ОЛӦМЛӦН ПОТЛАСЬӦМ
Эн узь, чашкӧд синъястӧ!
Узигӧн олӧмлысь гажъяссӧ воштан...
Гожся рытын менӧ малалӧ небыдик, шоныд сынӧд. Сьӧлӧмӧ пырӧ, нӧкйӧн моз мавтыштӧ, небзьӧдӧ корӧгмӧм яйӧс.
Пожӧмъяс! Пашня дорын тшӧтшыд тугйӧн сувтӧмныд тшӧкыда, бӧръя югӧръяс шонділысь кыянныд ті, сынӧдлысь ловъя пӧлялӧмъяс нёнялад сьӧмӧсад! Рӧмдалад, пӧртмасяд, синъясӧс лӧньӧдад...
Тонӧ кыдз ӧтнас шогсьӧ пожӧмъяс шӧрын, вашкӧдчӧ шонді зарниӧн мавтыштӧм коръясӧн, мойдалӧ олӧмлысь туйяссӧ, пессьӧмсӧ, венсьӧмсӧ, пӧрысьӧ вошӧмсӧ. Норасьӧ ньӧжйӧник... Сьӧлӧмад шог тэчалӧ...
Лэбыштіс тӧв ныр, шызьӧдіс, повзьӧдіс, збоймӧдіс норъясӧс, лэптыштіс збойясӧс, шутьнитіс, зургысис вӧр дорӧ, йывъяссӧ вӧрзьӧдіс...
Кусі... бӧр лӧнис, выныс эз тырмы. Тшӧтшыд пожӧмӧ гудрасис. Виччыся водзӧ. Шонді кольччыны кӧсйис, читкыртіс синсӧ, видзӧдліс, мӧвпыштіс, сылі... «Нинӧмла кольччыны... луннас нин удита унатор аддзывны: шогсӧ дай гажсӧ, бурсӧ дай лёксӧ».
Пемдӧ, пемдӧ, пемдӧ... Ме видзӧда... Бара кытыськӧ волыштіс тӧвйыв, бара помасис татчӧ, бара этша вынсӧ вайис. Мыйлакӧ йывнас сӧмын татчӧ локтӧ, оз морӧснас мыдж, оз петкӧдлы олӧм кыпӧдысь вынсӧ.
Виччыся... Со... Сьӧлӧм таркӧдӧ, тіпкӧдӧ, мыйяскӧ виччысьӧ, мыйыськӧ полӧ, чеччалӧ морӧсын... Шутёвтіс ёна, пӧльыштіс чорыда, джын выйӧдз пыркнитіс вӧрӧс. Ылын йиркнитіс, гымыштіс, чорыда мӧдысь, шузьӧдіс сьӧлӧмӧс; шузьӧдіс, вӧрзьӧдіс вужйӧдзыс вӧрӧс, качовтіс пыдӧссӧ. Мӧдіс, мӧдіс, мӧдіс! Чеччалӧ радысла, оз инась вирӧй, пузьӧдӧ сьӧмӧсӧс менсьым.
Виччысьӧмӧн, видзӧдӧмӧн, полӧмӧн син водзысь менам воштысьӧма олӧмсӧ. Вой пемыд вевт улын эг аддзыв матысман кымӧръяс, вошті син водзысь ас гӧгӧр пессьӧмсӧ. Нӧк сынӧд чунялӧм...
Гым менӧ пыркнитіс, садьмӧдіс узьӧмысь, син воссис чардбиысь.
Ме ӧні ола бара, бара сьӧлӧм олӧмкӧд тіпкӧ, кывзысьӧ гым-йирӧ.
Мый лои водзӧ .... ?
Венам ми, садьмысьяс!
___________
Тадзикӧн олӧмын унаысь пальӧдысь, шызьӧдысь, сьӧлӧм паськӧдысь, лов лэптысь вынъяс локтӧны. Воддзаяс кусасны, лӧнясны, выннысӧ туй вылын воштасны.
Медбӧрын волывлӧ гым, чард; гора, чорыда миянӧс бергӧдлӧ, пузьӧдӧ вирнымӧс, косьясӧ тойлалӧ, вунӧдны гӧгӧрся венсьӧмсӧ оз лэдз.
Тадзикӧн олам, буръяссӧ корсям, лёкъяссӧ пыркнитам.
Вунӧдчам — эн пов — пыркнитасны!!
