МАМ

1
Кор ылі туйысь Тэ локтан сиктӧ, О, кыдзи тэнад Пӧсь сьӧлӧм діпкӧ. Тан чужин-быдмин И томлун коли, Сӧдз васӧ юлін Эн ӧти ёльысь. Мед уна вежсис Пыр кывтысь кадӧн, Но ставыс тэныд Со воча радлӧ, А муса мамыд Оз аддзы инсӧ, Пыр петӧ паныд Да тільӧ синсӧ. — Бур енмыд пиӧс Со, — шуас, — вайӧ! Да мыччас кисӧ Важ дзиръя сайысь. Тэ сувтан воча Да пӧся кутлан. Ӧд вывті шоча Мам шогтӧ юклам! А мамным миян Пыр овлӧ ӧти, И тэнӧ сійӧ Оз кедзовт ньӧти, Кӧть дінас мӧд пи Эм ещӧ сылӧн, Но сійӧ тэнӧ Пыр медводз кылӧ. — Вай, — шуас, — пырам Важ мусаинад... А сэні сылӧн Пӧсь нянь и вина. Ӧд дзонь вит во тэ Йӧз муын ветлін, Военнӧй флотын Кор служба петліс. О, Гриша, Гриша! А тэнад мамыд И быдтіс Миштӧ Бур дӧва сямӧн, И гӧрис-кӧдзис, И овмӧс кутіс, Став сиктса йӧзлысь Шуд ӧтвыв юкис. Со керка вевтыд Выль тьӧскысь тіян, Оз ковмы зэвтны Дыр сэсся кияс; А кильчӧ поскыд И важсьыс лӧсьыд, Кӧть ӧтчыд воськовт, — Он, майбыр, пӧсяв! И керка пытшкад Пыр ворсӧ шонді: Ӧд кодкӧ чышкӧ И кодкӧ шонтӧ! А сэрӧг стенсянь, — Тэ тӧдан ачыд, — Пыр дзоргӧ тэнад Сьӧд синма батьыд. Сэк ичӧт вӧлін, Кор муніс сійӧ, А рытыв тӧлыс Син сотіс биӧн. И мыйла ӧтчыд Друг бӧрддзис мамыд, Эн юав ньӧтчыд, Да-й нэм он янӧд...
2
Но тырмас важсӧ Выль висьтӧ кыны, Бур йӧзлысь гажсӧ Тшӧтш кӧсъя кывны. Кор чужан гортас Бӧр локтӧ пиыс, Ми сылы, ёртъяс, Став бурсӧ сиам. А мамыс важӧн И пызан дасьтӧ, Бур пилы пажын Со вайӧ ассьыс. И Миша вокыс Стӧч тайӧ здукӧ Тшӧтш кыськӧ локтӧ Да гажсӧ юкӧ. Кӧть Миша томджык, Но ён да статя, Дзик быттьӧ ловзьӧм Нэм овтӧм батьыс. Вок мыччӧ кисӧ Мӧд удал воклы: — Вай волы, Миша, Но локлы... локлы!.. Моряцкӧй куртка Мед тӧвзьӧ бокӧ, А Миша сюртӧ Став вынсьыс вокӧс. — Но... сетчан? — Сетча... — Вай сетчы бурӧн!.. Кӧть налӧн бертчӧм И абу дурӧм, Но мамыс локтӧ Да шуӧ: — Тырмас! Тэ, зонмӧ, воктӧ Тай кутін зырны!..
3
Важ пызан бердын Дась куим улӧс, И мыйӧн вердны Кык пиӧс сюрӧ. Оз куж бур мамыс, Кыдз панны сёрни: — Ме ог тай сяммы... Но колі корны... Ӧд татшӧм кадыс Оз частӧ волы, А Иван дядьыд Дзик орччӧн олӧ... Дерт, Гриша, тӧдӧ, Эз вунӧд сійӧс, Кӧть ылыс рӧдысь, И лоӧ пиӧн. Тшӧтш Гриша батькӧд Морт мунліс бойӧ. Но локтіс ратник Сэсь орӧм сойӧн. Кӧть дойыд биа, Но мортыс ловъя! И ӧти киӧн Эз прӧста довъяв Зіль Иван дядьыс Ас чужан грездас; А кадысь-кадӧ И йӧзӧс мездіс И сьӧкыд уджысь, И ыджыд шогысь. Морт овны кужис Бур оласногӧн! Но олӧм частӧ Оз тэнсьыд юась, Кор ставсӧ пасьяс Да ставсӧ нуас. Вот тадз и лои Во сизим сайын: Мӧд ёнджык дой на Друг пырис пайӧ, Кор дядьлӧн кувсис Том гӧтыр-ичмонь Да бордъяс увсьыс Кык нылӧс видзны Бур батьлы колис... И сійӧ оліс Став грездлӧн шудӧн. — Мед дядьыд волас... — Мам бара шуӧ: — Тэ, Миша, томджык, Вай ветлы, чукӧст... И Миша ловзис: — Ме ӧти здукӧн!.. Збыль, ӧти здукыс Кӧть эз и коль на, А сійӧс дзугис Зэв гора: — Вольна-а!.. Том молодеч кодь Зіль дядьыс пырис, Ар кызь дӧвечлы Стӧч быттьӧ тырис. Со куим стопка, А орччӧн нёльӧд, И зэлыд пробка Мед лэбзьӧ ёльӧдз. Ӧд ыджыд луныс И мамлы воис. Со оз тай вунӧд: — Вай юышт-сёйышт... Тэ, Гриша, миян Ӧд ыджыд гӧсьтыс! Но Гриша пиыс Оз пукав прӧста, — И мамлы кисьтӧ, И кисьтӧ дядьлы Да налӧн висьтӧн Пыр ачыс радлӧ. И Миша вокыс Тшӧтш орччӧн сыкӧд. — Тэ, Мамук, ноко... Вай медводз кыпӧд!.. Тэ быдтін менӧ И быдтін вокӧс. Ог прӧста тэнӧ Ме ӧні окав... Тэ этша узьлін Да уна кыскин, Кор батьным уси Вир кисьтан тышкын. И мамыс юӧ, И вокыс юӧ, Но мыйла дядьыс Тадз дзоргӧ муӧ? Сэк кӧнкӧ ылын Друг садьмӧ гудӧк. Вок чужӧм вылын Нюм ӧзйӧ шудӧн. — Мем клубӧ колӧ... — Друг Миша шуӧ: — Ті метӧг олӧй Да сёйӧй-юӧй! И чеччис, муніс Збой гудӧк бӧрся. Ой, мыйла луннас Тэ, гудӧк, гӧрсян! А Иван дядьлы Мам индӧ кинас: — Тэ... эн нин яндысь... Мун сэрӧгинас... И сэтчӧ пуксьӧ Со Иван дядьыс, Мый нэм эз юклыв Мӧд морткӧд батьыс. — Мед, — шуӧ, — зонмӧ, Пыр долыд туйыд... И ме мед ёнма, Кор тэкӧд юа... Но мыйла татшӧм Мӧд стопка курыд, И тадзи сатшӧ Том мортлы юрӧ? А мамыс сылӧн Пыр мелі, муса, Бать шуліс нылӧн Да ӧмидз тусьӧн, А Гриша важ моз И ӧні: — Мамук... (Ой, кыдзи гажмис Став вежӧр-сямыс!) Но мыйла... сэні, Бать снимок улас, Оз сулав ӧні Дзик тыртӧм улӧс? Но мыйла мамыс И мӧдкӧд... мелі? Кор тӧлкыд ямас, Сэк нем он велав! Кор зэв жар лунӧ Друг кыптас кымӧр, Пӧсь шонді сунас Лӧз сынӧд-тшынӧ, И енэж вевтыс Ен гымӧн-горӧн Лӧнь сиктъяс весьтын Сэк ачыс орӧ... Но мый нӧ лои И тэкӧд, зонмӧ, А вӧвлӧм дойысь Тэ абу ён мӧй? — Сувт, Гриша... Тырмас... — Мам кутлӧ писӧ И сылысь дыр на Оз эновт кисӧ. — Ланьт, Гриша, Аттӧ, Тэ кыдзи нэрмин... Тшӧтш ассьыд дядьтӧ Ӧд дойдны вермин. Эз кольччы... Муніс... Ӧд сійӧ чайтіс, Но... кыдз тэд шуны... Тась корсьӧ... пайтор. Вай гортас ветлы Да сійӧс бурӧд... Но мый оз петлы, Шу, гажа юрӧн... Со керка вевтыд Выль тьӧскысь миян, Оз ковмы зэвтны Дыр сэсся кияс, А кильчӧ поскыд И важсьыс лӧсьыд, Оз мудзтӧд костӧ, Оз, майбыр, пӧсьӧд! — Ӧд вӧчис сійӧ... Зон шуӧ: — Тӧда... — Эн ёр, бур пиӧй, Ме... — Коркӧ... мӧдысь!.. О, кутшӧм мортлысь Мам синва войтыд Нэм помӧдз сьӧлӧм Оз сэсся дойдлы!
4
Сикт шуда унмӧн Зэв важӧн узьӧ, А Гриша мунӧ Лӧнь улич кузя. Со дядьлӧн керка. Со ачыс дядьыс... — Ме эг, эг вермы... — Ме ставсӧ аддза, Мый сьӧлӧм пытшкад Тэ ӧні новлан, Мый сійӧ бытшкӧ... Но овлӧ... Овлӧ!.. Тэ мамтӧ, пиӧй, Эн шу мӧд кылӧн. Ӧд сійӧ... сійӧ... Эм сьӧлӧм сылӧн!.. Оз помнит Гриша, Мый сэсся лои, Кыдз сыӧдз йиджис Пӧсь сывнас войыс. Лӧнь Эжва пӧлӧн Зон шӧйтіс ӧтнас, Кӧн тувсов тӧлыс Оз падмӧд вӧтъяс. А сійӧ? Мырддис Кык мортлысь шудсӧ, И медводз сылысь, Код сійӧс чужтіс. Ю сёысь тулас Да сёысь ямлас, Но некод дойсӧ Оз тӧдмав мамлысь. А меным мыйла Пыр унджык колӧ? Ме сӧмын кывлі: Мам-дӧва олӧ...
Гижӧд: 
Жанр: 

lkejrlkelkrgner klrjnelknfrkl ekjnrjkenfrej

1