ПАРТИЙНӦЙ БИЛЕТ ЙЫЛЫСЬ БАЛЛАДА
Партиялӧн миян райкомӧ талун волісны нин морт комын, талун вежлалӧны партбилетъяс. Восьтла ассьым тшӧтш морӧс зептӧс, сэтысь кыска жӧ донаторсӧ, кодӧс сетлісны ӧтчыд коркӧ, медым нэм помӧдз видзны кужи олӧм донӧн да аслам уджӧн. Аддза, локтӧны трактористъяс менам неыджыд чужан сиктысь. Найӧс быдӧнӧс бура тӧда, гижны на йылысь ме кӧ мӧда, ёна нюжӧдны ковмас висьтӧс, — бригадирлы тшӧтш юкны лист бок, кык дояркалы, дзор салдатлы, коді нем вӧчтӧг оз на катлась, мыйкӧ, шуӧны, пыр на керӧ, пыр на зунясьӧ зырйӧн-черӧн. Секретарь петӧ сылы паныд: — Пуксьы матӧджык, Ким Иваныч!.. Кутлӧ крепыда сылысь кисӧ, мӧдыс — ассьыс моз муса писӧ, быттьӧ бырӧма налӧн важӧн ӧта-мӧд вӧсна олан гажыс. Олӧм йылысь, дерт, налӧн сёрни, — помлань матысмис сійӧ кор нин, секретарь шуис: — Ӧні висьтав, кыдз да кор лоин коммунистнас?.. Ким Иванович мыйкӧ зумыш, сійӧ, тыдалӧ, эз и думышт, кыдзи казьтасны сьӧлӧм дойсӧ, врагкӧд медбӧръя ассьыс бойсӧ... — Кыдзи лои ме!.. — дыркодь чӧла юрсӧ лэдзӧмӧн сійӧ олӧ, сэсся вешйыштӧ пызан дорысь, быттьӧ синъяссӧ биыс ёрӧ. — Ставсӧ висьтавны вель дыр тырмас, а ӧд тіянлӧн уджыд тыр на... Фронтлӧн туй менӧ сьӧкыд арын нуис Клухорса перевалӧдз, кӧні кымӧрлы сӧмын чужны да Кавказ вомӧн сэсся вуджны... Сэні куимӧн колим ДОТ-ын, кодӧс враг зілис биӧн сотны. Колим куимӧн... Но ми шуим потшны вӧрӧглы водзӧ туйсӧ... ...Тасянь эськӧ и панны висьтӧс: менам ёртъясӧй — коммунистъяс, ӧти — Киевысь, мӧд — Бакуысь. Ме жӧ, тӧданныд, Коми муысь, беспартийнӧйӧн водзті вӧлі... «Коммунистӧн жӧ лоан ӧні!» — гӧлӧсуйтісны найӧ кыкӧн пулемётъяслӧн гора зыкӧн и мед тӧдісны, мый ми лэптім, гижӧд пуктісны морӧс зептӧ... Ставным усим ми... Сотчим ДОТ-ын, кор снаряд сылӧн гыркас потіс... Мыйла ловъя ме? Налысь юав, кодъяс перйисны менӧ гуысь... Секретарь быттьӧ садьмис: — Ставыс?.. Тӧдан Партиялысь Уставсӧ?.. Кыдзи лысьтісны торкны сійӧс?.. Партбилет ачыс кутіс киас, коді рӧмаліс кыа гӧрдӧн... Секретарь миян гусьӧн бӧрдіс.
Гижӧд
Партийнӧй билет йылысь баллада
Жанр: 

lkejrlkelkrgner klrjnelknfrkl ekjnrjkenfrej

1