ЗАРНИ ПОТОК
I
Вӧрса туйяслысь лыддян мӧй помасьтӧм верстъяс, коркӧ верман мӧй тӧдны быд ордымлысь визь? Уна муяс кӧть прӧйдитан, уна кӧть ветлан, век жӧ виччысян, виччысян ичӧтик би, коді мыччысяс вӧр пӧвсӧд кодзув моз ылын... Но кор турӧбӧн ойдӧма, быттьӧ став му, лесопунктлань дзик медбӧръя воськовъяс вылын тэнӧ шымыртӧ кузь туйын чукӧрмӧм мудз. Мыйла норасьны ӧні, кор ставыс нин кольӧма бӧрӧ: ыджыд туй лымъя расъяс пыр. Турӧб. И сап пемыд вой... Выль посёлокын, индісны кыдз, эм контора. Сы дорын лапъяс нюжӧдіс пожӧм — веж лысъяса кузь часовӧй. Медводз татчӧ, дерт, сьӧрысь квартира он кыскав... Да-й, шуны кӧ веськыда, — висьтавны мый йылысь эм! — Комсомольскӧй путевкаӧн петім да партия олӧмкӧд йитім беспокойнӧй став воясысь ассьыным зэв шуда нэм! Вывті мусаӧн кажитчӧ сьӧлӧмлы ичӧтик керка, кытчӧ турӧбыс ӧтнас дзик аддзыны туйсӧ оз куж. Талун быдӧнӧс личкис нин ун... Ӧтнас трудитчӧ пыр мыйкӧ мастер. Коркӧ узьлан-ӧ тэ? Кор тэ эновтан помасьтӧм удж? Пызан вылын чертёжъяскӧд сводкаяс куйлӧны орччӧн; тані — волялӧн, тышлӧн, упорстволӧн лунся итог. Мый тэ мӧвпалан, мастер? Гашкӧ, пырӧм мысть сорси... Абу мастер... Ог тӧд... Мыйкӧ, ог... — Капитан!.. Тайӧ... тэ?.. — Ӧшйӧ сынӧдын нюжӧдӧм киӧй; пызан дорсяньыс ӧдзӧсӧдз сӧмын кӧть шаг, — паметь ловзьӧдіс кольӧм сражениелысь бисӧ, кор окопъясысь кыпӧдчим босьтны плацдарм. Бара ме водзын вӧлі салдат, командир, а эз мастер, коді нюжӧдіс кисӧ да горӧдіс бойын: — Вперёд!.. И народлысь став ярлунсӧ пызйисны пӧсь автоматъяс, уджйӧз мынтыны врагъяслы медбӧръя индісны срок. Уна казьтылӧм та йылысь дыр на ми сьӧлӧмын видзам. Аддза тув йылысь ме боевӧй офицерскӧй планшет. — Тайӧ значитӧ мый, капитан, вочавидз мен, мый двухверсткаӧ важмоз пыр пасъялан тэ? Мастер мудзпырысь сувтӧ... А сы гӧгӧр, — сводкаяс, планъяс. — Наступление мунӧ... А водзын не этша выль штурм Пятилеткаяс индӧны миянлы быдӧнӧс панйыны, а победасӧ дорӧ боецъяслӧн доблестнӧй удж. Став стрелаяс делянкаӧ индӧны, аддзан, кыдз талун ыджыд тышлӧн сэт мунӧ передньӧй край; кылан, — юргӧ призыв, кыдзи бойын: — Страналы колӧ вӧр, уна изшом и нефть, и металл! Асъя рӧмыдын чеччасны йӧз, став бригадаяс петасны бойӧ. Кӧні местаыс менам? Ӧд висьтавны тайӧс оз ков — колям век ми солдатъясӧн: воинлы шуд вӧсна бойын некор ачыс победаыс кокниа киас оз лок. Орччӧн пукалім ми... Важ походъяссӧ казьтыліс мастер. Кыдзи коркӧ, лӧз Дон вылын, топӧдлі сылысь ме ки. Сідзкӧ, тані передньӧй! А бойын — пыр сувтӧны на-смерть да гвардейскӧя видзӧны социализм. Медым юрсияс лоисны кад вотӧдз неуна дзорӧсь, — сьӧлӧм важмоз пыр кольӧ збой томлунӧн удал да яр. Мирын бушколыс пессьӧ... Тэ кылан: не турӧблӧн горыс, — океан сайын пӧльтӧны миянлы паныд война. Ӧдйӧ кыпӧдчӧ мастер да видзӧдӧ кизьӧрмӧм войӧ. Сылысь сьӧлӧмсӧ дойӧн моз кырыштӧ лӧглунлӧн би. — Сідзкӧ, найӧ... И бара отчаяннӧй бойӧ батальон ассьыс кыпӧдны петӧ нин смел командир. Кыдзи индӧма планын да графикын ладмӧма — таргӧ-юралӧ вӧрын пила-автоматъяслӧн шы, сиктса нывъяс да зонъяс командатӧг уджын содтӧны выль порыв. Чужӧ лун вӧрын тадз, кыдз пыр овлӧ тан: лымъя бус пытшкын, водӧ му вылӧ пуяслӧн рад бӧрся рад. Тӧдӧ мастер, мый вӧр вӧсна тышын сійӧ жуглӧ важ мирыслысь кытшсӧ, мырддьӧ талун выль ыджыд плацдарм. Ставсӧ аддзылі ме — вӧрысь вестникӧн лэччи, выль поэмалысь кыски груз. Мирын весьшӧрӧ турӧб пессьӧ, — юргӧ миян победнӧй песня, паськыд ягын победнӧй удж!
II
...Тадзи встретитчим мастеркӧд ми уна, сьӧкыд сраженьеяс бӧрын...
III
Мӧд лун асывсянь Дмитрий Ильич бара пасьтасьны кутіс нин вӧрӧ. Бушков ланьтыштіс, тыдалӧ, шӧйтнысӧ мудзис, еджыд эшкынӧн вевттис делянкаӧ тӧдса нин туй. Но Огнёвлы эз узьсьы... Да кыдз вермис долыда узьсьыны; ыджыд овмӧсын мыйкӧ эз ладмы пыр, делӧ оз мун. Кольӧм лунъясӧ тайӧ делянкаӧ видзӧдліс ачыс директор; ӧчки тасъяса синъясын дзордзаліс шмонитан нюм. — Тайӧ — корсьысьӧм, дерт... Сыын абу нин некутшӧм лёктор... — Сідзкӧ, мыйын жӧ делӧ, директор?.. Вай веськыда шу! Ӧчки тасъяса синъясын ӧзйис ирония-нюмыс: — Кывзы менӧ, Огнёв... Коркӧ вӧлі ме тэ кодь жӧ том, коркӧ вӧлі ме тэ кодь жӧ удал, фантазия ыпъяліс юрын... Дзикӧдз дӧзмис Огнёв: — Эска чорыда — миян поток пырас властнӧя вӧрӧ и будущӧй сы сайын лоӧ, выльлысь лов шысӧ тіян ирония, тӧда, оз кут... Аслам риск вылӧ кӧсъя ме ӧні нин выль квартал шӧрын сідзи котыртны ёртъяслысь коймӧд делянкаын удж, медым мыр дорсянь керлӧн движение некор эз сувтлы, кывтіс сійӧ мед сідзжӧ, кыдз тулысын визувтӧ ва. Миян киясын мощнӧй оружье эм нин — электропила... — Этша сійӧ!.. — Оз тырмы! — Огнёв сылы паныдӧн сувтіс: — Унатор на оз тырмы, но воас, и регыд нин, кад, сё моторъяслӧн зыкӧн став парма кор мӧдӧдчас сьывны, кор став вынйӧрнас войвылӧ локтас великӧй страна. Сідзкӧ, видзӧдны колӧ оз бӧрӧ, а аския лунӧ... Кыдз бой водзын коркӧ решение примиті ме: укрупнённӧй бригадаяс котыртны миян веж вӧрын, быд рабочӧйлы удж, кыдзи цехын жӧ, индӧмӧн сэн. ...Мастер тувччалӧ водзӧ, а сьӧлӧмсӧ сотӧ ӧбида. Оз директоркӧд сёрниыс... Думайтны сы йылысь кор! Выль бригадаӧ пырны И Ненев тшӧтш шуис «спасибо!» — ӧткажитчис Егор. Коді тані оз тӧд крепыд сойяса, зумыд Егорӧс? Тайӧ сійӧ, Егор, мича кудриа, лӧз синма зон, кодлӧн ыджыд портретыс клуб стен вывсянь ми вылӧ дзоргӧ, кодлӧн киясыс тӧдӧны кокни лучковкалысь дон. Сылысь славасӧ мырддьыны мастер оз думайт, оз кӧсйы, некод талун Егорлысь удача оз чинты, оз юк. Кытчӧ вошӧма Неневлӧн выльторйӧ куслытӧм пӧсьлун, мыйла сійӧ, Егор, лоис бокын, потокӧ эз сувт? ...Найӧ быдмисны ӧтлаын, ӧтлаын сӧвмисны сиктын. И Егорлы, и Дмитрийлы сиис лӧз Эжваным шуд. Чужан му дінӧ радейтӧм кыкнансӧ век кежлӧ кыскис вӧрӧ веськӧдны олӧмлысь збойлунӧн тырӧма туй. Ставсӧ помнитӧ Дмитрий Огнёв сійӧс: вӧр вӧсна первой атака, пятилеткалысь лов шы и яг весьтын тракторлысь гор. Найӧ кыкӧн, Егоркӧд, двуручнӧй пила пыдди киӧ, кыдз ударникъяс, босьтісны лента кодь векни лучок. Ой, Егор... Кутшӧм тешкодьӧн сійӧ сэк вӧлі! Да не сӧмын Егор... Уна другъяс эз кӧсйыны дыр кольӧм нэма пиласӧ яг нӧрыссянь вувзьыны толаӧ, кыдзи индыліс вӧчны Огнёв налы пыр. Сэсся слёт вылӧ ветлісны кыкӧн. Егорлы вручитісны знамя. — Сёрнит, славнӧй Егор... — корис сійӧс Рубцов-секретарь: — Висьтав йӧзыслы ачыд, Егор, висьтав миян райкомлы тэ, кыдзи сьӧлӧмад чужис ударниклӧн зэв ыджыд жар? Сувтіс йӧз водзӧ пӧрӧдчысь. Кияссӧ нюжӧдіс водзлань, быттьӧ джуджыд трибунаыс мешайтіс сёрнитны сэк, быттьӧ аддзис Егор, кыдзи восьлалӧ сы синъяс водзын горш купечьяслы керавны вӧр гӧрбыль тушаа дед... — Шуштӧм олӧмыс пармалӧн колис... Выль кадъяс ми тіянкӧд олам... А лучковка кӧ киясын — сӧмын сэк шедӧ успех. Залын юрӧбтіс серам. Егор: — Сідзкӧ, ордйысьны кора ассьым другӧс, Огнёвӧс ме... Чуксала ордйысьны ме! Первой тысячник списокын лои. А Дмитрийлы кольччыны... кытчӧ? Тошка йӧз водзын позьӧ мӧй янӧдны удал, том юр! Дмитрий муніс Егор дінӧ, кисӧ ударниклы мыччис да, мед кылісны быдӧн нин, гораа шыбитіс: — Бур!... ...Дмитрий пасьталіс виж гимнастёрка, войналӧн кор бушколыс кучкис, муніс дорйыны лёк врагысь му, муса ю, чужан вӧрлысь простор. Кольччис татчӧ Егор, кольччис аслас лучок дінӧ звучник, ылі войвылын дорны победа стахановец кольччис Егор. И Огнёвлы пыр кажитчис кӧдзыд блиндажъясын куйліг, кор став мусӧ и сынӧдсӧ сотіс сраженьелӧн би, мый Егор сылы писькӧдӧ югыд победалань туйсӧ, мый накатлӧн быд кер дінӧ сибавліс ёртыслӧн ки. Локтіс Дмитрий Огнёв аслас гортӧ и пӧрччис погонъяс... Сьӧлӧм нетшкысис кытчӧкӧ... Мыйла жӧ чӧв овны мем: асьныд тӧданныд ті, Эжва берегын бордъяссьӧм зонъяс, мый сэк думайтіс бияс да ваяс пыр мунӧм боец! Тадзи воис Огнёв лесопунктӧ и мастерӧн и парторгӧн. Локтіс вӧрӧ Огнёв, кӧні тёльгӧмӧн визувтіс шор, локтіс вӧрӧ Огнёв, зарни лысваӧн киськалӧм ордымъяс кӧні кыисны му вылын медмича, югыд узор. ...Вайис сьӧрсьыс Огнёв помтӧм смеллун, желанье, задор...
IV
Матын юрӧбтіс пӧрӧдчӧм гор. Мастер воськовъяс тэрыба содтіс... Пашкыр лапъяса пожӧмкӧд орччӧн водіс дзор юра зэв ыджыд коз. Бара таргис делянкаыс, юраліс выль сяма шумӧн. Типкис кӧнкӧ мотор, и механик — сьӧд чужӧма зон, став пилаяслы ток сетны дзик ӧти радостнӧй думӧн, кӧйдӧм вомдорас топӧдліс гажаа ворсан рожок. Бара таргисны пилаяс. Водісны му вылӧ пуяс, зарни морӧснас изӧмӧн яг вылысь пуксьытӧм лым. — Век жӧ, мыйкӧ оз тырмы тан... График орӧдіс Анна Туева, — молодёжнӧй, а сетіс — нормаджын! — Мыйын делӧыс? Висьтав, механик, код мыжа? Вына техника киясын, — ставнымӧс панйӧ Егор... Неужели лучокысь, Алёша, тэ думайтан, ныжджык тайӧ техника, тэнад мотор?.. Вочавидзны механик оз куж. Сылы кажитчӧ, ставсӧ сетӧ, пильнӧй кабельӧд токыскӧд ыстӧ пӧсь мӧвп и страсть. Неужели директор... Да-й вермас-ӧ лоны, мый не Дмитрий Огнёв, а директор дзик быдторын прав? Гашкӧ, збыльысь, мечта кыскӧ водзӧ зэв ылӧ пыр менӧ, а мечта — эм мечта, сійӧс олӧмкӧд йитны оз позь, выльлысь лов шысӧ Торковкӧд тшӧтш миян вӧрын кӧ венӧ важ лучковӧй пила, пӧрысь батьясӧн думайтӧм додь! Гашкӧ, Торковлӧн бур осторожность? И виччысьны миянлы колӧ, рельсъяс яг вылӧ водасны кор, и рычагъясӧ велалас ки... Но ӧд водзӧ пыр котӧртӧ тэрыба восьлалысь олӧм, коммунизмӧ обязанӧсь пырнысӧ медводдза радъясын ми! Мыйла ӧшӧдны юрӧс мен... Смелджыка делӧӧ, Дмитрий! Биа сьӧлӧмъяс важӧн нин виччысьӧ помасьтӧм яг. Медым юргӧ пыр ёнджыка выль созидательнӧй ритмын шуда пармалӧн выль, шуда кад. — Ачым абу ме рад... — Коді мыжа... — Тэ висьтав? — А мый жӧ мен висьтавны тіян... Ті — мастер. Кӧзяин... И таысь на унджык — парторг! Тӧдмав налысь со... Мастерлы индӧны кияс сэтчӧ, ӧзйӧны кӧні бияс, сэтчӧ, трудитчӧ кӧн звено.
V
Егорлы пасекаӧ туй ӧд индыны оз ков: кӧн мортлӧн овмӧдчӧма шуд, пыр сэтчӧ кыскӧ лов. Приёмник узьны дыр оз сет: кор сӧмын лоӧ квайт, Егор привычка серти век заказывайтӧ чай. Да-й, шуны кӧ, не сыын мог, мед гижны меным стих: Егорлысь сьӧлӧм йирӧ шог, кор прӧста олӧ ки. А сэсся — пельпом вылӧ чер, мыш вылӧ — кык лучок. Лӧнь ордым вылӧ первой след пыр сылӧн тальӧ кок. А вӧрын рӧмыдыс на лӧнь, Оз кыв ни ӧти шы... Он вермы гӧгӧрвоны, кӧн друг кыптӧ сьыланкыв! Веж лапъяс ӧшӧдӧма коз, кузь пожӧм лэптіс юр: код торкис тайӧ асывводз лӧнь вӧрлысь сьӧкыд дум? ...Мунӧ Егор, сьылӧ Егор, восьлалӧ тэрыба водзӧ; мунӧ Егор, сьылӧ Егор мичлунсӧ лӧнь асывводзлысь... ...Лучкистлы слава да почёт му вылын лоӧ век. Но предъявляйтчӧ кутшӧм счёт и колӧ сетны пыр отчёт, Егор Иваныч, тэн? Тэ вынъяс жалитны он куж, пыр кыскалан лучок; ӧд тэнсьыд шӧри юкӧ шуд горняк и рудокоп. Кыз пожӧм пӧрӧдан, а сэсь зіль плӧтник вӧчас пос, мед тӧвзяс ылӧ водзӧ сэт сьӧд тшынӧн паровоз. ...Лучкистлы слава да почёт му вылын лоӧ век... Ӧд тайӧ тэнад, Ненев ёрт, контораын портрет. Удж вылысь локтан. Повар: — Друг, Егор Иваныч (оз Егор!), тэн персональнӧй блюдо-суп ми талун пуим, вок... А магазинысь медбур сорт и медбур ситеч ну. — Егор Иванович! Егор! — Клим мыччӧ выль костюм. И киӧс кутлӧ продавец. Кыдз, быттьӧ, сылы ме ударнӧй уджӧн вӧча век тшӧтш лишнӧй кубометр. А банщик йылысь шуны кӧ, — лучкистлы сійӧ рад делянка шӧрӧдз вайны мен пӧсь ваӧн ыргӧн таз. — Спасибо! — вочавидза ме да кутла налысь ки: — Рӧднӧй страналы уна кер пыр сетны дась лучкист. Тӧвар оз мешайт, дерт... ме рад, кор сылӧн бурджык сорт, но сӧмын пӧсь пывсянын таз пыр радейтӧ Егор! Ме йылысь трестын сёрни эм, и леспромхозын сёрни эм... Газет районын оз и пет, лучкистлӧн абу кӧ портрет; лучкистлысь тӧдӧ знатнӧй ним и Минлеспромса выль министр... ...Мунӧ Егор, сьылӧ Егор, восьлалӧ тэрыба водзӧ. Мунӧ Егор, сьылӧ Егор, садьмӧдӧ ун асывводзлысь...
VI
— Тадзи думайта ме... — ассьыс висьталӧм помаліс Дмитрий, бипур дорын кор кытшаліс мастерӧс удал звено, Но Огневлӧн душа вӧлі аскиа лунлӧн выль ритмын, коді юргис нин вӧрын, кыдз шудлунлӧн выль торжество. Усис посньыдик лым. Табак кӧшельяс кыскисны зонъяс: — Гартышт, Дмитрий Ильич... — Мыйкӧ ловлы оз ков... Шӧвкӧн быгӧртӧм кӧшельяс мастер кӧ ачыс оз донъяв, — ыджыд сьӧлӧмас сылы эз прӧста дзик поздйыссьы шог! — Мыйла сідз... — Нормаджынйыс?.. — Пожалуйста... Водзӧ петіс Анюта сэк висьтавны сьӧлӧмсьыс дой. — Миян нинӧм оз артмы... Вот ӧні и жалуйтчам! Гашкӧ, дзикӧдз моторыслы сетны бӧр колӧ покой... Кутшӧм тӧлк сыысь миянлы: кызь килограмм колӧ кутны, кубометръяслӧн лыд жӧ, кӧть тэрмась, — оз сод!.. — Ставыс правда, Огнёв, кыдзи висьталӧ миян Анюта, — пырис сёрниӧ мастеркӧд орччӧн жӧ пукалысь зон. — Коді думайтіс тайӧ пиласӧ моторыскӧд ӧтлаын, медым локтӧ да отсалӧ уджавны тэн, комсомол... Сувтіс коймӧд сэк: — Уна лучкистъяс эм вӧрын, но мотор дінӧ сувтны оз кӧсйыны. Накӧд Егор... Тэрыб зонмыслӧн кывъясыс сатшисны Анналы дойӧн. Мыйла казьтывны сійӧс, код сы дінысь зэв ылын пыр? Сьӧлӧм муслунӧн тыр, но ӧд ӧтнаслы, том нывлы, тӧдса, кыдз ёнтыштӧ дойыс! Дмитрий кывзысис сёрниӧ. Таӧдз на видзӧдліс ставсӧ. Корис пуксьыны быдӧнӧс сэтчӧ, кӧн лапъяссӧ нюжӧдіс коз. — Тіян висьтъясын, эска ме, эм, другъяс, кутшӧмкӧ правда... Сӧмын техника кулитны... Та йылысь сёрнитіс код? — Мастер тэрыба сувтіс да бипурлань воськовтіс нёльысь, сэсся бергӧдчис бӧр. Сылӧн синъясын ыпнитіс би. — Унатор ті он тӧдӧй... Он тӧдӧй, том другъясӧй, ті водзын виччысьӧ миянӧс мый, кыдзи вӧрлӧн важ олӧмыс колис... Ягын быдми ме ачым ӧд... Ёль тасянь лун вылӧ кывтӧ. Джуджыд нӧрысын, ю дорын, керка на ӧні пыр эм, коді морт моз жӧ пӧрысьмис нэмъяслӧн зэв ыджыд сывйын... Коді кыпӧдліс сійӧс?.. Ог тӧд... Гашкӧ, тэнад, Анюта, на дед! Тайӧс висьтала тіянлы ме, медым тӧдінныд олӧмлысь донсӧ. Унатор ті эн тӧдлӧй... Ӧд олам ми шондіа кад! Но ме аддза и сійӧс, кыдз мудзпырысь Ёль берег дорсяньыс шуштӧм керкалань кыпӧдчӧ миянысь кодлӧнкӧ бать. Вылас кӧтасьӧм лаз... Синмыс мудз вӧсна лунсӧ оз аддзы. Чомйын сійӧс встречайтӧ сісь идзас, прӧстуда да тшын; кӧнкӧ ылын купеч, кӧнкӧ орччӧн — вир юысь подрядчик паськыд зепъясӧ тэчӧны дядьӧысь пычкӧм барыш. Ӧти чер... сьӧкыд чер мортлысь лёк ногӧн нетшкӧ здоровье... Ӧтнас пармаыс тӧдіс, кыдз визувтіс синвалӧн шор. Югыд сталинскӧй нэм чужан вӧръяссӧ век кежлӧ ловзьӧдіс, пыртіс сылӧн просторъясӧ уджлысь волнуйтана гор. Коді жалитӧ важсӧ, выль техника кедзовтны кӧсйӧ? Мастер босьтіс Анютаӧс киӧдыс. — Ог... — Сӧмын, шуам, мый сьӧкыд на... — Корсьӧй да ӧзйӧй ті! Коді тіянысь жалитӧ ичӧтик сывъя лучок? — Некод оз, — вочавидзис том зон, мотористлӧн помощник. — Важ лучокӧн, кӧть кӧсъян, — выль кадъясӧ ӧні он ов... Но и миян делаясӧн некодлы оз шогмы ошйысьны. Мыйкӧ миян оз тырмы пыр... Выныс зэв ичӧт — звено... Кыкӧн пӧрӧдчам, увйысьӧ ӧти морт сӧмын... — Сідзкӧ, мый сайын делӧыс, висьталӧй, другъясӧй, ті? Колӧ уджавны сідз, медым вир ӧзйис ставнымлӧн сӧнын, и не сӧмын Егор, — локтіс ми дінӧ каждӧй лучкист! Быд звеноӧдз воліс Дмитрий, кывзысис, мый дзугӧ ритмсӧ; кодӧс ошкис, кодӧс видіс, кодкӧд чолӧмасис сідзи... Воліс быд делянка пытшкӧ, кубометръяс вӧсна тышлӧн кӧні сӧмын юргис гор. Недорубъяслӧн пӧстатьяс вывсянь — Чолӧм! — горӧдіс сылы Егор. Мастер тайӧс оз виччысь... Не сыла, мый сёрнитны нинӧм. Эмӧсь сёрнияс вӧрын да споръяс. И кутшӧмӧсь эм! Кольӧм нэмыс упорнӧя кор кутӧ выльторсӧ шамыртӧм киӧн, водӧ вуж доддьӧн кор миян туй вомӧн важыслӧн нэм. Ӧні мӧдсяма дум ставнас сьӧлӧмсӧ Дмитрийлысь сотіс: кыдзи йӧзлӧн душаыскӧд мусмӧдны вына мотор... — Бара корасьны ме дінӧ? — чер йывнас кын пуӧ сӧтіс, самодовольнӧя пуксис Егор. — Мыйла корасьны? — Сідзжӧ... Тэ гӧтравны кӧсъян нин важӧн, сӧмын тайӧ лучокысь не орӧдны менсьым том лов... Мастер шуис, мый думайтіс: — Ов аслад гажӧн... Миянлы тэ он ков!.. — Сідзкӧ... тэныд... ог ков? Но страналы, ме надейтча, кола... Менӧ щӧт вылысь шыбитны!.. — Некор ог кӧсйы, Егор... — Вӧлін ёртӧн тэ мен... — Ӧні тшапитчан? Дружба да олӧм прӧверитіс, Ненев, нёль во чӧжся фронт... — Вот и встретитчим... — Встретитчим! — Казьтывны, кажитчӧ, нинӧм: лоин мастерӧн тэ, а ме пыр на, кыдз аддзан, лучкист... ...Гашкӧ, тайӧ ӧбидаыс сотіс Егорӧс пӧсь биӧн: мастер аддзыліс сатшис кыдз Неневлӧн лым эрдӧ син... — Пыр ме помниті тэнӧ, Егор... Чайті, локтан да орччӧн ми, кыкӧн, кутам кыскыны выльыслысь ветлытӧм ордымӧд груз, а тэ мӧдарӧ... — Мӧдарӧ!.. Тэнсьыд ме плантӧ ог тшыкӧд, — ёсь лучковӧй пилаыскӧд крепыдӧн кольӧ союз! Сет тэ вӧля мен, Дмитрий, — ме петкӧдла быдӧнлы аски, кыдзи шедӧдны вӧрын лучковкаӧн позьӧ рекорд... ...Кыдзи висьтавны сылы, мый олӧмыс вежсис нин раслӧн? — Оз, оз гӧгӧрво талун стахановец, удал Егор!
VII
Кор делянкаысь лэччӧ Огнёв, — сійӧс шымыртӧ пыр ыджыд радлун. Тайӧ чувствоыс тӧдса ӧд сылы, код радейтӧ вӧр. Джуджыд яг вылын кыптісны югыд выль керкаяс радӧн, выль посёлоклӧн керкаяс. Войтӧв оз тӧр таті шутьлявны рытъясын скӧра пыр важмоз, вешйис кытчӧкӧ ылӧ зэв, кӧин моз усйысис дзик. Ӧні ылысянь тыдалӧ — дзирдалӧ зарево-би, мортлы овны и сьӧд вӧрын лои зэв кыпыд да гажа. Тайӧ шеді эз кокниа. Унатор мешайтіс сылы, — пыр эз тырмы то кӧрттув, то краска, то ки. Утверждайтісны дыр леспромхозын, мый ылын тасянь нюжаліс лунвылӧ колана вӧрлӧн массив. Сэки первойысь тшӧтясис Дмитрий директоркӧд. Тайӧ лоис райкомын, бюро вылын. Локтіс парторг, кор отчёт тані кывзісны миянлы тӧдса нин Торковлысь, — и шымыртіс мастерӧс шог. Ӧчки тасъяса синъясысь аддзис Огнёв, кытчӧ кыскӧ близорукӧй мечта, коді падмӧдӧ миянлысь туй. — Колӧ стрӧитчыны ю дорӧ... Вӧр лоӧ матынджык кыскыны. Таын логика... Базис тан. Тані туй... Чӧла кывзіс Огнёв... Сӧмын сьӧлӧмсьыс зэв ыджыд ярлун сійӧ дзебны эз куж. Тайӧс казяліс ачыс Рубцов. Кодлы следуйтӧ пыр, не райкомысь кӧ быд секретарлы медводз тӧдмавны мортлысь тревогаӧн шымыртӧм лов? «Сідзкӧ, ю дорӧ? Бара пыр важкодь жӧ сёрнияс...» Дмитрий уджаліс вӧрын и водзсӧ эз ӧти-кык во, но эз думайт, мый тадз позьӧ олӧмысь сёрмыны налы, кодъяслы, кажитчӧ, и оз позь. Торков мӧдысь на кыпӧдчис да секретарь дінӧ локтіс, зэв приятнӧя вашнитіс: — Сэсся жӧ... Аддзанныд, план! Абу шутка... Ӧд кыскыны колӧ! — И лӧж тайӧ! — юрӧбтіс-потіс: — тайӧ Торковлӧн личнӧй, а не большевикъяслӧн план! — Ми кустаръясӧн лоны ог кӧсйӧй, эн вунӧдӧй та йылысь, Торков... Вӧрлӧн олӧмын, медбӧрын, воис нин выльсяма кад... И не чукӧртны сійӧс, кыдз вӧвлі, став лӧнь берег доръясысь, — миллион кубометръяс нин требуйтӧ талун страна. Колӧ писькӧдны туйяс да вольсавны рельсъяс пыр водзӧ, колӧ вӧр вӧсна тышкасьны сідз, кыдзи требуйтӧ долг, корӧ уголыцик вӧр, и строитель, и рудокоп... А ті кӧсъянныд мый? Сетны ичӧтик соддзӧн? — Дмитрий азыма лолыштіс: — Бара баракъясын овны? — Не дворецын, дерт, тӧдӧмысь... Ковмас баракъясын... Да! — Гӧгӧрвоӧй ті, Борков, важ быт миян важӧн оз ков нин, кыдз оз ков ӧні некодлы сімӧм двуручнӧй пила! — Ылӧдз нюжӧдчан!.. — Дискантӧн шыбитіс Торков, но эз сет сылы сёрнитны нин секретарь... Мича яг вылын недыр мысьт быдмис выль кар, пожӧм сирӧн на лолалысь уна постройка, уна мича да югыд здание. Мастер пӧрччысьтӧг пыраліс клубӧ, ыджыд букваясӧн гижис: «Клубын аски лоӧ партийнӧй собрание».
VIII
Тіралісны кодзувъяс выль посёлок весьтын. Енэж югыд кизьясӧн асьсӧ ставнас пестіс. Лӧсьыд татшӧм рытӧ гажӧдчыны, овны и... Сӧмын кытӧн, кытӧн абуӧсь влюблённӧйяс? Гармонистлӧн киясын збоя ворсӧ гудӧк... Не Егорлӧн киясӧ вӧзйӧ сійӧ шудсӧ. ...«Мыйла тэ, Анюта, скӧр, мыйла дзикӧдз дӧзмин: мелі кывтӧ, сьӧлӧмшӧр, мыйла тэ он вӧзйы? Тэтӧг гажтӧм меным пыр Мича Ягын овны...» Ӧтвечайтны Анюталы та рытӧ зонлы эз ковмы: партсобрание воссис, и гудӧг гор тшӧкмуні пыр. Вӧрын сёрнитны уна да весьшӧрӧ ёртъяс оз кужны. Шойччан часъяс рабочӧйлысь воштыны прӧста оз позь; мӧд вопрос, кор собрание сиӧма ӧтувъя уджлы, коллектив йылысь видлавсьӧ кор неотложнӧй вопрос. Коммунистъяслӧн лыд абу уна. Собрание нуӧдсьӧ восьсӧн. Сідзкӧ, быдӧнлы сёрнитны позьӧ, мый тырмӧ, мый оз. Пызан гӧгӧрысь аддзӧ Огнёв устӧм чужӧмъяс, тошъяс, весиг котӧртіс татчӧ тшӧтш кокпӧла пӧрысь завхоз. Тайӧ рытӧ эз петав ларёкӧ и Клим Безмятежный. Аслас гудӧклысь кӧлыссӧ шыбитіс сой вылас Клим, и собрание водзвылын томйӧзлӧн гажлунӧ вермис ассьыс пуктыны вклад медся удал да яр гармонист. ...Первой пункт кузя сёрнитӧ мастер сы йылысь, мыйла сылӧн делянкаын шогмытӧм артмис разрыв, мыйла керлӧн движение дыр кыссьӧ Эжвалӧн берегын нюжалӧм катище вылӧ. Тошка дядьӧяс ӧвтӧны юрнаныс. — Быдтор тай тӧдӧ! — Молодец, миян мастерным... — Збыльысь... Огнёвлӧн ӧд пи! Сё кальянъясӧ тэчӧны, тэчӧны зепъясысь лӧдӧс, кӧть и стен вылын гижӧма: «Не курить!» Дмитрий видзӧдӧ йӧз вылӧ... Тӧдса лучкистъяскӧд орччӧн ӧти радын тшӧтш пукалӧ ичӧтсянь тӧдса Егор... Дмитрий тӧдӧ: бур морт... Сы кодь удалӧс кыськӧ мӧй корсян! Налӧн дружбаыс чужис ӧд вӧрын, и некод нин сійӧс оз торк. Дмитрий видзӧдӧ йӧз вылӧ... — Слаба ми уджалам, ёртъяс, кӧть и вынйӧра техника юралӧ ӧні со тан... Кодкӧ ылісянь горӧдіс: — Весьшӧрӧ, тыдалӧ, ноксям... — Механизмыд оз тырт государственнӧй план!.. Мастер быттьӧ эз кывлы: — Эг кужӧй ми котыртны уджсӧ... Талун пуктамӧй талы ми век кежлӧ пом. Колӧ выльногӧн уджавны ӧнісянь вуджны, колӧ паськӧдны вӧрын, сідз шусяна, ыджыд поток. Мастер висьталӧ сы йылысь, сьӧлӧмас мый сылӧн олӧ... — Тадз оз артмы, ме думайта... — кыпӧдӧ кисӧ лучкист. — Ӧти видзӧдны кутас, мӧд овны да сёйны, а пиласӧ пыр кыскавны... Коді жӧ? Ми?.. — Оз, оз артмы тадз... — Артмас на! Орӧдӧ сійӧс механик Алёша: — Сета кыв коммунистлысь, механиклысь тӧждлун да сям! Кытчӧ пӧсьлунсӧ сьӧлӧмсьыс ачыс Алёшаыс воштас, кор признайтны машина оз кӧсйыны ёртъясыс тан? Тайӧ сійӧ, Алёша, став прӧсекъяс писькӧдіс ачыс, медым кыскыны вӧрӧ сталь сьӧлӧма, сьӧкыд ПЭС. — Разрешитӧй ті мен!.. — Разрешитӧй ті мен... Мыйкӧ кӧсйис на содтыны, — сёрниыс голяас сатшис, но Огнёвлӧн лӧз синъяскӧд видзӧдлас крестассис сэк, и Алёшалӧн воссисны мыш саяс, быттьӧкӧ, бордъяс, сылысь сӧнъяссӧ зэлӧдіс кутшӧмкӧ вынйӧра ток... Тайӧ рытӧ быд сьӧлӧмӧдз йиджтысис тувччалӧм ордымӧд ыджыд кыв, — кодӧс шуисны тані «поток». ...Сӧмын ӧтнас Анюта эз вермы не тӧдлыны, кыдзи ньӧжйӧник сувтіс да ывлаӧ петіс Егор... Клим Безмятежный эз тӧд некор шог. Клим Безмятежныйлӧн вӧлі ларёк... Вузасис водзтісӧ сӧмын талонъясӧн, списокӧн спирт юкліс удал том зонъяслы. Некод ларёшникӧс сэки эз вид, кияснас ӧвтіс да шуліс: — Лимит!.. Кодкӧ кӧ казьтыштас сылы, мый колӧ озырӧн лоны и няньӧн и солӧн... Шуны ог вермӧй, — ларёшниклӧн тан поздйысис эз уна вояс чӧж блат. Премия шуӧма-индӧма кодлы, — тӧдӧ ларёшникыс: — Ненев Егорлы, коръяскӧ сӧмын завхозлы, медматыс друглы да воклы, — бара Егорлы... Вежсисны кадъяс и гажтӧмтчис Клим: некодлы вӧрын эз ковмы лимит, ньӧб мый тэн колӧ, мый колӧ судзӧд, некод нин нинӧмӧн тэнӧ оз удзӧд. Сахар кӧ, — сахар, табак кӧть, чай, нюжӧд прилавоклань сӧмын выль шайт, Рӧдина мынтіс мый бур, тэрыб уджысь... Клим Безмятежныйлы друг ковмис кужны аддзыны мича шерстянкалысь сорт, спирт пыдди вайны портвейн да кагор. Кытчӧ тэ нюжӧдан орсовскӧй ки? — Ӧні висьталас Клим Безмятежный, кыдз котыртӧ вӧрын снабженье... Мыйла завтракъяс ӧні Анютаным оз получайт?.. Гудӧк кӧлысыс Клим киысь уси. Поток йылысь вӧлі сраженье.. Кыдзи веськаліс тайӧ вопрос?.. Безмятежный эз чайт, мый и сылы тшӧтш ковмас отчёт уна йӧз водзын сетны... Бурджык тайӧ вопроссӧ Огнёвкӧд... Не тан. — Ми — служебнӧй пӧрядокын... Бӧрти... контораӧ ветламӧй... Мастер видзӧдліс йӧз вылӧ; ньӧжйӧник: — Тан... ӧтвечайт!.. Петіс йӧз водзӧ Клим, кыскис зепсьыс сэк ыджыд блок-книжка, кытчӧ нывъяслы сийліс ударнӧй порядокын стих. — Пятилеткалы вӧр колӧ... Унджык кӧ, — дзик абу лишнӧй... Тат передньӧйлӧн мунӧ, кыдз тӧдам ми, визь. Море сайын эм Черчилль, а сылӧн дзик ад пасьта вомыс: война ӧзтысьлы горшас ми тойыштам кер помысь кляп. — Сійӧ правильнӧ!.. Точно! — клуб ызӧбтіс серамӧн помся. — А котлетъясӧн делӧ кыдз двигайтчӧ? Яй мыйла абу тан? Сёрнитны Климлы эз сетны. — Ӧтнам бергала пыр... Восьтны гудӧкӧс вошті спокой. — Сідзкӧ, корсян спокой тэ? — Огнёв друг терпеньеысь петіс, — коммунистлӧн горение эм, а оз вужъяссьы сыкӧд спокой! Тэнӧ партия сувтӧдіс сэтчӧ да шуис тэн: — Уджав! Медым делӧыс ичӧт, — быд делӧ прославитӧм труд, но спокойкӧд... Эн киась! Спокой — сійӧ гибель быд уджын, коммунист кӧ тэ сьӧлӧмнад, — венны тэ сійӧс пыр куж. ...Партсобрание помасис сёрӧн. Клим медбӧръя йӧзкӧд нин петіс. Мыйкӧ сьӧлӧмсӧ сотіс... А мый? Сійӧ ачыс оз тӧд... Гашкӧ, збыль, Безмятежныйлы мӧд кодзув енэжын петіс, олан ордымыс сылӧн не тайӧ, а выль сяма, мӧд! Тіралісны кодзувъяс выль посёлок весьтын: енэж югыд кизьясӧн асьсӧ ставнас пестіс. Лӧсьыд татшӧм рытӧ гажӧдчыны, овны и... Сӧмын кытӧн, кытӧн абуӧсь влюблённӧйяс? Гармонистлӧн киясын бара ворсӧ гудӧк... Не Егорлӧн киясӧ вӧзйӧ сійӧ шудсӧ. «...Мыйла тэ, Анюта, скӧр, мыйла дзикӧдз дӧзмин... Мелі кывтӧ, сьӧлӧмшӧр, мыйла тэ он вӧзйы. Тэтӧг гажтӧм меным пыр Мича Ягын овны...»
IX
Агитатор вӧрын — бур, желаннӧй гӧсть. Паськыд пызан дорын газет сӧмын босьт, — пӧрысьяс и томъяс, удал нывъяс, зонъяс чукӧртчасны пыр: висьтавлыны ковмас быдтор йылысь дыр... Кадыс кӧть и сёр нин, — ӧдзӧс восьтіс ныв. — Неуна ме сёрми!.. — Лок вай... Прӧйдит! Пыр!.. Керка пытшкын шоныд, пачын ломзьӧ пес. — Партсобранье вӧлі... Ачым сӧмын сэсь... — шуис сэк Анюта, пуксис йӧзкӧд тшӧтш. — Быдторйӧн вай юксьы!.. — Вай докладтор вӧч! — Висьтавнысӧ позьӧ! — Абу кӧ секрет?.. — Вӧлӧмкӧ, тай позьӧ лишнӧй кубометр быд мортлы на сетны, сӧмын колӧ... — Ну-у!.. Бурджыка на котыртны вӧрын йӧзлысь удж. Партсобрание сувтӧдіс миян водзӧ мог: зарни вӧрлысь сувтлытӧг содтыны поток. Сӧмын колӧ радейтны электропила... Коді сійӧс радейтӧ? Коді прӧтив? За? Чӧв олӧны ӧтияс. — Позьӧ, дерт... — Ог тӧд! — Меным бурджык ӧтиӧн! — Медым кодкӧ мӧд! — Тайӧ, — ковтӧм сёрнияс, — вочавидзӧ ныв. — Кыкмында задорӧн нин аски уджлӧн шы кутас вӧрын юргыны... Важ моз оз нин ло! Пӧрӧдчыны кутас пыр ӧти-кык звено... Гӧгӧрвоа кыдзи ме, — водзын авангард, сучкорубъяс сідзжӧ бара мӧд отряд... Быд морт ассьыс делӧ тӧдны кутас пыр. ...Ассьыс сёрни смела нылыс кутӧ дыр... Сэсся ӧти сувтӧ: — Миян ӧти туй аскиланьӧ тувччавны... Киӧс, нылӧй, кут! Видзӧдӧ Анюта, — том лучкист Степан пӧся кисӧ кутлӧ пызан дорын, тан. Кыпӧдчӧны мукӧдъяс: — Медым микӧд шуд: тыдалӧ тай, нуӧдӧ сэтчань ӧні туй. — Первойӧн ме лоа!... — Менӧ, Анна, гиж! — Мыйла сӧмын тэнӧ? — сувтӧ дзор лучкист: — Менам сідзжӧ право та вылӧ ӧд эм... — Менӧ... — Менӧ... — Менӧ... — Тіянкӧд тшӧтш ме! ...Помасьӧ беседа. Кылӧ шувгӧ вӧр. Татчӧ локтан следӧд мунӧ Анна бӧр. Туй шӧрын — Алёша... — Алексей тэ, друг!.. — Татшӧм рытнас вошан... — Кытчӧ кутан туй? Алексейлӧн радлун морӧсас оз тӧр. — Тӧдан, Анна... Аннуш... Шызяс миян вӧр!.. Верит меным, шызяс, — микӧд — ныв и зон!.. Орччӧн ордым кузя вуджӧртіссӧ код? Кодлы нӧшта лои талун мустӧм вой? Восьлалӧ Анюта, сылы паныд... — Ой!.. Уси чужӧм вылас русӧй юрси прать. ...Кӧнкӧ ылын, ылын сӧрис путорган... — Анна!.. — Ме... Егорлӧн сьӧлӧм пытшкас дой: нылӧс оз нин сывъявлы сылӧн зумыд сой. — Мыйла, сідзкӧ, пӧръясян?.. Абу пара ме... Мед механик кӧвъясьӧ, Алексейыд, тэн. Со тай торки... У-удитіс! — Тайӧ тэ... Егор? Дружба вылын шутитны велалін тэ кор? Нывлӧн синмын дзирдыштіс оскорбитӧм честь. — Тадзи? — Тадз ме думайта... — Тадзкӧ... весась сэсь! Котӧртіс Анюта, дзебис сійӧс вой, а Егор пыр кутӧ... Мыйла кутӧ сой? Сывйыштны? А кодӧс? Ой, Егор, Егор!.. Прӧстасӧ мӧй позьӧ мортлы вӧчны дой?
X
Коді ӧтчыд кӧть аддзыліс яг вылын асывлысь чужӧм, тайӧ серпасыс некор нин паметьысь сэсся оз вун. Пашкыр пожӧмъяс дыр на оз вермыны эновтны ун, — лымлӧн эшкынӧд кынь моз дзик мыччысьӧ вуджӧр югыд кыалӧн. Енэжыс ёнджыка ӧтарӧ ӧзйӧ и ӧзйӧ... Со нин пуяслысь йывъяссӧ окаліс зарниа рӧм; тӧвру вашнитліс пожӧмлы, кутчысьліс веж пася козкӧд. Бара чӧвусис ставыс. И бара нин лои зэв лӧнь. Тайӧ асылӧ первойӧн садьмис механик Алёша: репродукторлань нюжӧдіс кисӧ. Оз сёрнит на... Водз... Мыйнӧ пемыд кӧ? Яг вылын кытчӧ тэ вошан? Колӧ тэрмасьны, тэрмасьны, — шонтыны колӧ мотор. Ӧдйӧ пасьтасьӧ сійӧ да петӧ, а ягвывса сынӧдыс сур кодь: мыйдта морӧсад сійӧс он ю, — некор пӧтлун он тӧд... Кыссьӧ водзӧ, делянкалань, ордымлӧн тальтӧм на сюрӧс. Муса туй... Югыд туй! Сыысь донаӧс некысь Алёша эз аддзыв, оз тӧд, сылы мусмис выль вӧр, кыскӧ сьӧлӧмыс сійӧс веж ягӧ. ...Ӧти сёрни Алёшалӧн нэм чӧжыс ӧні оз вун, коді пансис строителькӧд вечнӧ пыр том Сталинградын, кӧні тшынасис руӧн снарядъясӧн жугӧдлӧм му. Сёрни пансис случайнӧ, кыдз тшӧкыда олӧмын овлӧ. — Кытысь лоан, солдат? — сылы нюжӧдіс каменщик ки. — Ылі войвылысь ме, — вочавидзис, — кӧн повзьӧдтӧм йӧраяс ӧні виччысьтӧг, думайта, ӧктӧны пипулысь йыв. И строитель солдатӧс сэк зумыда сывъяліс-кутліс. — Лоан — ловъя... Эн вунӧд: ми кутам пыр виччысьны вӧр!.. Сиам воны Берлинӧдз... Здоровье ми сиам да шудлун, чужан войвылӧ локны желайтам победаӧн бӧр! Тайӧс помнитӧ вӧвлӧм солдат, би пыр прӧйдитӧм том миномётчик... Вот и тэрмасьны колӧ тэн медводз, Юшков Алексей... Векни ордымӧд коді водз асылын сы бӧрся вӧтчӧ, тэрыб воськовъяс содтӧмӧн, суӧдны кӧсйысьӧ век? Гашкӧ, Дмитрий нин котӧртӧ?.. Абу... Лучок пельпом вылас. Ой, да, синъяс кӧ восьсаӧсь, тайӧ жӧ Ненев Егор!.. — Шуда асылӧн! — Асылӧн... — Водз тай, Егор?.. — Тӧдны колӧ тэн мый вылӧ? Воськов надзмӧдіс сэк: — Мун да пестуйт тэ ассьыд мотор!.. Ыджыд скӧрлунлысь вуджӧр Егорлы ас другысь не дзебны, доймӧм сьӧлӧмысь нетшкысьӧ сійӧ, кыдз тулысын ва. — Сідзкӧ, кӧсъян тэ венны... Лучкистӧс ті кӧсъянныд венны? Орис гӧлӧс Егорлӧн, и дзескыдӧн лои трӧпа. — Сӧмын видзӧдлам!.. — Видзӧдлам! — Воштіс терпенье механик. — Тэ эн ышнясь, Егор!.. — Меным ышнясьны нинӧмла дзик... — Он мӧй аддзы, кыдзи олӧмыс кутіс нин панйыны тэнӧ, Ненев Егор... самовлюблённӧй Нарцисс! Тэнсьыд слава ог мырддьӧй тай... — Кӧсъянныд!.. — Лӧж тайӧ! Миян требуйтчӧ талун, тэ верит, оз тэнад рекорд... Кӧсйис содтыны нӧшта механик, но туй таті кыклаӧ вожаліс, — пелька воськовтіс мӧдарӧ зумыш Егор, сувтіс паныдӧн сылы Егор... — Гашкӧ, кӧсъян и Аннаӧс... Ас дінад мусмӧдны?.. — Сылӧн синъясын дзирдыштіс би. — Кодлы сетан вопрос? — Кодкӧд сёрнита, — сылы!.. ...Лӧз енэжысь кодзувъяс кусісны. Шуис мыйкӧ ӧбиднӧйӧс сылы Егор, но Алёша эз кос. ...Водзӧ восьлаліс сійӧ, а паметяс тӧрытъя рытыс, и Анюталӧн синъясысь аддзӧ зэв радостнӧй би... Мыйла дзугны Алёшалы шудлунсӧ, радлунсӧ кыклысь, кор волнуйтӧ сьӧд синкыма, мӧд, сылӧн сьӧлӧмысь вир!
XI
Мартын лунъяс кӧть кузьӧсь, но сёрмыны некод оз кӧсйы. Первой лун... Первой час!.. Ӧні ӧти судьба — коллектив! Весиг Клим Безмятежный ларёк пытшкӧ некыдз эз ӧшйы, вӧрӧ локтіс став йӧзкӧд тшӧтш удал да том гармонист. Дмитрий нинӧм эз шу. И эз косӧд. — Вай кутчысьлы татчӧ! — босьтіс му вылысь сійӧ да нюжӧдіс Климлы «Вакопп». — Сетны ток!.. Мастер шуис механиклы аттьӧ моз. ...Тайӧ лунӧ Алёшаысь шудаджык некӧн эз вӧв ӧти морт... Дмитрий кывзысис дыр, кыдзи уджлӧн симфония шыыс ловзьӧ яг вылын, тан, — кыпыд песнялӧн ышӧдан гор. Вундӧм пожӧмъяс лэбач моз восьтны оз вевъявны кияс, — лымъя эшкынлань чегӧны ассьыныс веж тугъя борд. Сучкорубъяслы восьтӧны туй мотористъяс — том зонъяс, кодъяс тэрыб «Вакоппъясӧн» мунӧны ӧкмыс заруб. — Коді ордйысьны мекӧд? — друг юаліс ӧти сезонник. — Позьӧ пробуйтны! — горӧдіс мӧд сучкоруб. Пильнӧй цепьяслӧн таргӧмыс — сё автоматъяслӧн сёрни: ыджыд бой, быттьӧ, пансис веж яг вылын, тан; кутшӧм взвод тэнад сувтны атакаӧ сёрмис, ыджыд ротаысь кутшӧм звено, боевӧй капитан? Мастер отсасьӧ. Вӧчӧ тшӧтш. — Кыдзи, Анюта, делаяс? Юрси пратьясын нывлӧн бриллиантовӧй лым... Шудлун уси Егорлы, и радлуныс ставнас Егорлы: зарни кияса нылыскӧд колльӧдны нэмлысь мӧд джын! ...Аслас Дмитрийлӧн сьӧлӧмас Татшӧм жӧ олӧ Анюта, коми сиктысь зэв ичӧтсянь тӧдса на ныв. Ылі карысь письмӧясыс содтӧны мастерын вын, муса киясӧн гижӧм письмӧяс леснӧй институтысь. ...Сучкорубъяс оз кольччыны: ӧти пила бӧрся — квайтӧн... Ворсӧ киясын кокниа лэчыда тӧчитӧм чер. Тырмӧ быдӧнлы удж, некод абу тан лишнӧй да пайтӧм. Получайт, муса Рӧдина, Войвылысь пӧрӧдӧм кер! Ышмис Клим Безмятежный, И дум сылӧн лэччыны абу. — А котлетъясӧн делӧыс кыдз? — стрӧга юалӧ бара Огнёв. Коссӧ веськӧдіс Клим. — Ме... котлетъяскӧд дзик абу ладын... — Тайӧс висьтавны колӧ тэн важӧн! — Мӧд звезда менсьым югдӧдӧ лов!.. Перекур вылӧ пуксисны войтыр, а Клим аслыс места оз аддзы. — Ті эн дивитӧй... — Мыйысь?.. — Ог казьтылӧй ми!.. Коді думайтӧ: синъясӧ мортлы оз тӧр уна яндзим? — Абу татшӧм порядокысь, тыдалӧ, вӧлӧма Клим! — Мортыд сюрӧ ларёкад... — Дерт, сюрӧ! — А меным мыйла кыскавны, висьталӧй ті, ассьыс серам кодь ним... Кутшӧм ме Безмятежный? — Мятежныйӧн шуӧй ті менӧ... — Но и лоан Мятежныйӧн! — — Лоан... Мятежныйӧн, Клим! Шутка кыв вылӧ ёсьӧсь томйӧз: — Гӧлӧсуйтам!.. — Коді... сы вӧсна... Став вылӧ видзӧдӧ мыжа моз Клим. — Медым миян потокӧ и Климлы тшӧтш ӧнісянь сувтны? Кыптӧ сынӧдӧ сэк уна дас мортлӧн пӧсялӧм ки. Татчӧ мастерлы шунысӧ мый: — Поздравляйта став сьӧлӧмсянь... Лӧсьӧд Черчилльлы, Клим, кубометръясысь зэв крепыд горт!.. Тайӧ асылӧ первойысь бергӧдчис пасечнӧй волоклань паськыд мышнас, став тушанас быдӧнлы тӧдса Егор. Коді мыжаыс сыын, мый морт уважение воштіс? — Завидь Дмитрийлы лоис!.. И морӧсас ыпнитіс би. Гашкӧ, шуис судьба и Анютаӧс воштыны, кодлӧн век кежлӧ рӧдмис пӧсь сьӧлӧмын медмуса ним! Ӧдйӧ сувтіс Егор... Скӧрысь уськӧдчис пасека вылӧ, но лучок ӧні кажитчис мыйлакӧ сылы зэв ныж, быттьӧ кодлыськӧ босьтіс лучкист вына пельпомъяс вылас некод водзын дзик вӧчлытӧм, зэв ыджыд мыж. — Торков некор эз кулитлы... Ошкис, кыдз следуйтӧ, менӧ. Тайӧ мастер Огнёвлы ме, тыдалӧ, честьсӧ эг сет... «Ме ог паныд мун, — думыштіс, — техника аслам пыр лӧсялӧ, коді ӧні со ки вылын эм...» Садьмис лун. Тайӧ пӧстатьӧ тӧвруыс вайис ыджыд тышлысь делянкаын юралысь гор. Ачыс Ненев эз тӧдлы, кыдз коз пуяс, понӧльяс сайысь, ӧти дружбаӧн йитсьӧм нин, мыччысис удж кузя ёрт. — Кывлін дивӧтӧ? — Мыйся? — Егор ӧдйӧ веськӧдіс коссӧ. — — Быдсӧн повзьӧдін тэ... Увлань уси Егорлӧн сэк ки. — Не кӧ повзьыны — шензьыны, думайта, дерт жӧ нин, босьтчан: талун тэнсьыд, Егор, эз нин пасйыны гӧрд пӧвйӧ ним. Тэнӧ панйис Алёша... А сыкӧд и ...тэнад Анюта! Кӧдзыд пач вылад кӧйдіс, Егор, тэӧн эновтӧм рок! Мыйла сетлін зарок? Тайӧ тэныд урок! Эн куж честьтӧ тай, друг-мортӧй, Неневлысь кутны! Кыдзи мыччысьліс, сідзи жӧ дзик сайӧдчис-вошис друг-мортыс, сӧмын аддзис Егор асьсӧ дӧзмӧдан вомдорысь смек. ...Сьӧлӧм-борд вылын тӧвзис Егор тӧдса ордымӧд, уджсӧ помавтӧг муніс делянкаысь сэк, но эз веськав контораӧ: туй вожӧ сувтіс да падмис, кӧні спорыс Алёшакӧд асылын ӧзйыліс друг: автоматъяслӧн шы улын зэв мича пожӧма садйысь ӧти кучкӧмӧн пласьтмуні уна веж кудриа юр. Вына тракторъяс мунісны, ветлывтӧм нюръяс эз кутны налы тӧвзьыны-кыскыны аддзывтӧм хлыстъяслысь груз. Понӧль сайсянь Егор кӧсйис аддзыны ассьыс Анютаӧс, но запретнӧй черта — ассьыс ордымсӧ — век жӧ эз вудж. ...Шогӧ воис Егор. Сылӧн друг быттьӧ кольмыштіс юрыс. Кытчӧ инасьны ӧні, кор муслунлы воис нин пом? Сюмӧд кӧш помӧн ва джуджыд гӧптысь Егор скӧра юис, но эз вермы дзик нинӧмӧн пӧдтыны шоглунсӧ зон!
ХІІ
Комын градус кучкис кӧдзыд, — войвывса мороз. Прошви пытшкӧ лапъяс-соддзас куткыртіс веж коз. Пожӧм кышӧдчыны-вӧрны, кажитчӧ, оз лысьт, сӧмын дзугны гажа вӧрын вынтӧм уджлысь шы. — Мыйла скӧралан, мороз, тэ? — шуӧ моторист. — Миян отсӧг вылӧ лок тэ! — корӧ тракторист. А лебёдчик делӧ тӧдӧ: сӧмын гарт да гарт... Лесопунктлы выль победа должен вайны март. Да, победа... Выль успехъяс должен вайны удж! Эз ӧд прӧста тайӧ цехыс заключит союз вына техникакӧд, кодӧс сетіс чужан му... ...Трактор пасекаысь петіс, чӧвтіс сьӧкыд груз... Дмитрий сэтчӧ: — Климлы чолӧм!.. Кыдз тэнад... звезда? — Унджык вӧр мен, мастер, колӧ, — вӧлӧй вывті яр! Эстакада дорын квайтӧн грузитӧны вӧр. Зарни пожӧм зарни шайтӧн киськаліс став эрд. — Тан простой? — Простой... — Мый вӧсна? — юалӧ Огнёв. — Ми ог гӧгӧрвоӧй прӧстӧ. — Мыйкӧ темп оз сод. — А ті содтӧй сійӧс!.. — Кыдзи?.. — Килы уджыс — гаж!.. — Но ӧд кужысь кияс кындзи колӧ на душа! Мастер кепысьяссӧ перйӧ, — нинӧм мый мороз! — эстакадавывса керйӧ чӧвтӧ зумыд трос. Мортлӧн волялы покорнӧй сьӧкыд автокран мыччӧ катищела дорӧ ассьыс ёсь стрела. — Тадзи колӧ! — индӧ йӧзлы мастер да парторг. ...Югыд бипур водзын ӧзйӧ, сы дорын — кык морт. Не то спор и не то сёрни, — тӧдмавны он куж. Мастер кывзысьӧ: — Тэ сӧран, менам муса друг!.. — пӧшти гусьӧн шуӧ чуймӧм морт. — Воліс, воліс, тэныд шуа, татчӧ Сталин ёрт... — Эжва горулын эм, тӧдан, ставлы тӧдса кар. Локтіс сэсянь берег пӧлӧн. Вӧлі ар... — Сідзкӧ, збыльысь? — Дерт жӧ, збыльысь... Сылӧн пӧсь душа мортлысь сьӧкыд доля кыліс, мортлысь, коді тан ассьыс пӧсьсӧ нэм чӧж кисьтіс да эз аддзыв шуд... — Кыдз нӧ сійӧ татчӧ письтіс, аддзис ордым-туй? — А-а-а-ддзис! — соколлысь ён бордъяс сьӧкыд цепь эз чег... Шуӧны, дзор дядьӧ ордысь босьтліс киас чер, босьтіс сімӧм кӧрт пиласӧ... ...Чӧв олӧ Огнёв; тайӧ сёрни дінӧ аслас кӧртассис нин лов... — Лёк пиласӧ сэки босьтіс, ылысь воӧм ёрт, сэсся шуис: — Кыа воссяс регыд, коми морт! Рабскӧй уджлӧн следыс бырӧ, воас татчӧ шуд, парма пытшкӧ сэки пырас мукӧдсяма шум... Тайӧ миян керӧс дорсянь Сталин кыліс сэк, кыдзи юргӧ паськыд вӧрын ыджыд зыкӧн цех. — И эз вунӧд! — кыптіс гӧлӧс. — И эз вунӧд! Эз... ...Типкис цехлӧн ыджыд сьӧлӧм, — вынйӧра ПЭС, трактор грымгис туйяс вывті, тӧвзис кыдзи танк, кӧдзыд сынӧдӧ кузь сьылі лэптіс автокран, кабель кузя помтӧм ягӧ муніс вына ток, содтіс томйӧзлӧн бригада вӧрлысь веж поток. — Вӧрӧ техникасӧ ыстіс миян дона вождь... Дмитрий видзӧдӧ да радлӧ: вӧрын долыд удж вайис ставлы ыджыд радлун, помтӧм, помтӧм шуд! Оз Анюталӧн лучокыс, оз Егорлӧн чер тані ыдждав. Зумыд чокер сывъялӧ дас кер, ньӧти увйытӧг дзик кыскӧ трактор найӧс пыр; пильнӧй цеплы ӧні, сідзкӧ, сетсьӧ бара кыв... Сэсся кранлы бара колӧ качӧдлыны юр; сэсся югыд Эжва дорӧ тӧвзяс дзонь маршрут! Зарни пурйын кывтас водзӧ татысь пожӧм пу, медым миян синъяс водзын ловзис Кара-Кум, медым ловзис уна биӧн Куйбышевскӧй ГЭС... Вӧрын дружнӧй уджыс миян — черчилльяслы смерть! — Кут, Егор, тэ менсьым киӧс... — сёрни кыссьӧ век. — Тэ жӧ пыр на важас кыссян... Гӧгӧрво... Егор! А Анютаыдкӧд дружба, верит, ме ог торк... Мастер воськовтіс водзӧ: — Алёша!.. — Ми кыкӧн... Егоркӧд! Изучайтам пилалысь... — Ме аддза... ме аддза... — матчасть! Кӧсъя тэныд удача, желайта удача, Егор тэн... Югыд бипурсӧ пестӧма, тыдалӧ, зэв шуда час!.. — Локті, Дмитрий... — Спасибо, тэн!.. — Мустӧм лучокыс друг лоис... — Тӧран миян семьяӧ тэ, — шогсьыны ӧні оз ков!.. Дмитрий видзӧдліс ёрт вылӧ, нюмъёвтіс долыда воин... Кутліс крепыда, крепыда Неневӧс Дмитрий Огнёв. — Вӧрӧ мунігӧн сувті ме... Сувті... да ылалі дзикӧдз! Висьтав, Дмитрий, тэ мен, Кыдзи мастер, и друг, и парторг... Ёртлӧн синъясын вӧлі вопрос, ӧти шуда вопрос... — Сталин микӧд! Сійӧ аддзӧ, кыдз воськовтін тэ ассьыд ордымтӧ, муса Егор!
XIII
Мича Ягын, кӧн уджаліс Дмитрий, кӧть вӧрлэдзӧм муніс и бура, но эз справитчы планӧн, кыдзи тыдовтчис, дзонь леспромхоз. Торков шыбласис, планъясӧн ноксис да сводкаяс вурліс, но вӧрлэдзӧмлӧн темп ӧти войт мында водзӧ оз сод. — Мыйын делӧыс? — юасис пыр незадачливӧй Торков. — Ӧні техника эм... Эм и йӧз. Сӧмын уджав да ов! И директорлы кажитчис пыр, — кодкӧ нарошнӧ вӧрлэдзӧм торкӧ, сӧмын тӧдны эз куж, сылысь делӧсӧ тшыкӧдӧ код. И райкомын эз ӧтчыдысь татшӧм жӧ пансьывлы сёрни. — Мый тэн мешайтӧ уджавны? — юасис пыр секретарь. — Мый мен мешайтӧ?.. Ачым ог тӧд... — шуліс Торков; эз Рубцов кабинетӧ, а сьӧлӧмас поздысис жар. — Тэ кӧ ачыд он тӧд, — тайӧс отсала тӧдмавны тэныд: кольччин олӧмысь тэ, кыдзи тыдалӧ, Торков Андрей! Кольччин дзикӧдз, директор... Ми олам выль сталинскӧй нэмын, а тэ олан, Андрей, важ двуручнӧй пилалысь на нэм! Сьӧкыд вӧлі Рубцовлы тан мыжавны миянлысь Торковӧс: синкым борд улысь стрӧга да шог пырысь видзӧдіс син. — Казьтышт сійӧс, Андрей, кыдз Будённыйкӧд степьясӧд лэбавлім, шашка лэптӧмӧн вывлань, атакаӧ усьласьлім ми. — Эг на вунӧд ме... — Вот, вӧлім коркӧ ми тэкӧд солдатъяс, утверждайтім том му вылын чарлаа-мӧлӧта герб. — Висьтав меным, Андрей, коді сетіс тэн правосӧ сдайтчыны, и не кывны выль олӧмлысь темп? Ачыд помнитан тэ и гражданскӧй войнадырся штурмъяс... Вӧлі сьӧкыд, Андрей, нуны миянлы воинскӧй труд. — Ставсӧ, помнита, дерт... И ми ӧні на ветлывлам штурмӧ. — Буретш сэн и бедаыс, Андрей, мый оз туй ӧні удж вылын штурм. Миян вӧр — производство, завод, а делянкаяс — сійӧ жӧ цехъяс, мый тэн отсалас штурм, — ӧні требуйтчӧ график да ритм. Кольны олӧмысь кокни... Тэ тӧдан, Андрей, важ успехъяс оз мичмӧдны некодлысь должность да ним! Торков копыртіс юрсӧ... Рубцовлӧн тшӧтш надзмыштіс гӧлӧс. — Кольны олӧмысь, ёрт, — ыджыд туй вылын видзны обоз! Тэ быд выльторйысь полан... Он тӧд, мыйӧн выль кадыс олӧ. Висьтав веськыда... — Да, секретарь... — Леспромхоз тэныд, тыдалӧ, нуны оз тырмыны вынъяс? Овлӧ сідз ӧд и тышын: способнӧйяс восьтӧны туй... Тэ кӧ радейтан вӧр, — сет жӧ муслунсӧ ассьыд тэ сылы: первой случайын босьт Мича Ягвывса выль лесопункт. — Трестсянь индӧдыс абу ӧд... — Эм нин!.. — И трестыд оз кут... Кучкис вирыс сэк Торковлы юрас. Став сьӧлӧмсӧ сотіс ӧбида. Сӧмын код вылӧ норасьны? Панйис нин Торковӧс кад! Бурджык вӧлі Андрейлы Рубцов кӧ став сьӧлӧмсянь видыштіс... Торков видзӧдліс синмас Рубцовлы да пычиктіс: — Да... — Ӧні радуйта... — Менӧ? — И тэнӧ, Андрей, и быд мортӧс... Телеграмма Москваысь райкомӧ со эм... Присудитісны Сталинскӧй премия сылы, код ордымсӧ писькӧдіс вӧрлӧн потоклы да паськӧдіс сылысь выль нэм! Тайӧ — Дмитрий Огнёвлы!.. Вот тадз колӧ уджавны, Торков, медым Рӧдина шуис спасибо тэн, вӧвлӧм солдат! Кодкӧ вермас мӧй мортӧс, сӧветскӧйӧс, туй вылысь торкны, вир кӧ сьӧлӧмас пессьӧ, а оз кӧдзыд юкмӧсысь ва?
XIV
Райкомысь Рубцов муніс веськыда ягӧ, кӧн трудитчис Дмитрийлӧн ыджыд бригада, кӧн техника юраліс зэв унаног, кӧн вӧрлӧн оз помасьлыв зарни поток. Эз этшаысь волывлы сійӧ веж вӧрӧ! Тась нуліс Рубцов ыджыд кыпыдлун сьӧрсьыс, и кужис пыр висьтавны йӧзлы пӧсь кыв. Но чуймӧдіс талун и сійӧс выль шы... Рубцов аддзис мастерӧс: — Дмитрийлы — чолӧм! — Привет, секретарь... Волӧй миянӧ, волӧй! Рубцовлысь Огнёв пӧся топӧдліс ки. — Со витӧдысь локтӧ делянкаысь Клим! Делянкаысь петіс трелёвочнӧй трактор да тӧвзис пыр водзӧ кузь волокӧд-трактӧд. — Быд мортлысь, Огнёв, бура тӧда ме ним, но первойысь кыла, мый тэнад эм Клим! — — Он тӧдӧй ті Климӧс? — сэк юалӧ мастер. — Со аслас персонаӧн матыстчӧ татчӧ... Оз эскы Рубцов аслас синъяслы, оз: — А кӧн Безмятежныйлӧн... штилевӧй ОРС? Клим чышкыштіс пӧсьсӧ да серӧктіс: — Орстӧг машинаыс менам со котралӧ-ворсӧ... И шуӧй... Мятежныйӧн менӧ тшӧтш ті!.. Клим ӧвтыштіс кинас, и котӧртіс Клим! Делянкаын водісны му вылӧ козъяс... — Заруб вылын ӧні, Огнёв, тэнад кодъяс? — Анюта бригадаын куим звено, но водзын пыр важмоз на Ненев Егор... — Егор?.. — Кыдзи аддзан, Егор... — И Анюта?.. Рубцов налань котӧртӧ, кинысӧ кутлӧ, збой паралысь шудлунсӧ сьӧлӧмсьыс юкӧ. Анюталӧн синъясас — помасьтӧм шуд. Егор ставсӧ висьтавны здукӧн оз куж: — Ми век кежлӧ... Збыльысь... Ме муна выль туйӧд!.. — ...Гӧрд знамясӧ вӧр весьтӧд код тайӧ нуӧ? Сӧдз сынӧдын гыалӧ, пессьӧ гӧрд шӧвк, и окавлӧ тугъяссӧ вильышмӧм тӧв. Рубцов эстакадалань, Дмитрий тшӧтш сэтчӧ. Кран тури моз сьылісӧ чуймӧмӧн лэптӧ: эз дорны, зэв жаль, тшӧтш и сылы ён кок... Став помъяссянь матыстчӧ ыджыд поток. — Райкомлысь Гӧрд Знамя вручайтам ми тіян... — Рубцов шӧвксӧ топӧдлӧ морӧслань кинас: — Победаӧ сійӧ мед чуксалӧ пыр... И висьталӧ ӧні, мый думайтіс дыр, и висьталӧ Сталинсянь быдӧнлы аттьӧ, и Сталинскӧй премия Дмитрийлы аслыс. ...Сӧдз сынӧдын — кучкасьӧ знамялӧн шӧвк. Огнёв шапка пӧрччӧмӧн сулалӧ чӧв, кыдз пост вылын должен и сулавны воин... эз весьшӧрӧ сійӧ ӧд прӧйдит став бойяс, эз весьшӧрӧ кисьт чужан му вӧсна вир, мед век торжествуйтіс став му вылын мир... Гӧрд флаг улӧ сувтӧ Алёша-механик. — Мед олас сё вояс чӧж, — горӧдӧ, — Сталин! Анютакӧд восьлалӧ орччӧн Егор: Мед олас содружество тэкӧд, мотор! — А ачыс Анютаӧс сывъялӧ пӧся, кӧть йӧз дырйи тайӧс и вӧчны оз лӧсяв. Но дивитны найӧс дзик некод оз кут... Клим горзӧ: — Мед олас том гозъялӧн шуд! Мед олас машина — трелёвочнӧй танк, мед олас ларёк кузя менам бур зам!
XV
...Бара пуксис нин вой вӧрлӧн олӧмын ассяма мирӧн. Ланьтіс удал, том киясӧн ышмӧдӧм гудӧклӧн гор. Совещание помасис. Дас кыкысь кучкис эфирын... Чеччис Дмитрий Огнёв, сувтіс, кыпӧдчис мудзӧм парторг. Аски вӧр вӧсна тыш пансяс кык мында, нёль мында вынӧн... Медым шойччӧны йӧз, накӧд юкӧ ӧд радлун и шог! Быд успех шедӧ тышын, да-й колӧ мӧй висьтавны сылы, мый победа упорствотӧг некор оз волыв, оз лок. Кучкис дас кыкысь войся эфирын. Ӧд шойччыны кад нин! Мудзӧм морт вылӧ видзӧдӧ югыд портрет вывсянь вождь. Сійӧ унаысь тэнӧ, Огнёв, лӧнь контораысь аддзыліс, кыдз встречайтін тэ узьтӧг дзик турӧб да руд асывводз, кыдзи восьлалін тэ, пуан сьӧлӧмтӧ нуӧмӧн сьӧрсьыд, медым отсавны ёртъяслы мичмӧдны миянлысь му. Сталин тэкӧд пыр вӧлі, Огнёв, паськыд пармаын-вӧрын, Сталин аттьӧ кыв шуис тэн, сиис тэн ыджыд, бур шуд. Лӧнь контораын лои... А морӧсас Дмитрийлӧн гы моз мыйкӧ пессьӧмӧн-пессьӧ, кӧть медмуса кылыс оз шед ставсӧ висьтавны Сталинлы, юксьыны кӧсйыссьӧ сыкӧд, кодлӧн ӧшалӧ стенын быд мортлы дзик тӧдса портрет. Кадыс лоӧ на шойччыны Дмитрийлы... Сӧмын на войшӧр! Мастер видзӧдӧ тӧдса чертаясӧ... Сэтшӧм рӧднӧй! Сэтшӧм матыс ӧд сійӧ! Быд сьӧлӧмысь радлунсӧ, дойсӧ кужӧ тӧдмавны сійӧ, мый аддзыны оз вермы мӧд. Сёрӧн эновтӧ шум ставлы медмуса Красная площадь, йӧзӧс колльӧдӧ шойччыны сынӧдын юралысь гимн. Сӧмын Сталин оз узь... Сійӧ тӧждысьӧ пыр да став понда, и кремлёвскӧй стена сайын югыда ӧзйӧ век би лесопункт весьтын тіралысь кодзулысь дырджык на... Став делаясын миян эм сталинскӧй генийлӧн мӧвп. Сталин локтӧ забойӧ, а муслуныс — мореысь джуджыдджык; сійӧ аддзӧ, кыдз коясьӧ вӧр весьтын лымчирйӧн тӧв. Эжва берегын лӧнь вӧлі, чуймытӧдз лӧнь вӧлі важӧн. Вӧрса лэбач тан поздысис. Войтӧлыс шутляліс ёсь. Шувгис вӧр... шогсис вӧр... Миян кормчийлӧн гений, пространство да кад венысь разум татчӧ вайисны олӧмлысь шуда да выль бытие. Воис пармаӧ сійӧ том нывъяслӧн радуйтчан нюмӧн, йӧзлы сьӧлӧмас пестіс отвагалысь куслытӧм би. Тайӧ сталинскӧй нэмсӧ и славитӧ вӧр аслас шумӧн, сійӧс славитӧ миян зэв кыпыд, торжественнӧй гимн. Тайӧ гимныслӧн шыясыс паськыда восьтісны бордъяс... Талун ылі делянкасянь аддзӧ нин мастер Огнёв: коммунизмлань — быд туй, сэтчань мунӧ быд ичӧтик ордым, локтӧ сылӧн грядущӧй лун — югыд да том торжество!
Гижӧд
Зарни поток
Жанр: 

lkejrlkelkrgner klrjnelknfrkl ekjnrjkenfrej

1