СЮСЬ ХУДОЖНИК ОЛӦ КАРЫН

Сюсь художник олӧ карын,
Вӧр-ва радейтӧ зэв ёна,
Коркӧ, вевйӧдчас кӧ, арын
Кыкысь вӧрӧ ветлас вонас.

Ӧтчыд аддзис пелысь розъяс
Эжва нӧрыс йылысь сійӧ.
Миян зонлӧн синмыс ӧзйис
Некор аддзывлытӧм биӧн.

Пуксис, зіля босьтчис уджӧ,
Паськӧдіс сыв пасьта дӧра,
Пелысь збыльысь ловъя вуджис
Сылӧн паськыд мольберт шӧрас.

Шуда вӧлі сійӧ ачыс:
Вӧчис йӧзлы татшӧм козин!
Пелысь тугъяс быттьӧ пачысь
Кыскалісны синъяс водзӧ.

Ассьыс кӧлуй зон эз чукӧрт,
Кодыр дасьтіс шойччан лэбув.
Буретш сэки уркай чукӧр
Кушмӧм видзьяс весьтті лэбис.

Дӧра шӧрысь пелысь быри,
Сэн эз тыдав ӧти роз нин.
Уркай вӧчис крука нырнас
Пелысь тусьяс мында розьяс.

Ӧні зон оз ветлы вӧрӧ,
Оз корсь талунъя геройӧс?..
Мый нӧ вӧчӧ?
		Розьӧсь дӧра
Шонді водзын дӧмлӧ сёйӧн.