторсӧ он гӧгӧрво. Ме помнита кыдзи школаын ми велӧдім «наизусьт» роч стикотворенньӧ. Сэні эмӧсь татшӧм кывъяс: «только Жучка удалая в рыхлом сене, как в волнах, то взлетая, то ныряя, скачет, лая, впопыхах». Тайӧ стикотворенньӧсӧ велӧдлім школаын мӧд во велӧдчигӧн, а ме вежӧравны куті зэв на дыр мысти сы бӧрын. А тадзи ӧд мунлі унджык велӧдчан кадыс. Тадзи унджыксӧ велӧдчим. Роч кывсӧ гӧгӧрвотӧм вӧсна, школаысь петӧм бӧрын зэв нин этшаӧн босьтлывлісны киӧ нига лыддьыны. Унджыкыс школаысь петігӧн нэм кежлас шыбитлісны нигатӧ. Недыр мысти сэсся дзикӧдз вунӧдлісны гижны-лыддьысьны. Роч кыв — тӧдтӧм кыв эз вермыв коми челядьтӧ велӧдны радейтны нигаӧс. А сӧмын ӧд нига вермас сетны мортлы тӧдӧм, уджалан сям.

Челядьӧс велӧдӧм вермас бура мунны, найӧс кӧ кутан велӧдны ас кывйӧн — комиӧн. Сӧмын ас коми кыв пыр коми йӧз вермасны сибӧдчыны «настӧящӧй» грамота бердӧ. Миянлы зэв на ёна дай ӧдйӧджык колӧ велӧдчыны, мед чорыда вермим кутчысьны овмӧс кыпӧдан удж бердӧ. А быд велӧдчӧмлы ӧд увтсӧ (основасӧ) пуктам ичӧт школаын. Сідзкӧ, колӧ ёна тӧждысьны бур ичӧт школа лӧсьӧдӧм вӧсна. Медводз колӧ зільны комиӧн сэні уджсӧ пуктӧм вӧсна.

Мукӧд местаясын миян Обласьтын (Удӧраын, Изьваын) крестьяна дай школаын велӧдысьяс шуасьлывлӧны — челядь пӧ оз гӧгӧрвоны коми нига гижӧдсӧ, коми нигаяссӧ абу дзик найӧ кывйӧн гижӧмаӧсь да. Колӧ шуны — литература кывйыд ӧд (кодӧс босьтӧма нигаяс гижӧд вылӧ) некутшӧм ас кывъя войтырлӧн абу дзик сёрнитан кыв кодь. Босьтам кӧть рочьясӧс: — оз ӧд быд роч крестьянин сёрнит роч нига-газет (Мӧскуаса) кывйӧн. Сідзкӧ, нинӧмысь ёнасӧ ӧтдортны комиӧн гижӧм нигаястӧ: школаын велӧдчысь коми челядь нига вылысь унджык кывсӧ тӧдасны. Тӧдтӧм кывъяссӧ (кодӧс сійӧ местаас оз шуны) лыддьысигӧн колӧ вежны ас кывйӧн. Челядьлы тӧдтӧм кывтӧ ньӧти оз ков сетны. Сӧмын велӧдысьыслы колӧ ньӧжйӧникӧн челядьӧс вуджӧдавны аслыссикас кывъясысь литература кывъяс вылӧ.


Роч кыв велӧдӧм коми школаын.


Ми огӧ кӧсйӧ вӧтлыны школаысь роч кыв. Роч кыв миянлы абу кутшӧмкӧ ылыстор, сійӧ миянлы колӧ жӧ. Миянлы школаын колӧ велӧдны коми кывйӧн, сӧмын тшӧтш мед велӧдісны и роч кывйӧ.

Комиӧн велӧдігӧн роч кывсӧ велӧдӧм-тӧдмалӧм вылӧ аслыс урокъяс колӧ лӧсьӧдны. Челядьӧс быдтӧм-велӧдӧм йылысь наука висьталӧ: челядьӧс медбур заводитны велӧдны тӧдтӧм кыв вылӧ мӧд вонас, тӧв шӧр бӧрын, кор найӧ буракодь нин кутасны тӧдны грамотасӧ ас кыв выланыс. Миян школаясын сідзи и мунӧ. Медым челядь велалӧны роч кывйӧ, коймӧд да нёльӧд восӧ велӧдчигӧн рочӧн велӧдчӧм вылӧ позьӧ пуктыны 5–6 час вежон вылӧ. Ӧні на миян школаясын роч кывйӧ велӧдан удж абу дзик шыльыда лӧсьӧдӧма, — нёль во школаӧ ветлӧм бӧрын унаӧн на оз кужны прамӧя гижны ни, сёрнитыштны. Тайӧ удж вылӧ 5–6 часысь унджык вежоннас школа оз вермы сетны. Мед этшаджык кадӧн бурджыка вермам велӧдны челядьӧс роч кывйӧ, колӧны бур нигаяс, бурджык велӧданног. Недыр мысти, локтан арсянь, миян школаын лоӧ коми челядьӧс роч кывйӧ велӧдан нигаыд. Позьӧ шуны, школаясын тайӧ уджыс кутас воысь воӧ бурмыны.


Д. Ж.


Гижӧд
Комиӧн велӧдӧм да роч кыв ичӧт школаын
Пасйӧд: 

Авторыс Д. Ж.

lkejrlkelkrgner klrjnelknfrkl ekjnrjkenfrej

1