КОМИ ШКОЛАЛЫ КОМИ КЫВ


Мыйла школаясын велӧдӧны комиӧн.


Сизим во нин школаясын велӧдӧны комиӧн. Сизим во нин ми чукӧрталам, лӧсьӧдалам коми нигаяс. Бура ыджыд уджъяс вӧчӧма тайӧ туйӧд мунігӧн.

Сӧмын уна войтыр тайӧ уджсӧ оз гӧгӧрвоны на. Уна мортъяс мукӧддырйи дӧзмӧмпырысь юасьӧны:

— Мый сэтысь, коми кывсьыс? Кутшӧм пӧльза коми нигаяссьыс?

Миян ногӧн кӧ, ӧні быд морт, коді этша-этша тӧдыштӧджык школаяс йылысь, радейтӧ коми кывтӧ. Мӧд ногӧнсӧ оз и позь. Босьтам коми челядьлысь олӧмсӧ. Гортын, семья пӧвстын найӧ сёрнитӧны куш комиӧн. Сизим-кӧкъямыс арсянь челядьяс локтӧны школаӧ. Школаын ӧні велӧдӧны унатор. Важӧн вӧлі лыддьысьны да гижны кӧ кужӧны, сэсся немтор нин школалысь оз юавны. Ӧні олӧм вешйис ёна водзӧ. Ӧти лыддьысьӧм да гижӧм оз тырмы. Школьникъяс корӧны тӧдмавны ӧнія олӧм, корӧны тӧдмавны кутшӧм туйӧд тайӧ олӧмыс нуӧдӧ, мый сійӧ сетӧ уджалысь йӧзлы. Велӧдысьлы колӧ быд лун ёна висьтавлыны школьникъяслы, быд лун колӧ накӧд ӧтлаын уджавны да бурджыка найӧс туйдӧдлыны.

Верман он нӧ тайӧ уджсӧ нуӧдны ас кывтӧг, коми кывтӧг? Дерт, некыдзи он вермы. Челядькӧд немтор он вермы керны, оз кӧ найӧ тэнсьыд гӧгӧрвоны. Коми челядь гӧгӧрвоӧны сӧмын коми кыв. Та вӧсна и школаясын велӧдӧны комиӧн.


Гижны да лыддьысьны велӧдӧны комиӧн.


Миян, Сӧветъяс Союзын, олӧны уна пӧлӧс войтыр: рочьяс, малоросcъяс, тотараяс, еврейяс, удмортъяс, сідзи водзӧ. Быдӧнлӧн налӧн аслыснога сёрни, аслыссяма олӧм. Ставныс найӧ уджалӧны, кыпӧдӧны олӧм, корсьӧны кокньыдджык туй. Олӧм кыпӧдны вермам сӧмын бура уджалӧмӧн. Бур удж оз артмы куш ӧти вын бертӧмӧн. Быд выль удж вылӧ ӧні колӧ дошлӧй юр, колӧ грамота, колӧ, мед эськӧ ичӧтысянь тэнӧ кыскӧ гижны да лыддьысьны.

Кор мортыд радейтӧ лыддьысьны-гижны? Радейтӧ сӧмын сэки, гӧгӧрвоӧ кӧ сійӧ гижӧдсӧ. Быд йӧз спутю гӧгӧрвоӧ сӧмын аслас кыла грамота.

Сійӧн ӧні и быд ичӧт йӧз кутчысьӧны ас сёрниа гижӧд вылӧ да нигаяс вылӧ.

Сійӧ туйӧдыс жӧ мунам и ми, коми йӧз. Дерт, миянлы сьӧкыдджык кыпӧдчыны. Важӧн, сар дырйиыд коми нигаясыд эз вӧвны. Велӧдчыны вӧлі зэв сьӧкыд. Ыджыдджык грамота вӧлі сюрӧ сӧмын ӧтка-ӧтка войтырлы нин. Унджык йӧзыс вӧлі петӧ школасьыд, сэсся оз нин видзӧдлы нига вылад. Коми велӧдчысьыдлы оз вӧлі сьӧлӧм вылас во гӧгӧрвотӧм, роч нигаыд. Коді важӧн роч школаясын велӧдчывліс, сійӧ вермас висьтавны важ сьӧкыд, гажтӧм томдырся велӧдчан кадса олӧмсӧ.

Со мыйла колӧ миян коми йӧзлы ёнджыка кутчысьны коми гижӧдӧ. Коми гижӧдтӧг ми пемыдысь огӧ вермӧ петны. Коми кывтӧг лыддьысян-гижан удж миян юр вемӧ оз вермы пырны.


Кыдзи югдӧдны коми йӧзӧс.


Та йылысь уна нин сёрнитӧма, ёна нин вензьӧма. Югдӧдны мортӧс верман сӧмын велӧдӧмӧн. Сійӧ быдӧн тӧдӧны.

Сӧмын ёна-ӧ колӧ велӧдны коминас? Кӧні помассьӧ комиӧн велӧдӧмыс? Мукӧдыс шуӧны: комиӧн пӧ колӧ велӧдны ичӧт школаясын первой вояссӧ, а бӧрыннас заводитны рочӧн. Мый вермас лоны тайӧ туйӧдыс кӧ ми мӧдӧдчам? Лоас омӧль уджыд. Ӧти-кык воӧн коми грамота оз сюр. Коми грамотатӧг оз вермы лоны коми нига. Коми нигатӧг дугдас челядьлы вежӧрас пырны велӧдчан уджыс, кыдзи вӧлі важӧнджык. Коми нигатӧг дзикӧдз кусӧ лыддьысьӧмыс гырысь йӧз пӧвстын, кодъяс немтор оз гӧгӧрвоны рочӧн.

Тайӧ туйӧд мунны оз позь. Тайӧ туйыд пемыдлунтӧ оз бырӧд, а ёнджыка содтӧ. Колӧ корсьны мӧд туй.

Кутшӧм туйӧд ми ӧні мунам? Кутшӧм места ӧні сетӧма коми сёрнитан кывлы, коми гижӧдлы? Миян ичӧт школаясын велӧдӧны нёльнан восӧ комиӧн. Школьникъяслы дай гырысь йӧзлы вӧчалӧны гӧгӧрвоана коми нигаяс. Велӧдӧны гижны да лыддьысьны комиӧнджык. Коми грамота воысь воӧ кыпӧдчӧ, мунӧ водзӧ.

Кутшӧм буртор артмӧ тадзи уджалӧмсьыс? Ӧти-кӧ, чукӧрмӧ коми нигаяс. Мӧд-кӧ, паськыдджыка коми йӧз пӧвстӧ пырӧ гижӧд лыддьысьӧмыс. Коймӧд-кӧ, чукӧртӧ став коми йӧзӧс ас гижӧд дінас. Нёльӧд-кӧ, петкӧдӧ коми йӧз пӧвстысь бур гижысьясӧс, туй писькӧдысьясӧс. Позьӧ шуны — аслас кыв вылын грамотаыс коми йӧзӧс вочасӧн петкӧдӧ сьӧд, пемыд вӧрысь.

Воас кад, комиӧн кутасны велӧдны тшӧтш ыджыд школаясын, став коми том йӧзыс кутасны сэні велӧдчавны.

Сэсся миянлы немтор оз и ков. Кымын унджык ыджыд грамотаа йӧз, сымын ёнджыка мӧдас мунны уджыд. Кымын ёнджыка сійӧ мунас, сымын ӧдйӧджык бур олӧм кыптас.

Со мыйла ӧнія мунан туйыд нуӧ коми йӧзӧс югыдланьӧ.


Мыйла колӧ коми йӧзлы роч кыв?


Роч кыв миянлы колӧ. Сійӧ быдӧн шуасны. Роч гижӧд зэв озыр да зэв ыджыд. Роч кылӧн гижӧма уна пӧлӧс нигаяс. Миянлы, коми йӧзлы колӧ, мед эськӧ ми вермам босьтавны сійӧ нигаясысь быд коланторсӧ, мед эськӧ ми вермам рочьяслысь коланторъяссӧ сюйны ас олӧм пытшкӧ. Сэсся ӧд ми нэм чӧжнад унаысь паныдасьлам рочьяскӧд, волысьлывлам накӧд быд боксянь. Со, шуам, ӧні кежлӧ лоӧ на миянлы ветлывлыны велӧдчыны гырысь школаясӧ — рочӧ.

Сійӧн миян коми школаясын велӧдӧны роч гижӧдӧ, роч грамотаӧ.

Коми йӧзлы роч кывйыд сетчӧ зэв сьӧкыда. Мукӧд челядьыс ветлӧдласны школаӧ во нёль-вит, а рочӧн оз тӧдны ӧти кыв, оз вермыны гӧгӧрвоны медся кокни роч нигаяссӧ. Ӧні миян унджык школьникыс зэв омӧля пасъясьӧны (гижӧны) рочӧн. Мам-батьныс дӧзмӧны. Мукӧдыс весиг тшӧктӧ велӧдысьлы шыбитны школаысь коми кыв, велӧдны рочӧн. Челядь корӧны коми нига, а бать-мамыс сійӧс тшӧктӧны шыбитны.


Мый вӧсна коми челядьяс омӧля тӧдӧны роч кыв.


Некор миян ичӧт школьникъяс бурджыкасӧ рочнад эз кужлыны. Важӧн вӧлі велӧдӧны куш ӧти роч гижӧдӧ да лыддьысьӧмӧ, сӧмын школьникъяс, ӧнія моз жӧ, оз вӧлі кужны рочӧн. Школаысь петӧм бӧрти вӧлі роч грамотатӧ ӧдйӧ вунӧдӧны. Мӧд ногӧнсӧ оз и вермы лоны. Мыйла? Со мыйла. Ӧти-кӧ, челядьяс семья пӧвстын да сиктын роч кыв оз кывлыны. Мӧд-кӧ, школаын ас костаныс челядьяс некор эз сёрнитны рочӧн. Коймӧд-кӧ, ӧти урӧкъяснад тӧдмавны роч кывтӧ зэв сьӧкыд.

Сідзи жӧ миян школаясын и ӧні. Сӧмын ӧні челядьяслӧн кужтӧмыс ёнджыка тыдалӧ, ёнджыка тӧдчӧ. Революциясянь коми йӧзыд ыджыда воськовтіс водзӧ. Война бӧрын уна войтыр локтісны гортаныс роч кыв тӧдыштӧмӧн. Уна войтыр ӧні, воысь воӧ, кутісны ветлӧдлыны роч местаясӧд, тӧдмасялавны роч гижӧдкӧд, роч нигаяскӧд. Сэтшӧм войтырыслы, бурасӧ оз мӧвпыштлыны да, дивӧ кодь кажитчӧ, мыйла налӧн челядьясыс омӧля кужӧны рочӧн.

Дерт, мӧдарӧ кӧ шуны, миян школаясын ӧні омӧля на велӧдӧны. Школаяс гӧльӧсь. Нигаяс зэв этша. Велӧдысьяс унджыкыс омӧля велӧдчӧм йӧз. Школьникъяс оз быд лун волывлыны школаӧ. Мукӧдыс во пиас воласны сӧмын тӧлысь кык-куим. Дерт, школаясад татшӧм ковтӧмторъясыд дзугӧны велӧдчӧм уджтӧ, ылыстӧны коми да роч грамотаысь. Татшӧм ковтӧмторъяссӧ колӧ вештыны. Сэки уджыд школаын бурджыка мунас.

Уна войтыр шуӧны: колӧ пӧ ичӧт школаясын роч кывсӧ заводитны велӧдны первой восяньыс. Сідз пӧ ӧдйӧджык кутасны велавны школьникъяс. Мукӧд школаясын сідзисӧ вӧчлісны нин, да немтор бурыс эз ло. Школьникъяс кутісны сорласявны коми да роч гижӧдӧн, кутісны роч кыв гижны коми шыпасъясӧн, а коми кыв рочӧн. Унджык лёк лои, бурыс нинӧм. Миян ӧні школаясын роч грамота заводитчӧ коми гижӧд тӧдмалӧм бӧрти. Школаын кык медводдза вояс бӧрын роч грамота ёнджыка сетчӧ. Сідзи ӧні велӧдӧны.

Медбӧрын ещӧ на ми шуам — велӧдӧм коми школаын оз вермы бурмыны коми грамота шыбитӧмӧн. Сійӧ туйӧд мунны оз позь.


Д. Б.


Гижӧд
Коми школалы коми кыв
Пасйӧд: 

Авторыс Д. Б.

lkejrlkelkrgner klrjnelknfrkl ekjnrjkenfrej

1